ខេត្តកណ្តាល ៖ បុរសម្នាក់បានរងរបួសជាទម្ងន់និងត្រូវបានបញ្ជូនទៅកាន់មន្ទីរពេទ្យកាល់ម៉ែតដើម្បីសង្គ្រោះបន្ទាន់ បន្ទាប់ពីត្រូវប្រពន្ធដែលស្រវឹងចាក់នឹងកាំបិតចិតបន្លែចុងស្រួចចំទ្រូងខាងឆ្វេង ។ ហេតុការណ៍នេះបានកើតឡើងកាលពីវេលាម៉ោង១១ព្រឹកថ្ងៃទី៥ សីហា នៅរោងស្នាក់នៅក្នុងក្រុមហ៊ុនប្រាយវ៉េហ្វើនីឈ័រដែលមានទីតាំងស្ថិតក្នុងភូមិទឹកជា ឃុំពើក ស្រុកអង្គស្នួល ។ កន្លងមក គេធ្លាប់តែឮថា ប្តីស្រវឹងវាយប្រពន្ធ តែពេលនេះស្ត្រីជាប្រពន្ធដែលស្រវឹងបានប្រើហិង្សាទៅលើបុរសជាប្តី វិញ ។
បុរសជាប្តីឈ្មោះសាយ សិលារ័ត្ន អាយុ៤៥ឆ្នាំ រងរបួសទ្រូងខាងឆ្វេងយ៉ាងធ្ងន់ ចំណែកឯប្រពន្ធដែលចាក់ប្តីនោះឈ្មោះជា សុភា អាយុ៣៧ឆ្នាំ ២នាក់ប្តីប្រពន្ធនេះជាកម្មករហាលដំឡូងនៅក្នុងក្រុមហ៊ុនខាងលើ និងមានទីលំនៅភូមិកំពង់សិលា ឃុំកំពង់សិលា ស្រុកស្រែអំបិល ខេត្តព្រះសីហនុ ។ តាមប្រភពព័ត៌មានឱ្យដឹងថា នៅមុនពេលកើតហេតុ បន្ទាប់ពីឈប់សម្រាកពីការងារស្រ្តីជាប្រពន្ធបានផឹកស្រាស្រវឹងជោកជាំហើយក៏រករឿងជេរប្រមាថបុរសជាប្តីដោយគ្មានមូលហេតុ ។ ដោយសារនៅសុខៗត្រូវប្រពន្ធជេរប្រមាថបែបនេះ បុរសជាប្តីក៏ស្តីបន្ទោសវិញបន្តិចបន្តួច ធ្វើឱ្យប្រពន្ធខឹងក៏ទាញកូនកាំបិតចិតបន្លែចុងស្រួចចាក់ទៅលើប្តីចំដើមទ្រូងខាងឆ្វេងបណ្តាលឱ្យរងរបួសយ៉ាងធ្ងន់ ។
មន្ត្រីសមត្ថកិច្ចបានឱ្យដឹងថា ក្រោយពេលកើតហេតុជនរងគ្រោះជាប្តីត្រូវបានបញ្ជូនទៅកាន់មន្ទីរពេទ្យដើម្បីសង្គ្រោះបន្ទាន់ ចំណែកឯស្រ្តីជាប្រពន្ធត្រូវបានចាប់ខ្លួនកសាងសំណុំរឿងបញ្ជូនទៅតុលាការ ។ កន្លងមកតាមការបំភ្លឺពីសាក្សីដែលជាកម្មករធ្វើការជាមួយគ្នាគឺស្រ្តីជាប្រពន្ធរូបនេះតែងតែផឹកស្រាស្រវឹងជេរប្រមាថបុរសជាប្តីស្ទើររាល់ថ្ងៃ ចំណែកឯប្តីមិនសូវតបតទេព្រោះដឹងថាប្រពន្ធរបស់ខ្លួនឱ្យតែពេលផឹកស្រាស្រវឹងម្តងៗតែងតែជេរបញ្ចោរប្តីបែបនេះ មិនតែប៉ុណ្ណោះស្រ្តីរូបនេះធ្លាប់បានប៉ុនប៉ងរត់ចូលឱ្យរថយន្តបុកដើម្បីសម្លាប់ខ្លួនទៀតផង ។
លុះដល់ពេលកើតហេតុ ក៏មិនខុសពីពេលមុនៗដែរ ស្រ្តីរូបនេះពេលផឹកស្រាស្រវឹងក៏ជេរប្រមាថរករឿងប្តីទៀត ហើយដោយអត់ទ្រាំលែងបានបុរសជាប្តីក៏តបតបន្តិចបន្តួចស្រាប់តែត្រូវប្រពន្ធទាញកូនកាំបិតចុងស្រួចចាក់បណ្តាលឱ្យរងរបួសបែបនេះតែម្តង ៕
ចែករំលែកព័តមាននេះ