រាជធានីភ្នំពេញ ៖ អ្នកភូមិប្រមាណជាង១០០នាក់ចំណុះជើងវត្តពោធិ៍ព្រឹក្ស ហៅវត្តខ្ទរ ក្នុងភូមិខ្ទរ សង្កាត់ព្រែកលៀប ខណ្ឌឫស្សីកែវ កាលពីព្រឹកថ្ងៃទី៤ សីហា បានលើកគ្នាមកកាន់ទីវត្តដោយធ្វើការចោទប្រកាន់មកលើគណៈ កម្មការអាចារ្យ និងចៅអធិការវត្តខ្ទរថា បានរួមដៃគ្នាជាមួយក្រសួងលក់ដីឈាបនដ្ឋានមុខវត្តដែលមានទំហំជាង៤ហិកតា ដោយបានប្រកាសថា ពួកគាត់ប្រឆាំងដាច់ខាតដល់ការមានចេតនាណាមួយចង់លក់ដីរួមនោះដោយប្រើរូបភាពដោះដូរ ។
ការផ្ទុះចេញនូវការបះបោរនេះ បន្ទាប់ពីបែកធ្លាយពីគម្រោងដោះដូរមួយស្ងាត់ៗជាមួយក្រុមហ៊ុនមួយដែលពួកគេរៀបចំលក់ដីឈាបនដ្ឋាន ដោយប្រើរូបភាពដោះដូរដីមួយកន្លែងនៅមុខវត្តបាក់ខែង ។
តាមស្ត្រីឈ្មោះ តេង ផល្លី អាយុ៥៧ឆ្នាំ ជាតំណាងប្រជាពលរដ្ឋបានឱ្យដឹងថា កាលពីថ្ងៃទី៣ សីហា ប្រជាពលរដ្ឋនៅក្នុងភូមិបានឭដំណឹងថា ដីឈាបនដ្ឋានវត្តពោធិព្រឹក្ស ហៅវត្តខ្ទរត្រូវបានគេដោះដូរជាមួយដីមួយកន្លែងនៅមុខវត្តបាក់ខែងហើយដឹងរឿងនេះដោយសារតែចៅអធិការវត្តបាក់ខែងបានសួរនាំពុទ្ធបរិសទ ។ បន្ទាប់ពីបានទទួលដំណឹងពីបាក់ខែងមកវិញបែបនេះ ទើបប្រជាពលរដ្ឋចំណុះជើងវត្តខ្ទរទាំងអស់បាននាំគ្នាជ្រួលច្របល់ហើយបានលើកគ្នាមកកាន់វត្តដើម្បីសួរនាំ ព្រមទាំងប្រឆាំងដាច់ខាតមិនឱ្យដោះដូរទេ។ ការលើកគ្នានេះ តាំងពីវេលាម៉ោង៧ព្រឹកថ្ងៃទី៤ សីហា រហូតដល់ម៉ោង១រសៀល ទើបបំបែកគ្នាដោយប្រជាពលរដ្ឋបានធ្វើការចោទប្រកាន់មកលើចៅអធិការវត្តរួមទាំងគណៈកម្មការអាចារ្យដោយចោទថា បានឃុបឃិតគ្នាដោះដូរដីរួមដើម្បីផលប្រយោជន៍ ។
ស្រ្តីរូបនោះបានបន្តទៀតថា ដីវត្តជាដីរួមមិនមាននរណាម្នាក់មានសិទ្ធិលក់ ឬដោះដូរឡើយហើយប្រជាពលរដ្ឋប្រឆាំងដាច់ខាតចំពោះការលក់ដោយប្រើរូបភាពដោះដូរណាមួយនេះ។ បើសិនជារដ្ឋឬក្រសួងយកដីនេះធ្វើជាមន្ទីរពេទ្យ សាលារៀន ប្រជាពលរដ្ឋមិនជំទាស់នោះទេ ។ ម្យ៉ាងទៀតដីនេះ ជាដីកេររបស់វត្ត នៅពេលដែលវត្តនេះត្រូវច្រាំងបាក់ដាច់អស់ អាចដូរយកដីនេះទៅជាទីវត្តបាន មិនត្រូវលក់នោះទេ ។
លោកសាម គាត ហៅតាភុល គណៈកម្មការអាចារ្យវត្តពោធិព្រឹក្ស ហៅវត្តខ្ទរ និយាយថា នេះជារឿងរបស់ក្រសួងធម្មការ និងសាសនាទេ ដែលកាលពីប្រមាណ៣ខែមុន ខាងក្រសួងបានមកប្រជុំជាមួយចៅអធិការ ប្រុងដោះដូរដីឈាបនដ្ឋានទៅមុខវត្តបាក់ខែង ដោយប្រាប់ថា មិនអត់ប្រយោជន៍នោះទេ ។ ចំណែកព្រះតេជគុណទិន សារ៉ុម ចៅអធិការវត្តខ្ទរមានថេរដីកាឱ្យដឹងថា រឿងនេះព្រះអង្គគ្មានសិទិ្ធលក់ ឬដោះដូរដីវត្តឡើយ តែខាងក្រសួងធម្មការ និងសាសនាបានមកជួបប្រជុំចំនួន៣ទៅ៤ដងដើម្បីសុំដូរដី ។
ព្រះតេជគុណប៊ុន ខេន ព្រះចៅអធិការវត្តបាក់ខែងបានមានថេរដីកាឱ្យដឹងតាមទូរស័ព្ទថា ព្រះអង្គបានឃើញពីគម្រោងនៃការដោះដូរឈាបនដ្ឋាននេះ ដោយមានប្លង់ឈាបនដ្ឋានថ្មីមួយ មានសួនច្បារមានតូបយាយជី និងមានសាលាឆាន់ព្រមទាំងមានការឯកភាពពីមន្រ្តីសង្ឃ តែមិនបានឃើញឯកសារណាបង្ហាញពីការដោះដូរឈាបនដ្ឋានវត្តខ្ទរនេះឡើយ ។
លោកឃ្លាំង ហួត អភិបាលខណ្ឌឫស្សីកែវ ឱ្យដឹងថា ចំពោះការដោះដូរនេះ គឺខាងក្រសួងធម្មការ និងសាសនាមានបំណងមែនរហូតដល់ពេលនេះ អាជ្ញាធរខណ្ឌពុំទាន់បានឃើញឯកសារពីការដោះដូរនេះមកដល់ខណ្ឌឡើយ ។ លោកអភិបាលបាននិយាយទៀតថា ជំហររបស់អាជ្ញាធរទប់ស្តាត់ដាច់ខាតរាល់ការលក់ដូរដីវត្តនេះព្រោះជាអំពើបាបធំណាស់ ។ គួរនាំគ្នាជួយថែរក្សាដើម្បីទុកធ្វើជាសាលារៀន មន្ទីរពេទ្យជាដើម ទើបសុចរិតជាង ។ ទោះបីជាយ៉ាងណាកោះសន្តិភាព ពុំទទួលការបំភ្លឺណាមួយពីក្រសួងធម្មការ និងសាសនានៅឡើយទេ ដែលយើសង្ស័យថា ប្រហែលជាមានក្រុមហ៊ុនណាមួយរត់ការឆ្លើយដាក់មកលើក្រសួងហើយមើលទៅ ៕
ចែករំលែកព័តមាននេះ