ខេត្តកំពង់ចាម ៖ កញ្ឆាចំនួន២៤៨ដើម បានត្រូវសមត្ថកិច្ចដកនិងដុតបំផ្លាញចោលកាលពីរសៀលថ្ងៃទី៣ សីហា នៅភូមិ១០មករា ឃុំបុសខ្នុរ ស្រុកចំការលើ ហើយម្ចាស់ដើមកញ្ឆានេះគឺតាប្រាក់ អ៊ុក អាយុ៧៥ឆ្នាំ ក៏ត្រូវបានអប់រំឱ្យបញ្ឈប់ការដាំបន្តទៀតដែរ ។
លោកវរសេនីយ៍ទោ ចាន់ ហោ អនុប្រធានការិយាល័យកណ្តាលយុត្តិធម៌នៃស្នងការដ្ឋាននគរបាលខេត្តថ្លែងថា មុនពេលសមត្ថកិច្ចចុះទៅដុតកម្ទេចចោលនេះគឺមានប្រជាពលរដ្ឋរាយការណ៍មកលោកវរសេនីយ៍ត្រីអុិត សារ៉ា អធិការនគរបាលស្រុកចំការលើ បន្ទាប់ពីបានឃើញកញ្ឆារាប់រយដើមត្រូវបានដាំនៅក្បែរផ្ទះរបស់លោកតាអ៊ុក ។ ក្រោយពីទទួលបានសេចក្តីរាយការណ៍ពីលោកអធិការនគរបាលចំការលើរួចមកលោកវរសេនីយ៍ឯកជឹម សេងហុង ស្នងការរងនគរបាលខេត្តក៏បានចាត់រូបលោក(ចាន់ ហោ) ឱ្យដឹកនាំកម្លាំងសហការជាមួយអាជ្ញាធរមូលដ្ឋានទៅដកបំផ្លាញដំណាំកញ្ឆាទាំងនេះចោល ។ ជាមួយនោះបានអប់រំលោកតាប្រាក់ អ៊ុក ឱ្យបញ្ឈប់ការដាំកញ្ឆាបន្តទៅទៀត បើពុំនោះទេនឹងចាត់វិធានការតាមច្បាប់ ។
តាមការសួរនាំត្រូវបានលោកតាប្រាក់អ៊ុកប្រាប់ថា គាត់ដាំកញ្ឆានេះទុកសម្រាប់ជក់ តាំងតែពីរបបប៉ុលពតបន្តរហូតមកដល់សព្វថ្ងៃ ។ ចំណែកលោកវរសេនីយ៍ទោចាន់ ហោ បញ្ជាក់ថា លោកតាដែលញៀនកញ្ឆានេះមិនមានប្រពន្ធកូនទេ ព្រមទាំងមានជីវភាពក្រទៀតផង ។ នៅថ្ងៃក្រោយនឹងដាក់កម្លាំងតាមឃ្លាំមើលមិនអនុញ្ញាតឱ្យគាត់ដាំរហូតដល់ទៅរាប់រយដើមបែបនេះបន្តទៀតឡើយ តែបើដាំ៣ទៅ៤ដើមទុកស្ងោរមាន់មិនថាអ្វីទេ ។ លោកតាអ៊ុក ក្លាយទៅជាមនុស្សញៀនកញ្ឆាទៅហើយ ដូច្នេះតើគាត់អាចទ្រាំទ្របានដែរឬទេ ពេលគ្មានកញ្ឆាជក់នោះ ៕
ចែករំលែកព័តមាននេះ