រាជធានីភ្នំពេញ ៖ រថយន្តកាមរីស៊េរី៩១ ពណ៌ឈាមជ្រូក មានស្លាកលេខរាជរដ្ឋាភិបាលជិះគ្នា២នាក់ ជួបគ្រោះថ្នាក់ចរាចរណ៍បុកគ្នាជាមួយម៉ូតូម៉ាកឌ្រីមសេ១២៥ ស៊េរី២០០៦ ពណ៌ក្រហម មួយគ្រឿងបណ្តាលឱ្យស្ត្រីជាអាជីវករលក់បន្លែនៅផ្សារធំទួលសង្កែ ហៅផ្សារសាំហាន់ ម្នាក់រងរបួសបាក់ជើងឆ្វេង ចំណែករថយន្តបង្កព្យាយាមបើករត់គេចខ្លួនទាំងស្រវឹងដាបត្រូវប្រជាពលរដ្ឋនាំគ្នាដេញចាប់បានវាយបែកក្បាល។
គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៧និង១០នាទីយប់ថ្ងៃទី៥ សីហា ២០១២ នៅមុខផ្ទះលេខ៥៥ ផ្លូវលេខ៩៣ សង្កាត់ស្រះចក ខណ្ឌដូនពេញ។ រថយន្តបង្កត្រូវប្រជាពលរដ្ឋដេញចាប់បាននៅក្នុងវត្តទួលសង្កែ សង្កាត់ទួលសង្កែ ខណ្ឌឫស្សីកែវ ។ ស្ត្រីរងគ្រោះឈ្មោះមៀច សុខុន អាយុ៣៤ឆ្នាំ ជាអាជីវករលក់បន្លែនៅផ្សារធំទួលសង្កែ ហៅផ្សារសាំហាន់ មានទីលំនៅឃុំស្វាយជ្រុំ ស្រុកខ្សាច់កណ្តាល ខេត្តកណ្តាល រងរបួសបាក់ជើងឆ្វេងត្រូវបានរថយន្តដឹកបញ្ជូនទៅកាន់មន្ទីរពេទ្យកាល់ម៉ែត ។ រីឯជនរងគ្រោះដែលត្រូវប្រជាពលរដ្ឋស្ទាក់វាយនោះក៏បញ្ជូនទៅកាន់មន្ទីរពេទ្យកាល់ម៉ែតដែរ ចំណែករថយន្ត និងអ្នកបើកបរព្រមទាំងម៉ូតូត្រូវបានបញ្ជូនទៅកាន់ការិយាល័យចរាចរណ៍ផ្លូវគោក ដើម្បីដោះស្រាយតាមច្បាប់ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ