ខេត្តឧត្តរមានជ័យ ៖ រថយន្តម៉ាកកាមរី១គ្រឿង ស៊េរីឆ្នាំ១៩៩៥ ពណ៌កណ្តុរល្មែះ បានក្រឡាប់ជាច្រើនត្រឡប់ បែកពោះ បែកកញ្ចក់ចេញសុទ្ធតែឈើគ្រញូងពេញក្នុងរថយន្ត ខណៈធ្វើដំណើរតាមផ្លូវជាតិលេខ៦៧B មកដល់ចង្កេះភ្នំដងរែក ស្រាប់តែជួបគ្រោះថ្នាក់ធ្លាក់ពីលើផ្លូវទៅខាងស្តាំដៃ ។ ទោះបីជាបែបណា អ្នកបើកបរមិនបានរងរបួសធ្ងន់ទេ និងបានរត់គេចខ្លួនបាត់ស្រមោល បន្សល់ទុកតែរថយន្ត និងឈើគ្រញូងនៅកន្លែងកើតហេតុ ហើយត្រូវបានសមត្ថកិច្ចកងរាជអាវុធហត្ថស្រុកអន្លង់វែងនាំយកទៅរក្សាទុកនៅបញ្ជាការដ្ឋានស្រុក ។ ហេតុការណ៍នេះបានកើតឡើងនៅក្នុងភូមិជើងភ្នំ ឃុំត្រពាំងប្រីយ៍ ស្រុកអន្លង់វែង កាលពីរសៀលថ្ងៃទី៤ សីហា ឆ្នាំ ២០១២ ។
លោកវរសេនីយ៍ត្រី ងួន ទ្ធីរិទ្ធ មេបញ្ជាការកងរាជអាវុធហត្ថស្រុកអន្លង់វែង បានឱ្យដឹងថា បន្ទាប់ពីមានប្រជាពលរដ្ឋទូរស័ព្ទរាយការណ៍ពីឧប្បត្តិេហេតុរថយន្តដឹកឈើគ្រញូងធ្លាក់ពីលើផ្លូវជាតិក្រឡាប់នៅចំណុចចង្កេះភ្នំដងរែក លោកក៏បានបញ្ជាកម្លាំងអាវុធហត្ថស្រុកចុះទៅពិនិត្យ និងឃើញរថយន្តនោះក្រឡាប់មែន ។ ពេលនោះលោកបានបញ្ជាកម្លាំងឱ្យហៅរថយន្តសន្ទូចមកស្ទូចយកទៅរក្សាទុកនៅបញ្ជាការដ្ឋានកងរាជអាវុធហត្ថស្រុក និងបានឱ្យមន្ត្រីរដ្ឋបាលព្រៃឈើមកចូលរួមធ្វើកំណត់ហេតុ ។
លោកវរសេនីយ៍ត្រីបានបញ្ជាក់ថា ក្នុងការធ្វើកំណត់ហេតុមានឈើគ្រញូងចំនួនជាង១ម៉ែត្រគូបផ្ទុកពេញក្នុងរថយន្តទាល់តែបែកកញ្ចក់ ទើបមើលឃើញ ហើយលោកបានប្រគល់ទៅឱ្យមន្ត្រីសង្កាត់រដ្ឋបាលព្រៃឈើស្រុកអន្លង់វែងរក្សាទុកជាសម្បត្តិរដ្ឋួ ទាំងរថយន្តនិងឈើគ្រញូងនោះ ។ ការដឹកឈើគ្រញូងនៅតំបន់នោះតាមសេចក្តីរាយការណ៍ថា លែងសូវមានដឹកពេលយប់ហើយ ដោយក្រុមឈ្មួញបន្លំដឹកនៅពេលថ្ងៃវិញម្តង ៕
ចែករំលែកព័តមាននេះ