រាជធានីភ្នំពេញ ៖ យុវជនម្នាក់ត្រូវអ្នកធ្វើការជាមួយលបកាប់៣កាំបិត ដោយសារតែឈ្លោះប្រកែកគ្នារឿងលេងបៀជំពាក់ប្រាក់៥០០០រៀល កាលពីវេលាម៉ោង៩យប់ថ្ងៃទី៤ សីហា ស្ថិតក្នុងភូមិពោងពាយ សង្កាត់ភ្នំពេញថ្មី ខណ្ឌសែនសុខ ។ ជនរងគ្រោះមានឈ្មោះសុខ សៅ អាយុ២៨ឆ្នាំ ជាកម្មករសំណង់ ស្នាក់នៅការដ្ឋានសំណង់ជិតកន្លែងកើតហេតុខាងលើ មានស្រុកកំណើតនៅភូមិព្រៃស្រះ ឃុំជ្រៃ ស្រុករមាសហែក ខេត្តស្វាយរៀង បានឱ្យដឹងថា ជនដៃដល់មានឈ្មោះលី អាយុប្រមាណ២៥ឆ្នាំ ធ្វើការជាមួយគ្នា មានទីលំនៅខេត្តកណ្តាល ។
ចំពោះមូលហេតុដែលបណ្តាលឱ្យឈានដល់ការកាប់សម្លាប់គ្នានេះ ជនរងគ្រោះបានឱ្យដឹងថា កាលពី៣ទៅ៤ថ្ងៃមុន រូបគេបានលេងបៀជុំគ្នាជាមួយអ្នកធ្វើការហើយឈ្មោះលី លេងចាញ់រួចជំពាក់លុយគេ៥០០០រៀល ។ ប្រភពដដែលបានបន្តទៀតថា បន្ទាប់ពីលេងបៀជំពាក់លុយ៥០០០រៀលមក ឈ្មោះលី និងឈ្មោះសៅ បានឈ្លោះប្រកែកគ្នា ហើយសៅ បានវាយឈ្មោះលី ២-៣ដៃ ធ្វើឱ្យឈ្មោះលី ខឹងគុំតាមសងសឹករហូតមក ។ លុះដល់យប់កើតហេតុ ឈ្មោះសៅត្រឡប់មកពីដើរលេងវិញ បានដើរតាមផ្លូវបេតុងត្រឡប់ទៅកន្លែងស្នាក់នៅ ស្រាប់តែឈ្មោះលី លបកាប់នឹងកាំបិតប៉័ងតោ៣កាំបិត មួយកាំបិតដំបូងយកដៃរងបណ្តាលឱ្យរយះកំភួនដៃខាងឆ្វេង ១កាំបិតរយះដៃខាងឆ្វេង និងមួយកាំបិតទៀត ត្រូវរយះខ្នងដៃខាងស្តាំ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង ៕
ចែករំលែកព័តមាននេះ