រាជធានីភ្នំពេញ ៖ នេន វណ្ណា មកពីក្លិបកងពលធំអន្តរាគមន៍លេខ៣ព្រះវិហារ ផ្តួលកន ចន្ថា មកពីក្លិបអាជ្ញាធរជាតិអាវុធគីមី ឱ្យសន្លប់នៅមុនស្នូរជួងបញ្ចប់ទឹកទី៥ ចំណែកខុន ចាន់ថន មកពីក្លិបកងពលធំអន្តរាគមន៍លេខ៣ព្រះវិហារផ្តួលពុទ្ធ ឆាយរិទ្ធី ឱ្យសន្លប់ត្រឹមទឹកទី៣ ក្នុងព្រឹត្តិការណ៍ប្រកួតប្រដាល់ក្បាច់ខ្មែរបុរាណ និងសាកលជាលក្ខណៈមិត្តភាពនៅលើសង្វៀនស្ថានីយទូរទស្សន៍ CTN កាលពីថ្ងៃសៅរ៍ទី៤ សីហា កន្លងមក ដោយទទួលការឧបត្ថម្ភពីក្រុមហ៊ុន K-cement ។
នេន វណ្ណា បើទោះបីជាគេមានប្រៀបខាងកម្ពស់ជាងកន ចន្ថា បន្តិចមែន ប៉ុន្តែនៅត្រឹមទឹកទី១ និងទី២ គេមិនហ៊ានសម្រុកចូលផ្តេសផ្តាសឡើយ ព្រោះចន្ថា មិនមែនជាសាច់ជ្រូក៣ជាន់ងាយចិញ្ច្រាំតាមចិត្តឡើយ កណ្តាប់ដៃរបស់គេអាចវាយចេញបានត្រង់ល្អខ្លាំងណាស់ ជាពិសេសរាល់លើកដែលវណ្ណាចូលកៀកម្តងៗ ត្រូវចន្ថាវាយចូលមុខពេញៗតែម្តង ។ នៅទឹកទី៣ និងទី៤ ចន្ថា ព្យាយាមទាត់ជើងក្រោមវណ្ណាជាញឹកញាប់ក្នុងបំណងរារាំងការចូលកៀកដើម្បីបញ្ចេញផ្លែជង្គង់របស់ណ្ណា ។ ប៉ុន្តែទោះជាយ៉ាងណា នេន វណ្ណា នៅតែអាចរក្សាគោលជំហរក្នុងការវាយតបតបានយ៉ាងល្អដដែល មិនតែប៉ុណ្ណោះវណ្ណា មានឱកាសចូលកៀកវាយកែង និងបុកជង្គង់ចូលពោះទឹកចន្ថាពេញទំហឹងទៀតផង ។ នៅទឹកទី៤ ចន្ថា ត្រូវវណ្ណា វាយឱ្យរាប់៨រហូតដល់ទៅ២លើកឯណោះ លុះចូលដល់ទឹកទី៥ មិនទាន់បានពាក់កណ្តាលទឹកស្រួលបួលផង វណ្ណា បានសម្រុកចូលកៀកវាយចន្ថាផ្ទប់នឹងខ្សែរេញរហូតដល់ថ្នាក់តដៃលែងកើត ទើបអាជ្ញាកណ្តាលបញ្ឈប់ការប្រកួតតែម្តង ។
តក់ សោភ័ណ្ឌ មកពីក្លិបអេភូថងកីឡា បានយកឈ្នះពិន្ទុ ទី ពន្លែត មកពីក្លិបសឹករងខេត្តសៀមរាប ទាំងលំបាក ។ ទឹកទី១ និងទី២ សោភ័ណ្ឌ មើលទៅដូចជាចាញ់ប្រៀបពន្លែត ដាច់តែម្តង ព្រោះគេឃើញពន្លែត សម្រុកចូលកៀកបញ្ជូនស្នៀតកណ្តាប់ដៃវាយចូលផ្ទៃមុខពេញៗ ប៉ុន្តែចិត្តរបស់សោភ័ណ្ឌសឿងគ្រាន់បើ ទោះបីជារងការវាយប្រហារមិនដកដៃពីពន្លែត ក្នុងទឹកទី២យ៉ាងក៏ដោយ ។ សោភ័ណ្ឌ បានវាយបកសងវិញនៅទឹកទី៣ និងទី៤ ធ្វើឱ្យពន្លែតបាត់បង់ឱកាសវាយតបតម្តងៗដែរ ប៉ុន្តែការវាយសម្រុករបស់សោភ័ណ្ឌ ក៏គេមិនភ្លេចការពារដែរ ព្រោះថាពន្លែត ក៏មានឱកាសវាយបកសងវិញម្តងៗដែរ ធ្វើឱ្យសោភ័ណ្ឌគេចចេញស្ទើរមិនទាន់ ។ ទោះជាយ៉ាងណា សោភ័ណ្ឌ ឈ្នះពន្លែត លើកនេះក៏មិនសូវស្រួលខ្លួនប៉ុន្មានឡើយ ។
ខុន ចាន់ថន មកពីក្លិបកងពលធំអន្តរាគមន៍លេខ៣ព្រះវិហារ ផ្តួល ពុទ្ធ ឆាយរិទ្ធី មកពីក្លិបពុទ្ធសេរីវង្សកីឡា ឱ្យសន្លប់នៅត្រឹមទឹកទី៣ ។ ណៃ ណន មកពីក្លិបខេមរៈខ្លាហោះ ប្រកួតឈ្នះពិន្ទុ សុខ ចំរនើស្រ៊ុន មកពីក្លិបមជ្ឈមណ្ឌលកម្ចាត់មីនកម្ពុជា ។ ឡៅ ចន្ទ្រា មកពីក្លិបកងពលតូចឆត្រយោង៩១១ បានផ្តួលឌួង ស៊ីដេត មកពីក្លិបពន្លឺវិបុល ឱ្យសន្លប់នៅត្រឹមទឹកទី២ និងឈូក ចាន់សុភ័ក្រ មកពីសមាគមកីឡាប្រដាល់ក្រសួងមហាផ្ទៃ ប្រកួតជាលក្ខណៈសាកលឈ្នះពិន្ទុ ខន វិចិត្រ មកពីក្លិបតាឡីដំរីមានឫទ្ធិ ៕
ចែករំលែកព័តមាននេះ