នាងថាម៉ារ៉ា អេកឃើលស្តូន កូនស្រីរបស់លោកប័រនី អេកឃើលស្តូន ម្ចាស់កម្មសិទ្ធិការប្រកួតរថយន្ត F1 បានបង្ហាញស្នាមសាក់នៅបរិវេណពោះ និងជាស្នាមសាក់បិទបាំងឈ្មោះរបស់គូស្នេហ៍ជាអ្នកជំនួញដែលទើបតែឈប់ទាក់ទងគ្នាដោយសារតែក្បត់នាងទៅទាក់ទងជាមួយស្រីផ្សេងនៅក្នុងសណ្ឋាគារមួយនៅឡូសអេនចឺឡេស ។
កូនស្រីរបស់ម្ចាស់កម្មសិទ្ធិ F1 អាយុ២៨ឆ្នាំ រូបនេះ នៅទំនេរក្រោយពីឈប់ទាក់ទងជាមួយលោក អូម៉ា ឃីយ៉ាមី គូស្នេហ៍ជាអ្នកជំនួញកាលពីពេលថ្មីៗកន្លងមក ។ ដើមហេតុនៃការចែកផ្លូវគឺកើតឡើងក្រោយពីនាងថាម៉ារ៉ា ប្រទះឃើញខ្សែអាត់វីដេអូមួយដែលលោកអូម៉ា ឌីយ៉ាមី កំពុងល្អូកល្អឺនជាមួយនារីផ្សេង ធ្វើឱ្យនាងខឹងសម្បា និងបណ្តេញគូស្នេហ៍រូបនេះចេញពីផ្ទះ ។
បច្ចុប្បន្ននាងថាម៉ារ៉ា បានទៅធ្វើការព្យាបាលផ្លូវចិត្តជាមួយប្អូនស្រីរបស់ខ្លួននៅសហរដ្ឋអាមេរិក និងចំណាយពេលសម្រាកលម្ហែកាយនៅឯអាងទឹកក្នុងសណ្ឋាគារ ដោយមិនចាប់អារម្មណ៍លើអ្នកតាមប្រមាញ់រូបថតឡើយ ។ ប៉ុន្តែអ្វីដែលអ្នកប្រមាញ់រូបថតចាប់អារម្មរណ៍បំផុត គឺស្នាមសាក់ដ៏តូចមួយនៅបរិវេណពោះផ្នែកខាងស្តាំ ដែលស្នាមសាក់នេះមានពណ៌ស៊ីជម្ពូ និងមានរបាយការណ៍បញ្ជាក់ថា សាមីខ្លួនសាក់រូបខាងលើគឺ ដើម្បីបិទឈ្មោះគូស្នេហ៍របស់ខ្លួន ។
នៅក្នុងរបាយការណ៍បញ្ជាក់ថា នាងថាម៉ារ៉ាលួចទៅសាក់រូបថ្មី កាលពីសប្តាហ៍មុនក្នុងទីក្រុងឡុង ប្រទេសអង់គ្លេស ដើម្បីឱ្យស្នាមសាក់ថ្មីបិទឈ្មោះលោកឃីយ៉ាមី ជាការលុបលាងការឈឺចាប់ដែលគូស្នេហ៍បានផិតក្បត់លួចមានស្រីថ្មី ៕
ចែករំលែកព័តមាននេះ