ខេត្តឧត្តរមានជ័យ ៖ រថយន្តម៉ាកកាមរី១គ្រឿង ស៊េរី៩៥ ពណ៌កណ្តុរប្រមេះ ដឹកឈើគ្រញូងពេញធ្វើដំណើរតាមផ្លូវជាតិលេខ៦៧បេ ក្នុងទិសដៅពីជើងទៅត្បូង លុះពេលធ្វើដំណើរមកដល់ចង្កេះភ្នំដងរែក បានធ្លាក់ពីលើផ្លូវជាតិទៅខាងស្តាំដៃក្រឡាប់ជាច្រើនត្រឡប់ចេញឈើគ្រញូង ចំណែកអ្នកបើកបរបានរត់គេចខ្លួនបាត់ស្រមោល រីឯរថយន្ត និងឈើត្រូវកម្លាំងអាវុធហត្ថស្រុកអន្លង់វែង អូសយកទៅរក្សាទុកនៅទីបញ្ជាការកងរាជអាវុធហត្ថស្រុក។ ហេតុការណ៍នេះបានកើតឡើងនៅក្នុងភូមិជើងភ្នំ ឃុំត្រពាំងប្រីយ៍ ស្រុកអន្លង់វែង កាលពីរសៀលថ្ងៃទី៤ សីហា ២០១២ ។
លោកវរសេនីយ៍ត្រី ងួន ទ្ធីរិទ្ធ មេបញ្ជាការកងរាជអាវុធហត្ថស្រុកអន្លង់វែងបានឱ្យកោះសន្តិភាពដឹងថា ប្រជាពលរដ្ឋបានទូរស័ព្ទរាយការណ៍ថា មានរថយន្តដឹកឈើគ្រញូងពេញធ្លាក់ពីលើផ្លូវជាតិក្រឡាប់ចេញសុទ្ធតែឈើគ្រញូងនៅចំណុចចង្កេះភ្នំដងរែក ។ បន្ទាប់មកលោកបានបញ្ជាកម្លាំងកងរាជអាវុធហត្ថស្រុកចុះទៅពិនិត្យ និងស្ទូចយករថយន្តមករក្សាទុកនៅទីបញ្ជាការអាវុធហត្ថស្រុករួចមកលោកបានឱ្យមន្ត្រីជំនាញរដ្ឋបាលព្រៃឈើមកចូលរួមធ្វើកំណត់ហេតុ ចំណែកម្ចាស់រថយន្តបានរត់គេចខ្លួនបាត់ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ