ខេត្តបន្ទាយមានជ័យ ៖ នៅព្រឹកថ្ងៃទី២ មីនាកន្លងមកនេះគណៈប្រតិភូអគ្គនាយកដ្ឋានកាំកុងត្រូលក្រសួងពាណិជ្ជកម្មដឹកនាំដោយលោកបណ្ឌិតម៉ក់ ពេជ្ជរិទ្ធ ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋានកាំកុងត្រូលក្រសួងពាណិជ្ជកម្មបានដឹកនាំប្រតិភូមួយក្រុមដែលមានអគ្គនាយករង ប្រធាន អនុប្រធានសាខា និងមន្ត្រីក្រោមឱវាទមកពីគ្រប់ខេត្ត-ក្រុងក្នុងព្រះរាជាណាចក្រកម្ពុជា ទៅសួរសុខទុក្ខ និងពាំនាំអំណោយដ៏ច្រើន សន្ធឹកសន្ធាប់ រួមទាំងថវិកាចែកជូនកម្លាំងជួរមុខនៅទីបញ្ជាការកងការពារព្រំដែនគោកលេខ៥០៣ ដែលមានទីតាំងស្ថិតនៅភ្នំខ្លែងពណ៌ ឃុំស្លក្រាម ស្រុកស្វាយចេក ខេត្តបន្ទាយមានជ័យ ។
ក្នុងឱកាសនោះគេសង្កេតឃើញមានវត្តមានលោកឧត្តមសេនីយ៍ទោប៊ុន សេង ទីប្រឹក្សាផ្ទាល់សម្តេចតេជោ ហ៊ុន សែន និងជាមេបញ្ជាការយោធភូមិភាគទី៥ ព្រមទាំងឧត្តមសេនីយ៍មេបញ្ជាការរងយោធភូមិភាគ និងជាគណៈបញ្ជាការឯកភាព ទិសទី១ ខេត្តបន្ទាយមានជ័យ ផងដែរ ។
លោកវរសេនីយ៍ឯកសាយ សុវណ្ណារ៉េត មេបញ្ជាការកងការពារព្រំដែនគោកលេខ៥០៣ បានថ្លែងអំណរគុណចំពោះគណៈប្រតិភូរបស់អគ្គនាយកដ្ឋានកាំក្រុងត្រូលក៏ដូចជាលោកឧត្តមសេនីយ៍ទោមេបញ្ជាការយោធភូមិភាគទី៥ មេបញ្ជាការរងដែលចុះមកសួរសុខទុក្ខ និងផ្តល់អំណោយដល់កម្លាំងក្នុងវរៈរបស់លោកដែលកំពុងបំពេញភារកិច្ចនៅជួរមុខតាមបណ្តោយព្រំដែន ។ លោកមេបញ្ជាការវរៈបានថ្លែងអំណរគុណយ៉ាងជ្រាលជ្រៅចំពោះការជួយឧបត្ថម្ភរបស់អគ្គនាយកដ្ឋានកាំកុងត្រូលដែលជាដៃគូសម្ព័ន្ធមេត្រីភាពនារយៈពេលកន្លងមករហូតដល់បច្ចុប្បន្នដែលមានទាំងសំភារ និងថវិកាជួយដល់អង្គភាពរបស់លោកសម្រាប់កសាងអង្គភាព ក៏ដូចជាការផ្គត់ផ្គង់កម្លាំងកំពុងបំពេញភារកិច្ចការពារខ្សែបន្ទាត់ព្រំដែន ក៏ដូចជាការការពារជាតិ ការពារបូរណភាពទឹកដីនៃ ព្រះរាជាណាចក្រកម្ពុជា ។
លោកបន្តថា ការសួរសុខទុក្ខ និងពាំនាំអំណោយផ្តល់ជូនកម្លាំងជួរមុខនេះ ជាការបញ្ជាក់ឱ្យឃើញនូវការផ្សារភ្ជាប់រវាងសមរភូមិក្រោយជាមួយសមរភូមិមុខតាមអនុសាសន៍របស់សម្តេចតេជោនាយឧត្តមសេនីយ៍ផុតលេខផ្កាយមាស៥ និងជានាយករដ្ឋមន្ត្រីនៃព្រះរាជាណាចក្រកម្ពុជា ក៏ដូចជាការលើកទឹកចិត្តបណ្តុះឆន្ទៈស្មារតីដល់កងកម្លាំងគ្រប់គ្នាឱ្យមានភាពក្លាហានមោះមុត ហ៊ានលះបង់សព្វបែបយ៉ាង ដើម្បីជាតិមាតុភូមិ ។ លោកបណ្ឌិតម៉ក់ ពេជ្ជរិទ្ធ បានថ្លែងកោតសរសើរចំពោះវីរភាពក្លាហានរបស់វីរយុទ្ធជនសមរភូមិមុខដែលបានប្តូរផ្តាច់តស៊ូការពារបូរណភាពទឹកដីមិនឱ្យសត្រូវឈ្លានពាន សូម្បីតែមួយមីល្លីម៉ែត្រ តាមអនុសាសន៍ដ៏ថ្លៃថ្លារបស់សម្តេចតេជោនាយករដ្ឋមន្ត្រី ។
លោកបណ្ឌិតបន្តទៀតថា ចំពោះសម្ព័ន្ធមេត្រីភាពរវាងអគ្គនាយកដ្ឋានកាំកុងត្រូលក្រសួងពាណិជ្ជកម្មជាមួយកងការពារព្រំដែនគោកលេខ៥០៣ ថ្វីដ្បិតតែនៅឆ្ងាយពីគ្នាប៉ុន្តែយើងតែងតែមានការគិតមកដល់សមរភូមិមុខគ្រប់វិនាទី ។ នាពេលខាងមុខនេះលោកនឹងជួយជាថវិកាដល់អង្គភាព ដើម្បីសាងសង់លេណដ្ឋានឱ្យបានរឹងមាំក្រៅពីការឧបត្ថម្ភស្បៀង ។ បើក្នុងវរៈមានអ្វីខ្វះខាតត្រូវរាយការណ៍ជាបន្ទាន់ ។ ទន្ទឹមនោះលោកម៉ក់ ពេជ្ជរិទ្ធ បានបួងសួងដល់វត្ថុ ស័ក្តិសិទ្ធិ ក្នុងលោកឱ្យកំចាត់សត្រូវឈ្លានពាន និងសូមឱ្យវីរយុទ្ធជនទាំងអស់ និងក្រុមគ្រួសារមានក្តីសុខគ្រប់ៗគ្នា ដើម្បីបំពេញ ភារកិច្ចជូនជាតិ ។
លោកឧត្តមសេនីយ៍ទោប៊ុន សេង ទីប្រឹក្សាផ្ទាល់សម្តេចតេជោ និងជាមេបញ្ជាការយោធភូមិភាគទី៥ បានថ្លែងអំណរគុណចំពោះអគ្គនាយកដ្ឋានកាំកុងត្រូលក្រសួងពាណិជ្ជកម្មដែលបានជួយឧបត្ថម្ភទាំងកម្លាំងកាយចិត្ត និងថវិកា សម្រាប់ផ្គត់ផ្គង់ស្បៀង និងការកសាងហេដ្ឋារចនាសម្ព័ន្ធនៅទីបញ្ជាការវរការពារព្រំដែនគោក លេខ៥០៣ និងកម្លាំងកងល្បាតបន្ទាត់ជួរមុខទាំងអស់តាំងពីដំបូងទីរហូតបច្ចុប្បន្ន ។ ការជួយឧបត្ថម្ភគាំទ្រពីសមរភូមិក្រោយមកសមរភូមិមុខរបស់អគ្គនាយកដ្ឋានកាំកុងត្រូលក្រសួងពាណិជ្ជកម្មនេះ គឺមានន័យថា «ទាំងអស់គ្នាដើម្បីការពារជាតិ-ការពារជាតិដើម្បីទាំងអស់គ្នា» តាមអនុសាសន៍របស់សម្តេចតេជោដែលបានថ្លែងកាលពីពេលកន្លងមក ។
លោកឧត្តមសេនីយ៍បានលើកឡើងពីសភាពការណ៍ព្រំដែនថា មួយរយៈកន្លងមក ថ្វីដ្បិតតែនៅតាមបន្ទាត់ព្រំដែន ក្នុងភូមិសាស្ត្រភូមិភាគ៥ ពិសេសចំណុចភូមិជោគជ័យ ពួកសៀមដែលមានមហិច្ឆតាលោភលន់ចូលមកអុកឡុកចង់បង្កឱ្យទៅជារឿងធំដូចនៅតំបន់ប្រាសាទព្រះវិហារ ក្តី ប៉ុន្តែមិនអាចទៅរួចទេ គឺកម្លាំងជួរមុខកម្ពុជា គ្រប់គ្រងស្ថានការណ៍បានគ្រប់ពេលវេលារហូតចាប់បានជនជាតិសៀម៧នាក់ យកទៅភ្នំពេញទៀតផង ។ អគ្គនាយកដ្ឋានកាំក្រុងត្រូលក្រសួងពាណិជ្ជកម្មផ្តល់ជូនអំណោយរួមមាន មីយើង១.១៦០កេស ទឹកត្រី២០០ជួរ ទឹកស៊ីអ៊ីវ២០០យួរ ទឹកសុទ្ធ១០០កេស ត្រីខ៥កេសធំ និងថវិកាចំនួន២០លានរៀល ជួយដល់អង្គភាព ចំណែកកម្លាំងដែលមានវត្តមានក្នុងអង្គពិធីក៏បានទទួលស្រោមសំបុត្រមានថវិកាគ្រប់ គ្នាៗជាការលើទឹកចិត្ត និងផ្សារភ្ជាប់អនុស្សាវរីយ៍ ពីក្រុមប្រតិភូផងដែរ៕
ចែករំលែកព័តមាននេះ