ខេត្តកំពង់ធំ ៖ ក្រោមការបញ្ជាដឹកនាំរបស់លោកឧត្តមសេនីយ៍ត្រី ផាន់ សុផេង ស្នងការនគរបាលខេត្ត ជនសង្ស័យម្នាក់បានត្រូវកម្លាំងនគរបាលស្រុកសណ្តាន់ឃាត់ខ្លួនកាលពីថ្ងៃទី៣ សីហា បន្ទាប់ពីជននេះត្រូវក្មេងស្រីម្នាក់ចោទប្រកាន់ថា បានរំលោភនាង កាលពីវេលាម៉ោង១១និង៤៤នាទីយប់ថ្ងៃទី២ សីហា ខណៈនាងកំពុងដេកលង់លក់ ។
ពាក់ព័ន្ធនឹងករណីខាងលើ លោកអធិការ នគរបាលស្រុក អ៊ួង ម៉ូលី បានឱ្យដឹងថា ជនសង្ស័យឈ្មោះ វឿន ភួង អាយុ១៩ឆ្នាំ ជាកម្មករចម្ការដំឡូងមី និងមានទីលំនៅក្នុងឃុំសាន់គ ស្រុកកំពង់ស្វាយ ត្រូវបានក្មេងស្រី អាយុ១៥ឆ្នាំ ជាកម្មករដូចគ្នាចោទប្រកាន់ថាបានចាប់នាងរំលោភក្នុងពេលដែលនាងលេបថ្នាំផ្តាសាយហើយដេកលក់ក្នុងរោងស្នាក់នៅជាមួយគ្នាក្នុងចម្ការដំឡូងមីនៅឃុំមានឫទ្ធិ ស្រុកសណ្តាន់ ។ តាមក្មេងស្រីនិយាយថា មុនពេលកើតហេតុដោយសារនាងមានជំងឺគ្រុនផ្តាសាយ ក៏បានលេបថ្នាំហើយដេកលង់លក់ទៅ លុះដឹងខ្លួនឡើង ស្រាប់តែឃើញឈ្មោះ ភួង កំពុងធ្វើសកម្មភាពរំលោភ ។
ក្មេងស្រី និងជនសង្ស័យគឺជាសាច់ញាតិនឹងគ្នា ហើយបានមកស្នាក់នៅធ្វើកម្មករជម្រះស្មៅចម្ការដំឡូងមី ទើបតែបានប៉ុន្មានថ្ងៃប៉ុណ្ណោះ ក៏កើតមានរឿងបែបនេះតែម្តង ។ ក្រោយពីកសាងសំណុំរឿងរួច ជនសង្ស័យត្រូវបានបញ្ជូនខ្លួនមកសាលាដំបូងខេត្តនៅថ្ងៃទី៤ សីហា ៕
ចែករំលែកព័តមាននេះ