ខេត្តព្រះសីហនុ ៖ នៅទីលានកីឡដ្ឋានក្រុងមឿង (ឆ្នេរឯករាជ្យ) ស្ថិតនៅសង្កាត់លេខ៣ ក្រុងព្រះសីហនុ ខេត្តព្រះសីហនុ កាលពីរសៀលថ្ងៃទី៤ សីហា ឆ្នាំ២០១២ មានរៀបចំបើកការប្រកួតកីឡាបាល់ទាត់ដណ្តើមពានរង្វាន់«ឆ្នេរស្អាត» ក្រុងព្រះសីហនុ ដោយទទួលបានការអញ្ជើញចូលរួមជាអធិបតីពីសំណាក់លោកសំ សំអាត អភិបាលរងខេត្ត តំណាងលោកស្បោង សារ៉ាត់ អភិបាលនៃគណៈអភិបាលខេត្ត លោកជិន សារិន អភិបាលក្រុងព្រះសីហនុ ទីប្រឹក្សាសម្តេចធម្មពោធិសាល ជា ស៊ីម និងមានការចូលរួមពីកីឡាករចំនួន១៨ក្រុម ព្រមទាំងបងប្អូនប្រជាពលរដ្ឋ អាជីវករ ពាណិជ្ជករ បណ្តាក្រុមហ៊ុនផ្សេងៗ ក្មួយៗសិស្សានុសិស្ស និស្សិត ដែលស្នេហាវិស័យកីឡាយ៉ាងច្រើនកុះករ ។
លោកអៀម សារិន មន្ត្រីសាលាខេត្តព្រះសីហនុ តំណាងឱ្យកីឡាករទាំង១៨ក្រុម និងជាអ្នករៀបចំការប្រកួតដណ្តើមពានរង្វាន់«ឆ្នេរស្អាត» ក្រុងព្រះសីហនុ ឆ្នាំ២០១២ បានមានមតិស្វាគមន៍ក្នុងពិធីបើកការប្រកួតនោះថា បន្ទាប់ពីទទួលបានការឯកភាពជាគោលការណ៍ពីលោកស្បោង សារ៉ាត់ អភិបាលនៃគណៈអភិបាលខេត្តព្រះសីហនុ តាមខ្លឹមសារលិខិតលេខ១០៥១.អ-ក-១២ ចុះថ្ងៃទី២៣ កក្កដា ឆ្នាំ២០១២ ស្តីពីការរៀបចំកម្មវិធីប្រកួតបាល់ទាត់ដណ្តើមពានរង្វាន់«ឆ្នេរស្អាត» គណៈកម្មការកីឡាបាល់ទាត់ក្នុងនោះមានតំណាងក្រុមហ៊ុនស្រាបៀរអង្គរ និងក្រុមហ៊ុនភេសជ្ជៈ PEPSI ទទួលបានការគាំទ្រពីក្រុមការងារវាយតម្លៃទីក្រុងស្អាតខេត្តព្រះសីហនុ ផង បានជួយសម្របសម្រួលរៀបចំការប្រកួតកីឡានាឱកាសនេះ ។
ការប្រកួតបាល់ទាត់ដណ្តើមពានរង្វាន់នេះមានកីឡាករចំនួន១៨ក្រុមមកពីស្ថាប័នរដ្ឋ គ្រឹះស្ថានសិក្សា អង្គការសង្គមស៊ីវិល និងបណ្តាក្រុមហ៊ុនឯកជនមួយចំនួនសរុបមានចំនួន៤១៤នាក់ ហើយក្នុង១ក្រុមៗមានកីឡាករចំនួន២៤នាក់ ដោយគ្រោងប្រកួតចំនួន៣៩ប្រកួត និងចែកចេញជា៤ពូល មានពូល A,B,C, និង D ។ លោកបានឱ្យដឹងទៀតថា នៅរសៀលថ្ងៃទី៤ សីហា ឆ្នាំ២០១២ ជាថ្ងៃចាប់ផ្តើមបើកការប្រកួតរវាងក្រុមកីឡាករស្ថិតនៅក្នុងពូល A គឺក្រុមសាលាក្រុងព្រះសីហនុ ប្រកួតជាមួយក្រុមសាលាខេត្តព្រះសីហនុ ។ ជាលទ្ធផលតាមលក្ខណៈបច្ចេកទេសរយៈពេល៩០នាទីពេញ ក្រុមទាំង២ស្មើគ្នាដោយស៊ុតបាល់បញ្ចូលទីបាន១គ្រាប់ដូចគ្នា ។
លោកបញ្ជាក់ថា ដោយក្នុងថ្ងៃទី៥ សីហា ឆ្នាំ២០១២ គណៈកម្មការក៏ដូចជាអាជ្ញាកណ្តាលផ្តល់ពេលវេលាដល់ក្រុមកីឡាករមួយចំនួនចូលរួមប្រឡងសញ្ញាប័ត្រទុតិយភូមិ (បាក់ឌុប) ដូច្នេះគណៈកម្មការរៀបចំការប្រកួតបានយកថ្ងៃទី១ សីហា ឆ្នាំ២០១២ ឱ្យក្រុមកីឡាករពូល A ប៊្លូអូឃីត ប្រកួតជាមួយក្រុមកីឡាករពូល A ហ្វធូណា វិញ ហើយជាលទ្ធផលក្រុមកីឡាករ ប៊្លូអូឃីត យកឈ្នះក្រុមកីឡាករហ្វធូណា 1-0 ។
លោកសំ សំអាត អភិបាលរងនៃគណៈអភិបាលខេត្តព្រះសីហនុ បានថ្លែងក្នុងឱកាសនោះថា ក្នុងនាមអាជ្ញាធរដែនដីខេត្តព្រះសីហនុ សូមអំពាវនាវដល់ថ្នាក់ដឹកនាំមន្ទីរ អង្គភាពក្នុងខេត្ត លោក-លោកស្រី នាយក-នាយិកា គ្រឹះស្ថានសិក្សា អង្គការសង្គមស៊ីវិល និងក្រុមហ៊ុនឯកជនទាំងអស់ ធ្វើយ៉ាងណាបំផុសចលនា និងចូលរួមគាំទ្រលើវិស័យកីឡាឱ្យកាន់តែទូលំទូលាយនៅក្នុងអង្គភាពរបស់ខ្លួន ។ ជាពិសេសសកម្មភាពអប់រំកាយ និងកីឡានៅក្នុងសាលារៀននីមួយៗដើម្បីសុខុុមាលភាពរបស់ខ្លួនទាំងផ្លូវកាយ ផ្លូវចិត្ត ផ្លូវបញ្ញា រួមចំណែកកសាងធនធានកីឡាករ កីឡាការិនី ក្នុងចំណោមសិស្សានុសិស្ស និស្សិតដើម្បីលើកស្ទួយវិស័យកីឡារបស់យើងឱ្យមានការអភិវឌ្ឍរីកចម្រើន ។ ការរៀបចំការប្រកួតកីឡាបាល់ទាត់នាពេលនេះ គឺដើម្បីចូលរួមអបអរសាទរឆ្នេរសមុទ្រកម្ពុជា (ឆ្នេរសមុទ្រខេត្តព្រះសីហនុ)ដែលត្រូវបានដាក់បញ្ចូលជាសមាជិកក្លិបឆ្នេរស្អាតលើផ្ទៃរាបអន្តរជាតិ ។
ចំពោះពានរង្វាន់ដែលចំណាត់ថ្នាក់លេខ១ ទទួលបានបន្ទាប់ពីការប្រកួតផ្តាច់ព្រ័ត្រនាថ្ងៃទី៣១ តុលា ឆ្នាំ២០១២ ខាងមុខ មានឈ្មោះថា «ឆ្នេរស្អាត»។ លោកក៏បានផ្តាំផ្ញើដល់ក្រុមកីឡាករទាំងអស់ថា ត្រូវយកចិត្តទុកដាក់អនុវត្តគោលការណ៍បច្ចេកទេសឱ្យបានត្រឹមត្រូវ ។ អាជ្ញាកណ្តាលមិនត្រូវមានភាពលំអៀងឡើយ ឯកីឡាករត្រូវគោរពក្រមសីលធម៌ប្រកួត មានការសាមគ្គីជាមិត្តភាព ភាតរភាព សមភាព ចេះយោគយល់អធ្យាស្រ័យគ្នាទៅវិញទៅមក ៕
ចែករំលែកព័តមាននេះ