រាជធានីភ្នំពេញ ៖ នារីវ័យក្មេងរូបស្រស់ម្នាក់រៀនបើករថយន្តស្ទើរភ្លើងទៅកៀររ៉ឺម៉កម៉ូតូឈប់ចតនៅចិញ្ចើមផ្លូវ បណ្តាលឱ្យរ៉ឺម៉កម៉ូតូវេរទៅបោកលើម៉ូតូអាយខនដួលគរលើម៉ូតូធុនធំមួយគ្រឿងទៀតនៅតាមវិថីសុធារស សង្កាត់ទន្លេបាសាក់ ខណ្ឌចំការមន កាលពីវេលាម៉ោង៩និង៥០នាទីយប់ថ្ងៃទី៥ សីហា ។
គ្រោះថ្នាក់ចរាចរណ៍ខាងលើ មិនបណ្តាលឱ្យនរណាម្នាក់រងរបួសទេ គ្រាន់តែខូចខាតម៉ូតូតិចតួចប៉ុណ្ណោះ។ បន្ទាប់ពីបុកភ្លាមរថយន្តនោះបានឈប់ចុះមកនិយាយថា ពួកគេនឹងចេញសងការខូចខាតទាំងអស់ ប៉ុន្តែពេលកំពុងជជែកវែកញែកគ្នាចុះឡើង ស្រាប់តែនារីអ្នកបើករថយន្តហុចកូនសោរថយន្តទៅឱ្យបុរសម្នាក់ហើយនាំគ្នារត់ឡើងលើរថយន្តបើកចេញទៅបាត់ធ្វើឱ្យម្ចាស់ម៉ូតូដែលខូចខាតនាំគ្នាជិះដេញតាម តែរថយន្តនោះព្យាយាមបើកគេចចុះឡើង រួចទម្លាក់នារីនោះចុះពីលើរថយន្តបើកបន្តទៅមុខទៀតបាត់ ។
បន្ទាប់ពីដេញរថយន្តអត់ទាន់ម្ចាស់រ៉ឺម៉កម៉ូតូ និងម៉ូតូពីរគ្រឿងទៀតដែលដួលរងការខូចខាតនោះ ក៏មិនបានទាមទារសំណង់ពីខាងណាដែរ ដោយសារអ្នកទាំងអស់គ្នាសុទ្ធតែជាជនរងគ្រោះដូចគ្នា ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ