ខេត្តពោធិ៍សាត់ ៖ រថយន្តស៊េរីទំនើបមួយគ្រឿងដែលលួចដឹកឈើប្រណីតខុសច្បាប់ត្រូវសមត្ថកិច្ចស្ទាក់ចាប់បានកាលពីថ្ងៃទី៥ សីហា ២០១២ វេលាម៉ោង១១យប់ត្រង់ចំណុចភូមិត្រពាំងរំដេញ ឃុំក្បាលត្រាច ស្រុកក្រគរ ។
លោកវរសេនីយ៍ត្រី ខូយ កុសល នាយការិយាល័យនគរបាលប្រឆាំងបទល្មើសសេដ្ឋកិច្ចខេត្តឱ្យដឹងថា រថយន្តដឹកបទល្មើសនេះម៉ាកតូយ៉ូតា TUNDRA ពណ៌ខ្មៅ គ្មានស្លាកលេខ ។ នៅយប់នោះបន្ទាប់ពីទទួលបានព័ត៌មានពីភ្នាក់ងារភ្លាម កម្លាំងនគរបាលប្រឆាំងបទល្មើសសេដ្ឋកិច្ចខេត្តពោធិ៍សាត់ បានស្ទាក់ចាប់រថយន្តស៊េរីទំនើបខាងលើនេះ នៅចំណុចភូមិត្រពាំងរំដេញ ឃុំក្បាលត្រាច ស្រុកក្រគរ ខណៈពេលកំពុងធ្វើដំណើរលើកំណាត់ផ្លូវជាតិលេខ៥ ក្នុងទិសដៅពីលិចទៅកើត ។ ពេលសមត្ថកិច្ចស្ទាក់ភ្លាមអ្នកបើកបរមិនស្គាល់ឈ្មោះបានឈប់រថយន្ត ហើយរត់គេចខ្លួនបាត់នៅសល់អ្នករួមដំណើរម្នាក់ក៏ចាប់វាយខ្នោះយកទាំងរថយន្ត និងមនុស្សទៅកាន់ស្នងការដ្ឋាននគរបាលខេត្តពោធិ៍សាត់ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ