ខេត្តប៉ៃលិន ៖ បុរសម្នាក់ត្រូវបានគេស្គាល់ថា ជាមន្ត្រីក្រឡាបញ្ជីនៃសាលាដំបូងខេត្តបន្ទាយមានជ័យ ខណៈជិះម៉ូតូងងឹតមុខដួល បណ្តាលឱ្យរងរបួសសន្លប់បាត់ស្មារតីនៅនឹងកន្លែងត្រូវបានក្មួយប្រុសជិះពីក្រោយ និងមិត្តភក្តិរួមដំណើរជាមួយដឹកទៅសង្គ្រោះនៅមន្ទីរពេទ្យបង្អែកខេត្តប៉ៃលិន កាលពីវេលាម៉ោង១និង៣០នាទីរសៀលថ្ងៃទី៥ សីហា ២០១២ ត្រង់ចំណុចផ្លូវបែកជាពីរតាមបណ្តោយផ្លូវជាតិលេខ៥៧ ស្ថិតក្នុងភូមិអូរបេង ឃុំស្ទឹងកាច់ ស្រុកសាលាក្រៅ ។
ជនរងគ្រោះឈ្មោះជា រស់ ភេទប្រុស អាយុ២៨ឆ្នាំ ជាមន្ត្រីក្រឡាបញ្ជីរស់នៅភូមិនិគម ឃុំជ្រោយស្តៅ ស្រុកថ្មគោល ខេត្តបាត់ដំបង ។ ប្រភពព័ត៌មានបានឱ្យដឹងថា នៅព្រឹកថ្ងៃកើតហេតុបុរសរងគ្រោះបានជិះម៉ូតូម៉ាកឌ្រីមសេ ពណ៌ខ្មៅ ស៊េរីឆ្នាំ២០១១ ឌុបក្មួយប្រុសម្នាក់ឈ្មោះផន ទួន អាយុ១៦ឆ្នាំ និងមានមិត្តភក្តិចំនួន៣ម៉ូតូទៀតរួមដំណើរជាមួយទៅលេងនៅផ្សារព្រំ ខេត្តប៉ៃលិន ។ ប្រភពបន្តថា លុះត្រឡប់មកវិញ ជិះដល់កន្លែងកើតហេតុ ស្រាប់តែបុរសរងគ្រោះងងឹតមុខរេចង្កូតម៉ូតូធ្លាក់ទៅក្នុងប្រឡាយគ្មានទឹកនៅខាងស្តាំដៃ បណ្តាលឱ្យដួលផ្កាប់មុខបោកទៅនឹងថ្មនៅក្បែរចិញ្ចើមផ្លូវបាក់ធ្មេញ បែកក្រអូមមាត់ ដេកសន្លប់ស្តូកស្តឹងនៅនឹងកន្លែងតែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ