លទ្ធផលការសិក្សាស្រាវជ្រាវរបស់អ្នកស្រាវជ្រាវថៃ ដែលចុះផ្សាយក្នុងឯកសារDiabetes Careបញ្ជាក់ថាការទទួលសារធាតុ«ឃ័រឃ្យូមីន»(Curcumin) ជាប្រចាំរៀងរាល់ថ្ងៃក្នុងរយៈពេល៩ខែ អាចការពារការកើតជំងឺទឹកនោមផ្អែមក្នុងចំណោមមនុស្សដែលជិតឈានទៅរកការកើតជំងឺទឹកនោមផ្អែម(Prediabetes) ។ ពោលគឺអ្នកដែលមានកម្រិតជាតិស្ករក្នុងឈាមខ្ពស់ដែលអាចវិវត្តន៍ទៅកើត ជាទឹកនោមផ្អែមប្រភេទទី២(Type 2 diabetes)។
«ឃ័រឃ្យូមីន»ជាសារធាតុផ្សំក្នុងមើមល្មៀត ដោយការស្រាវជ្រាវពីអតីតកាលឃើញថាសារធាតុប្រភេទនេះអាចប្រឆាំងនឹងការរលាក និងការពារមិនឱ្យកោសិកាទទួលការបំផ្លាញដោយសារធាតុពុលក្នុងរាងកាយដោយយុទ្ធសាស្ត្រទាំង២នេះមានជំនឿថា អាចជាកក្តាបង្កឱ្យកើតជំងឺដ៏កាចសាហាវ រួមទាំងជំងឺទឹកនោមផ្អែមប្រភេទ២ ។
លោកស៊ុមឡាក ជីងសាម៉ាន ប្រធានអ្នកស្រាវជ្រាវពីមហាវិទ្យាល័យ«ស្រ៊ីណាគ្រីន ថារ៉ាវីរ៉ូត ណាក់ខនណាយុក»បញ្ជាក់ថា «ដោយសារតែគុណប្រយោជន៍ និងសុវត្ថិភាពនៃសារធាតុប្រភេទនេះ យើងបានសន្និដ្ឋានថាសារធាតុចំរាញ់ពីឃ័រឃ្យូមីន អាចប្រើសម្រាប់បំបាត់អាការជំងឺទឹកនោមផ្អែមបាន»។
ការសិក្សាស្រាវជ្រាវប្រភេទនេះ បានប្រមែប្រមូលទិន្នន័យពីមនុស្សវ័យចំណាស់ចំនួន២៤០នាក់ ដែលស្ថិតក្នុងស្ថានភាពជិតកើតជំងឺទឹកនោមផ្អែម ដោយកំណត់ឱ្យអ្នកខ្លះត្រូវទទួលបានសារធាតុឃ័រឃ្យូមីន ប្រភេទគ្រាប់ ខ្លះទៀតទទួលទានប្រភេទថ្នាំក្លែងក្លាយ(Placebo)ដោយក្រុមដែលទទួលទានឃ័រឃ្យូមីន នឹងបានទទួលឱសថគ្រាប់ដែលមានសារធាតុឃ័រឃ្យូមីនចំណុះ២៥០មីល្លីក្រាមចំនួន៦គ្រាប់ក្នុងមួយថ្ងៃ ។
ក្រោយពីឆ្លងផុតរយៈពេល៩ខែ ក្រុមដែលទទួលទានថ្នាំក្លែងក្លាយ១៩ក្នុងចំណោម១១៦នាក់ កើតជំងឺទឹកនោមផ្អែមប្រភេទ២ ខណៈពេលក្រុមទទួលទានសារធាតុឃ័រឃ្យូមីន១១៩នាក់គ្មាននរណាម្នាក់កើតជំងឺ ។ក្រុមអ្នកស្រាវជ្រាវបានរកឃើញថា សារធាតុឃ័រឃ្យូមីន នឹងជួយកែសម្រួលដំណើរការរបស់កោសិកា«បេតា»ជាប្រភេទកោសិកាថ្លើម ដែលបំពេញតួនាទីជាអ្នកបង្ហូរសារធាតុអាំងស៊ុយលីន មករំលាយជាតិស្ករ និងគុណសម្បត្តិផ្នែកការប្រឆាំងរលាករបស់ឃ័រឃ្យូមីន អាចជួយការពារមិនឱ្យកោសិកា«បេតា»ត្រូវបំផ្លាញ ។
ទោះជាយ៉ាងណាក៏ដោយ លោកស្រីខុនស្តេន ប្រោន រិក អ្នកជំនាញផ្នែកស្រាវជ្រាវទឹកនោមផ្អែមបានបញ្ជាក់ថា «ទោះបីជាលទ្ធផលស្រាវជ្រាវនឹងមាននិន្នាការខ្ពស់ ប៉ុន្តែក៏នៅមានសំណួរជាបន្តបន្ទាប់យ៉ាងច្រើន »។ ខណៈពេលលោកស្រីប្រោនរិក បានបញ្ជាក់ថា ការងារស្រាវជ្រាវនេះចំណាយពេលត្រឹមតែ៩ខែ ខណៈពេលលទ្ធផលស្រាវជ្រាវផ្សេងៗជាច្រើនទៀតបានចំណាយពេលយូរ និងប្រើក្រុមគំរូជាច្រើនឃើញថាការបន្ថយការឡូរី និងហាត់ប្រាណក៏អាចការពារ ឬពន្យារពេលការកើតជំងឺទឹកនោមផ្អែមប្រភេទ២នៅក្នុងក្រុមមនុស្សប្រថុយប្រថានបានដូចគ្នា ៕
ចែករំលែកព័តមាននេះ