រាជធានីភ្នំពេញ ៖ ក្រុមយុវជនស្ម័គ្រចិត្តវាស់វែងដីធ្លីជូនប្រជាពលរដ្ឋរបស់សម្តេចតេជោចំនួនជាង៣០០នាក់ បានវិលត្រឡប់មកជួបជុំគ្រួសារក្រោយពេលទទួលបានការអនុញ្ញាតឱ្យឈប់សម្រាករយៈពេល៤ថ្ងៃ បន្ទាប់ពីពួកគេបានបំពេញបេសកកម្មដ៏ថ្លៃថ្លានេះរយៈពេលពេញមួយខែ ។
ក្រុមយុវជនស្ម័គ្រចិត្តដែលបានវិលត្រឡប់ក្នុងជំហានទី២ នេះ គឺមកពីខេត្តចំនួន៥ ក្នុងនោះខេត្តកំពង់ស្ពឺចំនួន៩ក្រុម ស្ទឹងត្រែង៥ក្រុម ព្រះវិហារ៣ក្រុម កំពង់ធំ១០ក្រុម និងកំពង់ឆ្នាំងចំនួន៧ក្រុម ដែលសរុបទាំងអស់ចំនួន៣៩៦នាក់។ ក្នុងពិធីជួបជុំការវិលត្រឡប់នៅទីស្តីការក្រសួងដែនដីនគរូបនីយកម្ម និងសំណង់កាលពីថ្ងៃទី៦ សីហា ២០១២ យុវជន អ៊ុង វីរៈ ជាប្រធានក្រុមលេខ៩០ ដែលដឹកនាំបេសកកម្មក្នុងអណ្តូងប្រេង ឃុំក្រាំងលាវ ស្រុករលាប្អៀរ ខេត្តកំពង់ឆ្នាំង បានថ្លែងថា ក្នុងរយៈពេលពេញមួយខែក្នុងបេសកកម្មរបស់ក្រុមលោក គឺទទួលបានលទ្ធផលគួរជាទីមោទនៈ ក្នុងនោះការងារដែលសម្រេចបានមានដូចជា កំណត់ និងវាស់វែងព្រំប្រទល់គិតជាចំណុចបានចំនួន៨០៥ចំណុច បំពេញសាលាកបត្របានចំនួន៧.១០០ក្បាលដី ដែលស្មើនឹង៧.៨០០គ្រួសារ បញ្ចូលសម្រង់ក្នុងបញ្ជីឈ្មោះម្ចាស់ដីបានចំនួន៧៨០គ្រួសារ គូសផែនទីបាន១.០១៧ក្បាលដី ស្មើនឹង៥៥៨,៩៨ហិកតា កំណត់ព្រំ និងវាស់វែងគិតជាក្បាលដីបា១.១៤៥ក្បាលដី ស្មើនឹង៦៣០គ្រួសារ ។
យុវជនអ៊ុង វីរៈ បន្តថា ក្នុងការសម្រេចបានជាលទ្ធផលក្នុងរយៈពេលពេញមួយខែនេះ គឺដោយបានរួមសហការ និងការយកចិត្តទុកដាក់ពីសំណាក់ប្រជាពលរដ្ឋ និងអាជ្ញាធរគ្រប់លំដាប់ថ្នាក់នៅក្នុងមូលដ្ឋាន ជាពិសេសនោះគឺដោយមានការលើកទឹកចិត្តពីស្ថាប័នជំនាញ និងសម្តេចតេជោ ហ៊ុន សែន នាយករដ្ឋមន្ត្រី ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ