រាជធានីភ្នំពេញ ៖ លោកលុន ឆេងកៃ ប្រធានគណៈកម្មការរៀបចំការបោះឆ្នោតរាជធានីភ្នំពេញបានលើកឡើងថា ជាក្តីកង្វល់សម្រាប់រាជធានីភ្នំពេញចំពោះបញ្ជីឈ្មោះអ្នកបោះឆ្នោតដែលចេះតែប៉ោងឡើងពីមួយឆ្នាំទៅមួយឆ្នាំ ដោយគ្រាន់តែករណីឈ្មោះស្ទួនមួយមុខសម្រាប់ឆ្នាំនេះ គឺមានចំនួនរហូតដល់ទៅ៥៧.៩៤៦នាក់ ។
លោកលុន ឆេងកៃ លើកឡើងបែបនេះ នៅក្នុងពិធីប្រជុំផ្សព្វផ្សាយស្តីពីការពិនិត្យបញ្ជីឈ្មោះ និងចុះឈ្មោះអ្នកបោះឆ្នោតប្រចាំឆ្នាំ២០១២ ក្រោមអធិបតីភាពលោកអ៊ឹម សួស្តី ប្រធានគណៈកម្មាធិការជាតិរៀបចំការបោះឆ្នោត(គ.ជ.ប)និងលោកម៉ប់ សារិន ប្រធានក្រុមប្រឹក្សារាជធានីភ្នំពេញ នាព្រឹកថ្ងៃទី៣ សីហា នៅសាលារាជធានីភ្នំពេញ ដោយមានការចូលរួមពីមន្ត្រីក្រោមឱវាទសាលារាជធានីភ្នំពេញជាច្រើនរូប ។
លោកលុន ឆេងកៃ បានឲ្យដឹងទៀតថា នៅក្នុងដំណើរការនៃការពិនិត្យបញ្ជីឈ្មោះ និងចុះឈ្មោះអ្នកបោះឆ្នោតប្រចាំឆ្នាំកន្លងមកការផ្សព្វផ្សាយស្តីពីការពិនិត្យបញ្ជីឈ្មោះនិងចុះឈ្មោះបោះឆ្នោតគឺអនុវត្តតាមរយៈយន្តការនៃការផ្សព្វផ្សាយតាមវិទ្យុ ទូរទស្សន៍ ការចងបដាតាមទីសាធារណៈ ការបិទផ្សាយខិត្តប័ណ្ណឬ ប័ណ្ណប្រកាស និងតាមរយៈកម្មវិធីការបណ្តុះបណ្តាល ដោយផ្ទាល់ជាមួយអ្នកដែលត្រូវប្រតិបត្តិរួមមានក្រុមប្រឹក្សាឃុំ-សង្កាត់ ស្មៀនឃុំ -សង្កាត់ និងអ្នកពាក់ពន្ធ័ផ្សេងៗ រួមមានអាជ្ញាធរដែនដីគ្រប់លំដាប់ថ្នាក់ គណបក្សនយោបាយ និងអង្គការមិនមែនរដ្ឋាភិបាលសង្កេតការណ៍បោះឆ្នោត។
ដោយឡែក ចំពោះការពិនិត្យបញ្ជីឈ្មោះ និងចុះឈ្មោះអ្នកបោះឆ្នោតប្រចាំឆ្នាំ២០១២នេះដែលជាឆ្នាំសម្រាប់ត្រៀមការបោះឆ្នោតជ្រើសតាំងតំណាងរាស្ត្រនីតិកាលទី៥នាឆ្នាំ២០១៣ និងតាមរយៈលទ្ធផលនៃសន្និបាតបូកសរុបការងារបោះឆ្នោតទូទាំងប្រទេស គ.ជ.ប នឹងខិតខំបន្ថែមទៀតក្នុងការពង្រឹងគុណភាព និងសុក្រឹតភាពនៃបញ្ជីឈ្មោះអ្នកបោះឆ្នោតតាមរយៈការដាក់ចេញនូវកម្មវិធីថ្ងៃនេះ។ នៅក្នុងឱកាសនោះលោកលុន ឆេងកៃ បានសំណូមពរដល់ក្រុមប្រឹក្សា សង្កាត់និងស្មៀនសង្កាត់ទាំងអស់ ព្រមទាំងអាជ្ញាធរពាក់ពន្ធ័ សូមមេតា្តយកចិត្តទុកដាក់ក្នុងការសម្អាតបញ្ជីបោះឆ្នោតឆ្នាំនេះ ដើម្បីធ្វើឲ្យបញ្ជីឈ្មោះអ្នកបោះឆ្នោតកាន់តែមានលក្ខណៈល្អប្រសើរឡើងនៅពេលក្រោយៗទៀត ។
លោកម៉ប់ សារិន ប្រធានក្រុមប្រឹក្សារាជធានីភ្នំពេញ បានថ្លែងថា ការចុះឈ្មោះនិងពិនិត្យបញ្ជីឈ្មោះបោះឆ្នោត តែងតែមានការរិះគន់ពីជនអគតិមួយចំនួនដែលបានលើកឡើងពីភាពមិនប្រក្រតីនៃការចុះឈ្មោះ ឬលប់់ឈ្មោះពីបញ្ជីបោះឆ្នោតជាដើម ។ ដូច្នេះ ដើម្បីជៀសវាងការរិះគន់ទាំងងងឹតងងល់ អាជ្ញាធរគ្រប់សង្កាត់ ត្រូវខិតខំជំរុញការផ្សព្វផ្សាយព័ត៌មានស្ដីពីការចុះឈ្មោះបោះឆ្នោតនេះឲ្យដល់គ្រប់ក្រុមគ្រួសារ និងធ្វើការផ្សព្វផ្សាយតាមគ្រប់រូបភាពដែលអាចធ្វើបាន និងត្រូវច្បាស់លាស់ចំពោះឈ្មោះរបស់ប្រជាពលរដ្ឋម្នាក់ៗ ។
លោកអ៊ឹម សួស្ដី ប្រធានគ.ជ.ប បានសំណូមពរបន្ថែមដល់លោកស្មៀនគ្រប់សង្កាត់ ត្រូវតែចុះបញ្ជីឈ្មោះអ្នកបោះឆ្នោត ដោយពិនិត្យឲ្យម៉ត់ចត់ទាំងនាមត្រកូល និងនាមខ្លួន ចៀសវាងមានបញ្ហានៅពេលក្រោយ។ លោកបញ្ជាក់ទៀតថា នាពេលកន្លងមកគ្រាន់តែឈ្មោះស្ទួនមានចំនួន៣១ម៉ឺននាក់។ យើងផ្តោតសំខាន់ទៅលើអ្នកផ្លាស់ប្តូរទីលំនៅ អ្នកទទួលមរណភាព អ្នកមានឈ្មោះស្ទួន ឬអ្នកទើបគ្រប់អាយុចុះឈ្មោះបោះឆ្នោត ។ លោកអ៊ឹម សួស្តី បានលើកឡើងទៀតថា ភ្នំពេញជាកន្លែងដែលសម្បូរអ្នកចាំថា ចាំរិះគន់ខុសពីនីតិវិធីរបស់គ.ជ.ប។
ការពិនិត្យបញ្ជីឈ្មោះ និងចុះឈ្មោះបោះឆ្នោតប្រចាំឆ្នាំ ២០១២នេះ គឺជាឆ្នាំត្រៀមសម្រាប់ការបោះឆ្នោតជ្រើសតាំងតំណាងរាស្រ្តនីតិកាលទី៥នាឆ្នាំ២០១៣ ដែលជាការខិតខំបន្ថែមទៀតរបស់ គ.ជ.ប ក្នុងការពង្រឹងគុណភាព និងសុក្រឹតភាពនៃបញ្ជីបោះឆ្នោត ។ ការពិនិត្យបញ្ជីឈ្មោះ និងចុះឈ្មោះបោះឆ្នោត ការផ្តល់សុពលភាពលើបញ្ជីបោះឆ្នោតសម្រាប់ឆ្នាំ២០១២ ចាប់ផ្តើមពីថ្ងៃទី១ កញ្ញា ដល់ថ្ងៃទី៣១ ធ្នូ ឆ្នាំ២០១២ ដូចបានកំណត់ក្នុងប្រតិទិន ៕
ចែករំលែកព័តមាននេះ