រាជធានីភ្នំពេញ ៖ បន្ទាប់ពីចាប់ផ្តើមកាលពីថ្ងៃទី២៨ កក្កដា ការប្រកួតកីឡាបាល់ទះពានរង្វាន់ Leo-Cup National Volleyball សម្រាប់ឆ្នាំ២០១២ បានបញ្ចប់ហើយនៅល្ងាចថ្ងៃទី៤ សីហា នៅទីលានបុរីសុភមង្គល Beeline Arena ស្ថិតក្នុងសង្កាត់ជ្រោយចង្វា ខណ្ឌឫស្សីកែវ ដោយមានការចូលរួមប្រគល់ពានរង្វាន់ពីសំណាក់លោកឡាក់ សំអាត អគ្គនាយកនៃអគ្គ
នាយកដ្ឋានកីឡាក្រសួងអប់រំ យុវជន និងកីឡា និងជាអនុប្រធានសហព័ន្ធកីឡាបាល់ទះកម្ពុជា តំណាងក្រុមហ៊ុនស្រាបៀរលីអូ ព្រមទាំងមន្ត្រីផ្នែកកីឡាជាច្រើនរូបទៀត ។
នៅក្នុងការប្រកួតអស់រយៈពេល៨ថ្ងៃកន្លងទៅនេះ ជ័យជម្នះចំណាត់ថ្នាក់លេខ១ គឺបានទៅលើក្រុមកីឡាក្រសួងមហាផ្ទៃ ដោយយកឈ្នះក្រុុមកីឡាបញ្ជាការដ្ឋានអង្គរក្សក្នុងលទ្ធផល៣សិតទល់នឹង០ ។ ចំណាត់ថ្នាក់លេខ២ បានទៅក្រុមកីឡាបញ្ជាការដ្ឋានកងអង្គរក្ស និងចំណាត់ថ្នាក់លេខ៣ បានទៅក្រុមកីឡាកងពលធំអន្តរាគមន៍លេខ៣ដែលប្រកួតចុងក្រោយឈ្នះក្រុមសាលាខេត្តកំពង់ចាម ។ សម្រាប់ក្រុមក្រសួងមហាផ្ទៃដែលដណ្តើមបានជើងឯកបានទទួលរង្វាន់១០.០០០ដុល្លារ (៤០លានរៀល) ។
មានប្រសាសន៍ក្នុងពិធីបិទការប្រកួតបាល់ទះនេះ លោកឡាក់ សំអាត បានកោតសរសើរក្រុមកីឡាករទាំងអស់ដែលបានចំណាយអស់កម្លាំងកាយចិត្តនៅក្នុងការប្រកួតហើយចំពោះក្រុមដែលដណ្តើមបានជ័យជម្នះក្នុងថ្ងៃនេះ គឺដោយសារការខិតខំប្រឹងប្រែងទាំងកម្លាំង និងបច្ចេកទេសអស់ពីសមត្ថភាព ។ ឯក្រុមដែលមិនបានទទួលជ័យជម្នះត្រូវចាត់ទុកថា នេះជាបទពិសោធន៍បច្ចេកទេសដែលត្រូវព្យាយាមហ្វឹកហាត់ឱ្យបានល្អថែមទៀតដើម្បីទទួលបានជ័យជម្នះដូចក្រុមដែលឈ្នះក្នុងថ្ងៃនេះដែរ ។
គួរបញ្ជាក់ថា ព្រឹត្តិការណ៍នៃការប្រកួតបាល់ទះដណ្តើមពានរង្វាន់ Leo-Cup Nationl Volleyball នេះ ចែកជា២ដំណាក់កាល ដែលដំណាក់កាលទី១ ប្រកួតជម្រុះតាមភូមិភាគចំនួន៥មាន មណ្ឌលរាជធានីភ្នំពេញ មណ្ឌលខេត្តបាត់ដំបង មណ្ឌលខេត្តសៀមរាប មណ្ឌលខេត្តកំពង់ចាម និងមណ្ឌលខេត្តព្រះសីហនុ ។ ក្នុងការប្រកួតដំណាក់កាលទី១នេះ រាជធានីភ្នំពេញយក៨ក្រុម ឯភូមិភាគ៤ទៀតយកតែ៤ក្រុមប៉ុណ្ណោះ ក្នុងមួយភូមិភាគ ។ សរុបទាំង៥ភូមិភាគមានចំនួន២៤ក្រុមសម្រាប់ឡើងមកប្រកួតដំណាក់កាលទី២នៅរាជធានីភ្នំពេញ ហើយការប្រកួតតាមភូមិភាគគឺតាំងពីថ្ងៃទី១៤ ឧសភា មកម៉្លេះ ។ នៅក្នុងការប្រកួតនេះ សម្រាប់ក្រុមដែលដណ្តើមបានជើងឯកទទួលរង្វាន់ចំនួន៤០លានរៀល ៕
ចែករំលែកព័តមាននេះ