ប៉ុន្មានម៉ោងក្រោយទស្សនកិច្ចរបស់រដ្ឋមន្ត្រីការបរទេសអាមេរិកលោកស្រីហ៊ីលឡារីគ្លីនតុន នៅស៊ូដង់ខាងត្បូង ប្រទេសស៊ូដង់ និងស៊ូដង់ខាងត្បូងបានរកឃើញដំណោះស្រាយមួយនៃជម្លោះលើប្រេងកាតដែលបំពុលជានិច្ចដល់ទំនាក់ទំនងរវាងស៊ូដង់ទាំង២មួយឆ្នាំក្រោយពីស៊ូដង់ខាងត្បូងប្រកាសឯករាជ្យដាច់ចេញពីស៊ូដង់ ។
ប្រធានាធិបតីអាមេរិកលោកបារ៉ាក់អូបាម៉ា កាលពីថ្ងៃទី៤សីហា បានសំដែងការអបអរសាទរចំពោះកិច្ចព្រមព្រៀងនោះដែលបើកទ្វារទៅរកភាពរុងរឿងមួយសម្រាប់ប្រជាជនប្រទេសទាំង២ ។ ចំណែកនៅទីក្រុងឡុងដ៍រដ្ឋមន្ត្រីការបរទេសអង់គ្លេសលោកវីលៀមហាក ចាត់ទុកកិច្ចព្រមព្រៀងនេះថានឹងជួយជំរុញសេដ្ឋកិច្ចរបស់ប្រទេសទាំង២ដោយលោកសរសើរចំពោះស្មារតីសម្របសម្រួលគ្នារបស់ភាគីទាំង២ ។
ក្នុងសេចក្តីប្រកាសមួយលោកអូបាម៉ា បន្តថា លោកសូមសំដែងការដឹងគុណចំពោះការខិតខំប្រឹងប្រែងរបស់សហភាពអាហ្វ្រិកដឹកនាំដោយអតីតប្រមុខរដ្ឋអាហ្វ្រិកខាងត្បូងលោកថាបូអឹមបេគី ដែលធ្វើជាអាជ្ញាកណ្តាលរវាងស៊ូដង់ទាំង២ ។ប៉ុន្មានម៉ោងក្រោយទស្សនកិច្ចរបស់លោកស្រីគ្លីនតុននៅក្រុងជូបា រដ្ឋធានីស៊ូដង់ខាងត្បូង លោកអឹមបេគី ប្រកាសកាលពីយប់ថ្ងៃទី៣មកទី៤សីហា ថាស៊ូដង់និងស៊ូដង់ខាងត្បូង បានរកឃើញដំណោះស្រាយនៃទំនាស់ប្រេងកាតរវាងប្រទេសទាំង២ដែលទំនាស់នោះស្ទើរតែនាំឱ្យមានសង្គ្រាមមួយទៅហើយកាលពីរដូវផ្ការីកកន្លងមកនេះ ។
យោងតាមស៊ូដង់ខាងត្បូងថា កិច្ចព្រមព្រៀងដែលចុះហត្ថលេខានៅទីក្រុងអាឌីសអាបេបា រដ្ឋធានីអេត្យូពីគ្រោងថាស៊ូដង់ខាងត្បូងត្រូវបង់ប្រាក់ឱ្យស៊ូដង់៩,៤៨ដុល្លារ ក្នុងប្រេងកាតមួយធុង ដែលដឹកឆ្លងកាត់ស៊ូដង់រយៈពេល៣ឆ្នាំកន្លះខាងមុខនេះ ។ ម្យ៉ាងទៀតស៊ូដង់ខាងត្បូងយល់ព្រមបង់ប្រាក់ប្រមាណ៣ពាន់លានដុល្លារឱ្យស៊ូដង់ជាការជួយសងការខូចខាតប្រាក់ចំណូលចាប់តាំងពីការបំបែកចេញពីគ្នាមក ៕
ចែករំលែកព័តមាននេះ