រាជធានីភ្នំពេញ ៖ ក្រុមបាល់ទាត់គិរីវង់សុខសែនជ័យ បានលត់ក្រុមភ្នំពេញក្រោន ឱ្យចាញ់ក្នុងលទ្ធផល 3-1 សម្រាប់ការប្រកួតបាល់ទាត់ក្របខណ្ឌ Metfone Cambodian League 2012 នៅលើទីលានពហុកីឡដ្ឋានជាតិ កាលពីរសៀលថ្ងៃសៅរ៍ទី៤ សីហា កន្លងមក ខណៈក្រុមណាហ្គាខប បំបាក់ក្រុមឆ្លាមសមុទ្រ ក្នុងលទ្ធផល 7-0 ។
នៅក្នុងតង់ទី១ ក្រុមភ្នំពេញក្រោន មានឱកាសបណ្តើរបាល់ទៅដល់មុខទីគូប្រកួតបានតិចតួចបំផុត តែទោះបីជាយ៉ាងណា ក៏គេរកបាន១គ្រាប់ដែរ ខណៈក្រុមគិរីវង់សុខសែនជ័យ រកបាន២គ្រាប់នាំមុខមុន ។ ក្រុមភ្នំពេញក្រោន ពេលនេះកំពុងឈរនៅលេខរៀងទី៥ជាបណ្តោះអាសន្ន បន្ទាប់ពីប្រកួតបាន១៦លើក ឈ្នះ៧លើក ស្មើ២ លើក និងចាញ់៧លើក មាន២៣ពិន្ទុ រីឯក្រុមគិរីវង់សុខសែនជ័យ វិញលេងបាន១៦ប្រកួតដូចគ្នា ទើបតែរកបាន១៦ពិន្ទុប៉ុណ្ណោះ ។
ក្រុមណាហ្គាខប ដែលបានបំបាក់ក្រុមឆ្លាមសមុទ្រ ឱ្យចាញ់ក្នុងលទ្ធផល 7-0 នោះ បានធ្វើឱ្យក្រុមរបស់គេឡើងទៅឈរនៅលំដាប់លេខរៀងទី១នៃតារាង ព្រោះលេងបាន១៥ប្រកួតឈ្នះ១០លើក ស្មើ៣លើក និងចាញ់១លើក មាន៣៣ពិន្ទុ ។ រីឯក្រុមឆ្លាមសមុទ្រ វិញ ទំនងជាមិនអាចគេចផុតពីតំបន់កាត់ចោលឡើយ ។
សម្រាប់ការប្រកួតថ្ងៃអាទិត្យទី៥ សីហា ក្រុមបៀលប្រាយយូណាយធីត បានយកឈ្នះលើក្រុមក្រសួងការពារជាតិ ក្នុងលទ្ធផល 3-1 ចំណែកក្រុមអគ្គស្នងការដ្ឋាននគរបាលជាតិ យកឈ្នះក្រុមវេស្ទើន ក្នុងលទ្ធផល 1-0 ។ ក្រុមបៀលប្រាយយូណាយធីត ទោះបីបាត់បង់ខ្សែប្រយុទ្ធឆ្នើម១រូប គឺកីឡាករ BADMUS SURUJUDEEN BOLAJI ពាក់អាវលេខ២៤ ជនជាតិប្រេស៊ីល នៅនាទីទី២០ ដែលបានរងរបួសបាក់កជើងខាងស្តាំត្រូវបានបញ្ជូនទៅកាន់មន្ទីរពេទ្យជាបន្ទាន់ក៏ដោយ ក៏នៅមានឱកាសគ្រប់គ្រងការលេងបានយ៉ាងល្អបំផុត ។ ប្រធានក្រុមរបស់បៀលប្រាយយូណាយធីត ជនជាតិជប៉ុន គឺកីឡាករ ITODAN ពាក់អាវលេខ៣៦ រកបានគ្រាប់បាល់រហូតដល់ទៅ៣គ្រាប់ម្នាក់ឯង ជាពិសេសនៅនាទីទី៨ គេអាចរកបាន១គ្រាប់នាំមុខមុនដោយការស៊ុតបាល់ប៉េណាល់ទី។ លុះចូលដល់តង់ទី២ កីឡាកររូបនេះរកបាន២គ្រាប់បន្ថែមនៅនាទីទី៨៥ និងនាទីទី៩០+២ បន្ទាប់ពីកីឡាករពុំ តុលា របស់ក្រុមក្រសួងការពារជាតិរកបាន១គ្រាប់សងវិញនៅនាទីទី៧៩ ។
ក្រុមបៀលប្រាយយូណាយធីត ពេលនេះស្ថិតនៅលេខរៀងទី៦នៃតារាង ដោយលេងបាន១៥ប្រកួតឈ្នះ៧លើក ស្មើ២លើក និងចាញ់៦លើក មាន២៣ពិន្ទុ ។ រីឯក្រុមក្រសួងការពារជាតិប្រកួតបាន១៦លើក ឈ្នះ៥លើក ស្មើ៥លើក និងចាញ់៦លើក មាន២០ពិន្ទុ ។ ចំណែកក្រុមអគ្គស្នងការដ្ឋាននគរបាលជាតិ បន្ទាប់ពីយកឈ្នះ 1-0 លើក្រុមវេស្ទើន ត្រូវស្ថិតនៅលេខរៀងទី២ ក្នុងតារាងជាបណ្តោះអាសន្ន ក្នុងនោះប្រកួតបាន១៧លើក ឈ្នះ៩លើក ស្មើ៦លើក និងចាញ់២លើក មាន៣៣ពិន្ទុ ។ រីឯក្រុមវេស្ទើន ចាញ់លើកនេះទៀតបែបមិនអាចគេចផុតពីតំបន់កាត់ចោលឡើយ ព្រោះពិន្ទុរបស់គេនាពេលនេះមិនទាន់ងើបរួចពីបាតតារាងនៅឡើយ ៕
ចែករំលែកព័តមាននេះ