កងទ័ពស៊ីរីដែលបានបង្ហើយការដាក់ពង្រាយជុំវិញទីក្រុងអាឡែបបានបាញ់ផ្លោងដាក់ទីក្រុងនោះសំដៅលើបណ្តាទីតាំងរបស់ពួកឧទ្ទាមមុនពេលបើកការវាយលុកធំមួយដើម្បីដណ្តើមត្រួតត្រាទីក្រុងសេដ្ឋកិច្ចនោះ ស្ថិតនៅភាគខាងជើងប្រទេស។ ក្រុងនេះជាគន្លឹះសំខាន់នៃជម្លោះ។កងយន្តហោះបានវាយប្រហារលើសង្កាត់ចារនិងសង្កាត់សាឃួរ (ភាគខាងជើង) ចំណែកសង្កាត់សាឡាហ៊ុដឌីន (ភាគខាងលិច)ជាទីតាំងរឹងមាំរបស់ពួកឧទ្ទាមត្រូវកងទ័ពឡោមព័ទ្ធហើយជាគោលដៅនៃការវាយប្រហារដោយកាំភ្លើងធំ ។ ការប្រយុទ្ធក៏កើតមានដែរក្នុងសង្កាត់ដទៃៗទៀតនៃទីក្រុងនោះ ជាបេះដូងសេដ្ឋកិច្ចរបស់ស៊ីរីស្ថិតនៅចម្ងាយ៣៥៥គ.មខាងកើតក្រុងដាម៉ាស់ ។
ប្រភពសន្តិសុខស៊ីរីមួយនិយាយថា កងទ័ពបានបង្ហើយកាលពីថ្ងៃទី៥ សីហានូវការបញ្ជូនកម្លាំងបន្ថែមមកកាន់ក្រុងអាឡែបជាទីលាននៃការប៉ះទង្គិចគ្នាចាប់តាំងពីថ្ងៃទី២០កក្កដា មកហើយពេលនេះត្រៀមសម្រាប់ប្រយុទ្ធយ៉ាងប្តូរផ្តាច់ ។ ប្រភពនោះបញ្ជាក់ថា កម្លាំងបន្ថែមទាំងអស់បានមកដល់ហើយឡោមព័ទ្ធទីក្រុង ។ កងទ័ពពេលនេះត្រៀមបើកការវាយលុកយ៉ាងប្តូរផ្តាច់មួយ ក៏ប៉ុន្តែរង់ចាំបញ្ជា ។ ទោះជាយ៉ាងណា សង្គ្រាមអាចមានរយៈពេលយូរព្រោះនឹងមានការប្រយុទ្ធនៅតាមដងវិថីដើម្បីកំចាត់ពួកភេរវករ ។
យោងតាមអ្នកទទួលខុសត្រូវខាងសន្តិសុខស៊ីរីមួយរូបថា ទាហានយ៉ាងតិច២០.០០០នាក់ ត្រូវដាក់ពង្រាយនៅរណសិរ្សអាឡែប ដែលនៅទីនោះពួកឧទ្ទាមប្រមូលផ្តុំកម្លាំងរវាងពី៦.០០០ទៅ៨.០០០នាក់ ។កាសែតAL WATAN ស្និទ្ធរដ្ឋធអំណាចស៊ីរីសរសេរថា បេសកកម្មបច្ចុប្បន្នរបស់កងទ័ពគឺពង្រឹងការត្រួតត្រាច្រកចូលទាំងឡាយនៃទីក្រុងដើម្បីរារាំងកុំឱ្យពួកឧទ្ទាមអាចរត់គេចរួច ។ កាសែតនេះអះអាងថា ពួកភេរវករជាច្រើនរយនាក់ត្រូវសម្លាប់នៅអាឡែប ។
ពួកឧទ្ទាមនិយាយថា ពួកគេកាន់កាប់ក្រុងអាឡែបពាក់កណ្តាលហើយអះអាងថា ទោះបីជាមានការបាញ់ផ្លោងយ៉ាងខ្លាំងដោយកាំភ្លើងធំក៏ពួកឧទ្ទាមនៅតែបោះទីតាំងរឹងមាំក្នុងទីក្រុងនេះដែរ ៕
ចែករំលែកព័តមាននេះ