ADផ្ទាំងផ្សព្វផ្សាយពាណិជ្ជកម្ម

ប្រជាពលរដ្ឋឃុំស្រយ៉ង់ ស្រុកគូលែន ចោទអាជ្ញាធរហាមឃាត់ក្រុមយុវជនស្ម័គ្រចិត្តមិនឱ្យវាស់ដីជូនប្រជាពលរដ្ឋ

13 ឆ្នាំ មុន

០៦ ខែ សីហា ឆ្នាំ ២០១២ ម៉ោង ០១:៤៨

រាជធានីភ្នំពេញ ៖ ប្រជាពលរដ្ឋប្រមាណជា២០០នាក់ តំណាងឱ្យ៣៧០គ្រួសារមកពីភូមិស្រយ៉ង់ខាងជើង និងខាងត្បូងឃុំស្រយ៉ង់ ស្រុកគូលែន ខេត្តព្រះវិហារ បានចោទអាជ្ញាធរស្រុកគូលែន និងប្រធានមន្ទីរសុរិយោដីថា រារាំងក្រុមយុវជនស្ម័គ្រចិត្តមិនឱ្យវាស់វែងដីជូនប្រជាពលរដ្ឋទើបនាំគ្នាមកប្រមូលផ្តុំក្រោមដើមពោធិ៍មុខ វត្តបទុមវត្តី ស្ថិតក្នុងសង្កាត់ចតុមុខ ខណ្ឌដូនពេញ កាលពីព្រឹកថ្ងៃទី៦ សីហា ២០១២ ដើម្បីសុំកិច្ចអន្តរាគមន៍ឱ្យសម្តេចតេជោ ហ៊ុន សែន ផ្តល់កម្មសិទ្ធិដីធ្លីស្របច្បាប់ ព្រោះអស់ជំនឿលើអាជ្ញាធរខេត្ត ។

ក្នុងញ្ញត្តិតវ៉ាប្រជាពលរដ្ឋបានសុំឱ្យសម្តេចអគ្គមហាសេនាបតីតេជោ ហ៊ុន សែន ជួយអន្តរាគមន៍ទៅអាជ្ញាធរខេត្តព្រះវិហារ ឱ្យបញ្ឈប់ការឈូសឆាយដីស្រែចម្ការ និងសុំឱ្យសម្តេចជួយសម្រួលដីធ្លីរបស់ប្រជាពលរដ្ឋក្នុងភូមិស្រយ៉ង់ ខាងជើង និងខាងត្បូង កាត់ចេញពីដីកាដកហូតលេខ៤៨, ៤៩, ៥៣, ៥៤ របស់អាជ្ញាធរខេត្តព្រះវិហារ ដើម្បីឱ្យប្រជាពលរដ្ឋអាចរស់នៅស្របច្បាប់ ព្រោះប្រជាពលរដ្ឋបានមករស់នៅក្នុងភូមិខាងលើនេះជាង១០ឆ្នាំមកហើយ ។