កីឡាករអង់គ្លេសអ៊ែនឌី មូរ៉េដណ្តើមបានជ័យជម្នះដ៏ធំបំផុតនៅក្នុងអាជីពរបស់ខ្លួនក្រោយពីបានយកឈ្នះមេដាយមាសអូឡាំពិកជាលើកទី១លើវិញ្ញាសាវាយកូនបាល់ក្នុងព្រឹត្តិ ការណ៍ប្រកួតកីឡាអូឡាំពិកក្រុងឡុងឆ្នាំ២០១២ ។ ការប្រកួតឯកត្តជនវគ្គផ្តាច់ព្រ័ត្រផ្នែកបុរសនេះត្រូវបានធ្វើនៅទីលាន All England Lawn Tennis and Croquet Clubស្ថិតក្នុងទីក្រុងឡុងប្រទេសអង់គ្លេស កាលពីថ្ងៃអាទិត្យទី៥ ខែ សីហា គឺខណៈដែលព្រឹត្តិការណ៍អូឡាំពិកបានដំណើរការប្រកួតអស់៩ថ្ងៃ ។
ជាមួយនឹងប្រៀបលើទឹកដី មូរ៉េបានបំបាក់ហ្វេដឺរ័រក្នុងលទ្ធផល៣សិតទល់នឹងសូន្យ ៦-២,៦-១និង៦-៤ឈ្នះមេដាយមាសអូឡាំពិកជាលើកទី១និងព្រមទាំងអាចសងសឹកបានទៅនឹងការបរាជ័យរបស់គេក្រោមថ្វីដៃហ្វេដឺរ័រកាលពីវគ្គផ្តាច់ព្រ័ត្រក្របខណ្ឌធំ Wimbledonទៀតផង ។ ជ័យជម្នះលើកនេះ មូរ៉េប្រើពេលតែ៥៦នាទីប៉ុណ្ណោះ ។ កីឡាករវ័យ២៥ឆ្នាំរូបនេះធ្លាប់ត្រូវបានហ្វេដឺរ័របំបាក់ក្នុងវគ្គផ្តាច់ព្រ័ត្រក្របខណ្ឌធំ ចំនួន៣លើករួចមកហើយ ។ ការឈ្នះមេដាយមាសលើកនេះ គឺជាសុបិនមួយដែលក្លាយមកជាការពិតរបស់គេផងដែរ ។ វាជាសមិទ្ធផលដ៏ធំធេងបំផុតសម្រាប់អាជីពរបស់គេក្នុងនាមជាកីឡាករវាយកូនបាល់លំដាប់កំពូលនៅអង់ គ្លេស។
មូរ៉េបានថ្លែងថា ៖«សម្រាប់ខ្ញុំ លេខ១ គឺជាជ័យជម្នះដ៏ធំបំផុតក្នុងជីវិតខ្ញុំ ។ ខ្ញុំធ្លាប់ទទួលបរាជ័យដ៏ជូរចត់ក្នុងអាជីពហើយនេះជាលទ្ធផលល្អមួយដែលអាចទូទាត់បានទៅនឹងការបរាជ័យក្នុងវគ្គផ្តាច់ព្រ័ត្រក្របខណ្ឌធំ Wimbledon»។ សម្រាប់ក្រុមអង់គ្លេសដែលជាម្ចាស់ផ្ទះរៀបចំការប្រកួតលើកនេះ វាជាមេដាយមាសលើកទី១៦ហើយ ។ ដោយឡែកសម្រាប់មូរ៉េ ជ័យជម្នះលើកនេះនាំឱ្យគេក្លាយជាកីឡាករដំបូងគេបន្ទាប់ពី Charles Dixonដែលបានយកឈ្នះមេដាយប្រាក់ក្នុងវិញ្ញាសាប្រកួតឯកត្តជនដូចគ្នានាព្រឹត្តិការណ៍អូឡាំពិកនៅ Antwerpឆ្នាំ១៩២០ ៕
ចែករំលែកព័តមាននេះ