ខេត្តបន្ទាយមានជ័យ ៖ បុរសម្នាក់ ព្រោះតែមានទំនាស់ពាក្យសម្តីជាមួយប្រពន្ធបន្តិចបន្តួច ក៏ខឹងចិត្តទៅចង.កសម្លាប់ខ្លួនចោលប្រពន្ធ និងកូនស្រីតូចៗចំនួន២នាក់ឱ្យរស់នៅយ៉ាងកណ្តោចកណ្តែង ។ សពបុរសរូបនេះ ត្រូវបានគេប្រទះឃើញនៅវេលាម៉ោង៦និង៣០នាទីព្រឹកថ្ងៃទី៤ សីហា ឆ្នាំ២០១២ នៅចុងភូមិចក សង្កាត់ព្រះពន្លា ក្រុងសិរីសោភ័ណ ។
ប្រភពព័ត៌មានពីលោកមេភូមិចកបានឲ្យដឹងថា បុរសដែលធ្វើអត្តឃាតដោយចង.កនេះ ឈ្មោះផាត សុឃាស់ អាយុ២៩ឆ្នាំ រស់នៅក្នុងភូមិកើតហេតុខាងលើ ប្រពន្ធឈ្មោះពិ សុជា អាយុ២៤ឆ្នាំ និងមានកូនស្រីតូចៗចំនួន២នាក់ ។ តាមការសាកសួរស្ត្រីជាប្រពន្ធនិយាយថា នៅវេលាម៉ោង១០យប់ថ្ងៃទី៣ សីហា ឆ្នាំ២០១២ ប្តីរបស់នាងពេលត្រឡប់មកពីផឹកស៊ីវិញបានសុំ នាងលក់ម៉ូតូ តែនាងមិនព្រមក៏មានការឈ្លោះប្រកែកគ្នាបន្តិចបន្តួច ។
បន្ទាប់មក ប្តីនាងក៏ស្លៀកពាក់ស្អាតបាតដើរចុះពីផ្ទះ តែនាងពុំចាប់អារម្មណ៍ថាទៅណាឡើយ ព្រោះនេះគឺជាទម្លាប់របស់គាត់ទៅហើយ ដែលកន្លងមកតែងតែរបៀបនេះ ពេលគាត់ចេញពីផ្ទះព្រឹកឡើងឃើញត្រឡប់មកវិញធ្វើការងារធម្មតា ។ ផ្ទុយទៅវិញលើកនេះស្រាប់តែបាត់មិនឃើញត្រឡប់មកវិញ នាងក៏ដើរសួរគេ លុះនៅវេលាម៉ោង៦និង៣០នាទីព្រឹកថ្ងៃទី៤ សីហា អ្នកភូមិឈ្មោះថាច់ តុង អាយុ៧១ឆ្នាំ ដើរទៅបត់ជើងធំស្រាប់តែប្រទះឃើញប្តីនាងចង.ក នឹងក្រមានៅនឹងមែកពុទ្ទ្រាហើយក៏មានការភ្ញាក់ផ្អើលតែម្តង ។
ក្នុងការចុះទៅពិនិត្យសពនេះ គេសង្កេតឃើញមានស្ថាប័នអយ្យការ កងរាជអាវុធហត្ថ នគរបាលក្រុង និងគ្រូពេទ្យ ព្រមទាំងអាជ្ញាធរមូលដ្ឋាន ហើយបញ្ជាក់ថា បុរសឈ្មោះផាត សុឃាស់ ពិតជាធ្វើអត្តឃាតដោយចង.កមែន ។ ក្រោយពីពិនិត្យរួចសពត្រូវបានប្រគល់ជូនក្រុមគ្រួសាររៀបចំចាត់ចែងធ្វើបុណ្យតាមប្រពៃណី ៕
ចែករំលែកព័តមាននេះ