រាជធានីភ្នំពេញ ៖ នាងគង់ សុផា ហៅបុប្ផា ជាតារាកាយវិការខារ៉ាអូខេ និងជាតារាបង្ហាញម៉ូដ បានរៀបការនៅថ្ងៃទី៦ សីហា នេះជាមួយបុរសអាណិកជននៅសហរដ្ឋអាមេរិក។អ្វីដែលគួរឱ្យចាប់អារម្មណ៍សម្រាប់អាពាហ៍ពិពាហ៍នេះ គឺកូនកំលោះ កូនក្រមុំ បានរួមរស់ជាមួយគ្នាមានកូនស្រីម្នាក់អាយុ៤ឆ្នាំទៅហើយ ។
នាងគង់ សុផា ឱ្យដឹងថា នាងស្គាល់ស្វាមីរបស់នាងលោក លាង ខេងហួរ នៅឆ្នាំ ២០០៥ តាមរយៈផលិតកម្មខេមរៈ ដែលហៅនាងទៅថតកាយវិការខារ៉ាអូខេ ហើយម្ចាស់ផលិតកម្មត្រូវជាប្អូនប្រុសរបស់លោក ។ ស្វាមីរបស់នាង អាយុ៤៨ឆ្នាំ ជាបុរសពោះម៉ាយមានកូន២នាក់នៅសហរដ្ឋអាមេរិក ។ ក្រោយពីបានស្គាល់គ្នាមួយរយៈមក ពួកនាងក៏ស្រឡាញ់គ្នា ហើយសម្រេចរៀបចំពិធីភ្ជាប់ពាក្យនៅឆ្នាំ ២០០៧ ។ បន្ទាប់មកពួកនាងរស់នៅជាមួយគ្នារហូតបានកូនស្រីម្នាក់ដែលពេលនេះមានអាយុ៤ឆ្នាំ ។ ក្រៅពីនេះ នាងមានកូនប្រុសចិញ្ចឹមអាយុ៩ឆ្នាំម្នាក់ទៀត ។
តារាសម្តែងរូបនេះអះអាងថា នាងរស់នៅជាមួយគ្នាមុនរៀបការបែបនេះ មិនមែនបានន័យថា មិនគោរពប្រពៃណីទំនៀមទម្លាប់ខ្មែរទេ តែនាងចង់ធ្វើឱ្យប្លែកពីអ្នកសិល្បៈដទៃទៀត ។ ម្យ៉ាងទៀតនាងចង់មានកូនសិន ដើម្បីឱ្យគេបានឃើញឪពុកម្តាយរៀបការ និងចង់ឱ្យកូនធ្វើជាកូនអណ្តើកនាំឪពុកជាកូនកំលោះបីផ្កាស្លាចូលរោងការ ។ ពិធីមង្គលការរបស់នាងបុប្ផា រៀបចំធ្វើឡើងនៅផ្ទះរបស់នាងក្នុងសង្កាត់បឹងទំពុន ខណ្ឌមានជ័យ។ កូនបង្កើត និងកូនចិញ្ចឹមរបស់តារាសម្តែងរូបនេះ ត្រូវបានចាត់ឱ្យធ្វើជាកូនអណ្តើកក្នុងពិធីរៀបអាពាហ៍ពិពាហ៍របស់នាង ។ ភ្ញៀវជាង៤០០នាក់ ក្នុងនោះមានសិល្បករ សិល្បការិនីប្រមាណ២០០នាក់ត្រូវបានអញ្ជើញឱ្យចូលរួមក្នុងពិធីជប់លៀងមង្គលការនាងគង់ បុប្ផា នៅវិមានចរណៃ ។
នាងគង់ សុផា ហៅបុប្ផា មានវ័យ៣០ឆ្នាំ ស្រុកកំណើតនៅស្រុកស្អាង ខេត្តកណ្តាល និងមានបងប្អូន៧នាក់ ក្នុងនោះប្រុស៣នាក់ ចំណែករូបនាងជាកូនទី៣ក្នុងគ្រួសារកសិករ ។ ដោយសារតែមាននិស្ស័យស្រឡាញ់សិល្បៈ នៅឆ្នាំ២០០២ នាងបុប្ផា បានមករស់នៅភ្នំពេញ ហើយចូលប្រឡូកក្នុងវិស័យសិល្បៈសម្តែងកាយវិការខារ៉ាអូខេ បង្ហាញម៉ូដ និងភាពយន្ត ។នាងគង់ សុផា ឱ្យដឹងថា ក្នុងរយៈពេល១០ឆ្នាំកន្លងមក នាងចូលរួមសម្តែងភាពយន្តបានប្រហែលជាង២០រឿង ក្នុងនោះដំបូងគេគឺរឿង«ក្រមុំប៉េងប៉ោះកំលោះត្រីឆ្អើរ» និងរឿងចុងក្រោយគឺរឿង«ព្រះបាទជ័យវរ័្មនទី៧» ដោយនាងសម្តែងជាតួអង្គព្រះនាងឥន្ទ្រទេវី ។ នៅពេលមានកេរ្តិ៍ឈ្មោះល្បីគួរសមហើយនោះ នាងគង់ សុផា មានឱកាសទៅសម្តែងនៅប្រទេសបារាំង សិង្ហបុរី ម៉ាឡេស៊ី និងបណ្តាប្រទេសអាស៊ីមួយចំនួនទៀត ។
នាងគង់ សុផា បញ្ជាក់ថា ក្រោយពីរៀបការរួចនាងនិងស្វាមីមានគម្រោងយកកូនម្នាក់ទៀតក្នុងឆ្នាំនេះ គឺកូនស្រីក៏បានកូនប្រុសក៏បាន តែបើក្នុងឆ្នាំនេះមិនមានទេ គឺនាងឈប់យកកូនទៀតហើយ ។ នាងគ្មានគម្រោងទៅរស់នៅជាមួយស្វាមីនៅឯសហរដ្ឋអាមេរិកទេ ព្រោះនាងមិនចេះរស់នៅប្រទេសណាក្រៅពីមាតុភូមិកំណើតរបស់ខ្លួន ដូច្នេះហើយពេលនឹកគ្នានាងអាចទៅលេង ឬស្វាមីមកលេងនាងវិញ ។ ចំពោះអាជីពសិល្បៈវិញ នាងនៅតែបន្តដដែល គឺមិនបោះបង់ទេ ៕
ចែករំលែកព័តមាននេះ