អាជ្ញាធររាយការណ៍កាលពីថ្ងៃទី៥សីហាថា ព្យុះឈ្មោះសាវឡា និងដំរី បង្កការខូចខាតធ្ងន់ធ្ងរក្នុងខេត្ត៧របស់ចិនភាគច្រើនជាខេត្តនៅជាប់ឆ្នេរសមុទ្រ ។ យោងតាមសេចក្តីប្រកាសមួយចេញផ្សាយដោយគណៈកម្មាធិការជាតិកាត់បន្ថយគ្រោះមហន្តរាយនិងក្រសួងកិច្ចការស៊ីវិលចិនថា ខ្យល់បោកបក់យ៉ាងខ្លាំង ទឹកជំនន់និងការហូរភក់ បណ្តាលមកពីព្យុះសាវឡាជាព្យុះទី៩ប្រចាំឆ្នាំបណ្តាលឱ្យមនុស្សស្លាប់៦នាក់ បាត់ខ្លួន២នាក់ ហើយញ៉ាំងឱ្យមានការជម្លៀសមនុស្សចេញប្រមាណជា១,០៣លាននាក់ ក្នុងខេត្តយ៉ាងស៊ូ ហ្សេយ៉ាង ហ្វូជាន យ៉ាងស៊ី និងសានដុង ។
ម្យ៉ាងវិញទៀតខេត្តលីអាវនីញ និងខេត្តហុឺបីរងការប៉ះពាល់ដោយទឹកជំនន់បណ្តាលមកពីព្យុះឈ្មោះដំរី ជាព្យុះទី១០ប្រចាំឆ្នាំ ។ មនុស្សប្រមាណជា១,៤៦លាននាក់ នៅខេត្តលីអាវនីញ រងការប៉ះពាល់ដោយភ្លៀងធ្លាក់ខ្លាំងនិងទឹកជំនន់ដែលបណ្តាលឱ្យមនុស្សស្លាប់ម្នាក់ហើយមនុស្ស៥នាក់បាត់ខ្លួន ។ គេហដ្ឋានជាង១០.០០០ខ្នង នៅលីអាវនីញ ត្រូវរលំបាក់ ហើយផ្ទះ១៧.០០០ខ្នងទៀតរងការខូចខាត រួចមនុស្ស១៣៨.០០០នាក់ ជម្លៀសចេញបណ្តោះអាសន្ន ។
នៅខេត្តហ៊ឺបី មនុស្សម្នាក់ស្លាប់ហើយម្នាក់ទៀតបាត់ខ្លួន ចំណែកមនុស្ស១៥១.០០០នាក់ត្រូវជម្លៀសចេញពីផ្ទះមកការខូចខាតបណ្តាលមកពីព្យុះឈ្មោះដំរី ។ សរុបមនុស្ស២,៤២លាននាក់ ក្នុងខេត្តនោះរងការប៉ះពាល់ដោយសារព្យុះនេះ។ ផ្ទះប្រមាណនជា៩.៩០០ខ្នងត្រូវបំផ្លាញ ហើយ១០៤.០០០ខ្នងទៀតរងការខូចខាតដោយសារទឹកជំនន់ ៕
ចែករំលែកព័តមាននេះ