ហ្វូងចៃទឹកសមុទ្រ (Pelagia Noctiluca)ដែលប្រមូលផ្តុំនៅឆ្នេរសមុទ្រកូស្តា ដេល សូល (Costa Del Sol) ប្រទេសអេស្ប៉ាញ បង្កឱ្យមនុស្សជាង១.០០០នាក់ រងគ្រោះដោយពិសរបស់វា កាលពីខែកក្កដា ។ គេប្រទះឃើញចៃទឹកនៅលើឆ្នេរខ្សាច់ជាច្រើនកន្លែងទៀតកាលពីសប្តាហ៍កន្លងទៅ ។
គណៈកម្មការរៀបចំឆ្នេរ បានចេញបញ្ជាឱ្យបិទឆ្នេរម៉ាឡាហ្គា ភាគខាងត្បូងរបស់អេស្ប៉ាញ ការពារមិនឱ្យមានភ្ញៀវទេសចររងគ្រោះថ្នាក់ពីសត្វមានពិសក្នុងសមុទ្រ ។ អ្នកវិទ្យាសាស្ត្រប្រទះឃើញការរីកដុះដាលយ៉ាងឆាប់រហ័សខុសប្រក្រតី នៃទឹក Pelagia Noctiluca ដោយចៃទឹកពណ៌ស្វាយប្រភេទនេះ អាចបញ្ចេញពិសតាមព្រុយ ។
ក្រសួងទេសចរណ៍អេស្ប៉ាញ បានបន្ទោសលើការនេសាទលើសដែនកំណត់ថា គឺជាមូលហេតុធ្វើឱ្យសត្វកម្ចាត់ចៃទឹកតាមធម្មជាតិដូចជាកន្ធាយ ត្រីធូណា និងត្រីខ្ទោងសមុទ្រធ្លាក់ចុះ ។មូលហេតុផ្សេងទៀត គឺចរន្តខ្យល់ និងចរន្តទឹក បានបោកបក់នាំហ្វូងចៃទឹកមកប្រមូលផ្តុំគ្នាតាមឈូងសមុទ្រ និងឆ្នេរខ្សាច់ ។ ក្រៅពីនេះ សីតុណ្ហភាពដែលកើនខ្ពស់ និងបរិមាណភ្លៀងធ្លាក់តិច ក៏អាចជាមូលហេតុនៃការប្រមូលផ្តុំរបស់ចៃទឹកផងដែរ ។កាលពីខែកក្កដា អាជ្ញាធរអាចដងចៃទឹកដាក់ក្នុងធុងបានដល់ទៅ៧៧០គីឡូក្រាម ក្នុងរយៈពេល១ថ្ងៃ និងបានយកទៅកម្ទេចចោល ។
ចែករំលែកព័តមាននេះ