ប៉ូលិសមូលដ្ឋានរាយការណ៍ថា មនុស្សយ៉ាងតិច៧នាក់ស្លាប់កាលពីថ្ងៃទី៥សីហាក្នុងការបាញ់ប្រហារនៅព្រះវិហារមួយរបស់ពួកស៊ិកក្នុងទីក្រុង OAK CREEK រដ្ឋវីស្កុនស៊ីន សហរដ្ឋអាមេរិក ។ក្នុងពេលជួបជាមួយសារព័ត៌មានអធិការប៉ូលិសលោក BRADLEY WENTLADT ថ្លែងថា គេបានទាញយកសាកសពមនុស្ស៤នាក់ចេញពីខាងក្នុងព្រះវិហារហើយសាកសពមនុស្ស៣នាក់ទៀតស្ថិតនៅខាងក្រៅអគារ ។
លោកបន្តថាក្នុងចំណោមអ្នកស្លាប់នៅខាងក្រៅ ម្នាក់ជាជនវាយប្រហារ ។ ការវាយប្រហារនេះក៏បណ្តាលឱ្យមនុស្ស៣នាក់ត្រូវរបួសធ្ងន់ដែរ ក្នុងនោះមាននាយប៉ូលិសម្នាក់ដែលបានសម្លាប់ខ្មាន់កាំភ្លើង។ នាយប៉ូលិសរូបនេះត្រូវគ្រាប់កាំភ្លើងជាច្រើនគ្រាប់ពេលបាញ់តគ្នា ។
យោងតាមសាក្សីទាំងឡាយដកស្រង់សំដីដោយសារព័ត៌មានថា មនុស្សជាច្រើនសិបនាក់ស្ថិតក្នុងព្រះវិហារនោះពេលមានការបាញ់ប្រហារ។ ប៉ូលិសកំពុងស្រាវជ្រាវចង់ដឹងថា តើមានមនុស្សដទៃៗទៀតចូលរួមក្នុងការវាយប្រហារនេះដែរឬយ៉ាងណា ៕
ចែករំលែកព័តមាននេះ