ខេត្តបន្ទាយមានជ័យ ៖ ដោយសារតែរថយន្តយក្សជាច្រើនគ្រឿងដែលដឹកឈើ និងទំនិញលើសទម្ងន់បានបំផ្លាញផ្លូវជាតិលេខ៥ និងលេខ៦ ទើបកាលពីវេលាទៀបភ្លឺថ្ងៃទី១ សីហា កន្លងទៅក្រុមជញ្ជីងចល័តពិសេសរបស់ក្រសួងសាធារណការនិងដឹកជញ្ជូនបានប្រើវិធានការក្តៅឆ្មក់ថ្លឹងរថយន្ត ត្រង់ចំណុចផ្លូវបំបែកជា៣ក្នុងទីរួមក្រុងសិរីសោភ័ណ ។
តាមក្រុមការងារថ្លឹងរថយន្តចល័តពិសេសរបស់ក្រសួងសាធារណការនិងដឹកជញ្ជូនបានឱ្យដឹងថា ក្រុមការងារនេះ គឺជាក្រុមការងារចម្រុះមកពីគ្រប់ស្ថានីយថ្លឹងរថយន្តគ្រប់ទីកន្លែងរបស់ខេត្តនីមួយៗ ជំនួសឱ្យស្ថានីយចល័តតាមបណ្តាខេត្តទូទាំងប្រទេស ។ ដោយឡែក ខេត្តបន្ទាយមានជ័យក្រុមចល័តពិសេសរបស់ក្រសួងសាធារណការបានយកទីតាំងផ្លូវបំបែកជា៣នៅសង្កាត់កំពង់ស្វាយ ក្រុងសិរីសោភ័ណ ព្រោះថាចំណុចផ្លូវនេះជាកន្លែងចេញពីខេត្តបន្ទាយមានជ័យឆ្ពោះទៅខេត្តសៀមរាប និងខេត្តបាត់ដំបងតាមផ្លូវជាតិលេខ៥ និងលេខ៦ ។
ក្នុងការចុះថ្លឹងរថយន្តចល័តនេះ សមត្ថកិច្ចឃាត់រថយន្តបាន១១គ្រឿង សុទ្ធសឹងជារថយន្តយីឌុបធុនធំ ហើយសុទ្ធតែដឹកលើសទម្ងន់ដែលច្បាប់បានកំណត់ ។ ជាក់ស្ដែង គ្រាន់តែរថយន្តដឹកឈើចំនួន២គ្រឿង ដែលមានអ្នករត់ការឈ្មោះហេង ដឹកឆ្លងកាត់ខេត្តបន្ទាយមានជ័យតាមផ្លូវជាតិលេខ៦ ក្នុងមួយគ្រឿងដែលផ្ទុកឈើ១៩ម៉ែត្រគូប គឺលើសទម្ងន់ដល់ទៅ២០តោន ហើយរថយន្តដឹកឈើមួយគ្រឿងទៀតដែលផ្ទុកពេញហើយលៀនចេញក្រៅទ្រុង គឺលើសទម្ងន់រហូតដល់ទៅ២៥តោន ។ ចំពោះរថយន្តដែលដឹកកសិផលក៏ដូចជារថយន្តដឹកទំនិញឯទៀត ដែរ គឺលើសពី៥តោន ទៅ១០តោន ។
ជាមួយនឹងការដឹកលើសទម្ងន់បែបនេះ ពិសេសរថយន្តដឹកឈើរបស់ក្រុមហ៊ុនមួយចំនួនដែលមានច្បាប់ និងរថយន្តលួចដឹកឈើចូលខេត្តបន្ទាយមានជ័យ ដែលគ្មានច្បាប់ ក្នុងមួយយប់ៗរាប់សិបគ្រឿងឆ្លងកាត់ខេត្តនេះ គឺសុទ្ធតែដឹកលើសទម្ងន់ទាំងអស់ ធ្វើឱ្យកំណាត់ផ្លូវជាតិលេខ៦ពីសៀមរាបមកបន្ទាយមានជ័យរងការខូចខាតរាប់សិបកន្លែង ។ ពិតជាមានការភ្ញាក់ផ្អើលពេកណាស់ ពេលក្រុមការងារថ្លឹងជញ្ជីងចល័ត មកឆ្មក់អនុវត្តទើបដឹងថាខេត្តបន្ទាយមានជ័យមានបទល្មើសព្រៃឈើឆ្លងកាត់ដែរ មិនមែនមានតែទំនិញទេ ។ ការថ្លឹងរថយន្តទាំង១១គ្រឿងឃើញថា លើសទម្ងន់ពិតមែន រួចហើយក្រុមការងារបានបញ្ជូនរថយន្តទាំងអស់យកទៅមន្ទីរសាធារណការខេត្ត ដើម្បីធ្វើការផាកពិន័យទៅតាមច្បាប់ ។
គួរបញ្ជាក់ថា ស្ថានីយថ្លឹងរថយន្តអចល័តមួយកន្លែងស្ថិតនៅភូមិកូនដំរី ក្នុងខេត្តបន្ទាយមានជ័យ ដែលរងគ្រោះដោយសាររថយន្តដឹកអេតចាយបុកទម្លាយកាលពីប៉ុន្មានខែមុនក៏បានស្ថាបនារួចរាល់ហើយដែរ ប៉ុន្តែរថយន្តដឹកទំនិញទាំងនោះមិនបានចូលថ្លឹងលើជញ្ជីងឱ្យបានត្រឹមត្រូវទេ គឺអ្នកបើកបរពេលធ្វើដំណើរដល់មុខស្ថានីយតែងបង្អង់ល្បឿនបន្តិចស្វាគមន៍មន្រ្តីជំនាញនៅទីនោះ រួចក៏បន្តដំណើរទៅមុខទៀត ។ បើតាមម្ចាស់រថយន្ត និងអ្នកដឹកទំនិញនិយាយថា ពួកគេមិនចង់ដឹកលើសទេ ព្រោះវាខូចទាំងផ្លូវ ទាំងរថយន្ត តែបើគេដឹកត្រឹមត្រូវវាមិនចំណេញ ព្រោះត្រូវបង់លុយតាមផ្លូវហូរហែប្រៀបដូចរកបានពីក្អែកចែកតាវៅ ៕
ចែករំលែកព័តមាននេះ