រាជធានីភ្នំពេញ ៖ នារសៀលថ្ងៃទី១ សីហា លោកបណ្ឌិតសូរ ឃុន រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានអញ្ជើញជាអធិបតីភាពក្នុងពិធីបើកវគ្គបណ្តុះបណ្តាលស្តីពីបច្ចេកវិទ្យាព័ត៌មានវិទ្យា និងមូលដ្ឋានគ្រឹះនៃទូរគមនាគមន៍ ។
លោកយី វណ្ណប្ញទ្ធិ ប្រធាននាយកដ្ឋានបុគ្គលិកនិងបណ្តុះបណ្តាលនៃក្រសួងប្រៃសណីយ និងទូរគមនាគមន៍ បានគូសបញ្ជាក់ថា ដោយទទួលបាននូវកិច្ចសហការល្អពីទីភ្នាក់ងារព័ត៌មានសង្គមជាតិកូរ៉េ តាមរយៈកម្មវិធីអ្នកស្ម័គ្រចិត្តផ្នែកព័ត៌មានវិទ្យាកូរ៉េសម្រាប់ឆ្នាំ២០១២ ក្រសួងប្រៃសណីយ៍ និងទូរគមនាគមន៍ បានរៀបចំពិធីបើកវគ្គបណ្តុះបណ្តាលនេះឡើងមានរយៈពេល៤សប្តាហ៍ គឺចាប់ពីថ្ងៃទី១ ដល់ថ្ងៃទី២៤ ខែសីហា ឆ្នាំ២០១២ ដោយមានសិក្ខាកាមចូលរួមចំនួន៣១នាក់ មកពីគ្រប់អង្គភាពក្រោមឱវាទក្រសួង ក្រោមការជួយបណ្តុះបណ្តាល និងផ្លាស់ប្តូរបទពិសោធន៍ពីគ្រូស្ម័គ្រចិត្តផ្នែកព័ត៌មានវិទ្យាកូរ៉េចំនួន៤នាក់ ។
លោកបណ្ឌិតសូរ ឃុន មានប្រសាសន៍ថា ក្នុងនាមក្រសួងប្រៃសណីយ៍ និងទូរគមនាគមន៍ លោកសូមថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលនៃសាធារណរដ្ឋកូរ៉េ ពិសេសអ្នកស្ម័គ្រចិត្តផ្នែកព័ត៌មានវិទ្យាកូរ៉េ និងដៃគូអភិវឌ្ឍន៍នានា ចំពោះកិច្ចសហប្រតិបត្តិការ និងការបន្តការគាំទ្ររបស់ពួកគេ ក្នុងបេសកកម្មអភិវឌ្ឍន៍ធនធានមនុស្សរបស់ក្រសួងប្រៃសណីយ៍ និងទូរគមនាគមន៍លើវិស័យបច្ចេកវិទ្យាគមនាគមន៍ និងព័ត៌មាន ។
លោករដ្ឋមន្ត្រីមានប្រសាសន៍ទៀតថា រដ្ឋាភិបាលល្អ អភិបាលកិច្ចល្អ តម្រូវឱ្យមានមន្ត្រីរាជការល្អ ក្រសួងស្ថាប័នរឹងមាំ និងមានប្រព័ន្ធគ្រប់គ្រងការងារ ក៏ដូចជាវិធីសាស្ត្រក្នុងការអនុវត្តការងារដែលមានប្រសិទ្ធភាពខ្ពស់ ។ ក្រសួងត្រូវប្រើប្រាស់សមត្ថភាពដែលមានស្រាប់ និងបន្តអភិវឌ្ឍន៍សមត្ថភាពថ្មីឱ្យកាន់តែប្រសើរឡើង ដើម្បីឱ្យក្លាយទៅជាស្ថាប័នប្រកបដោយភក្តីភាព ឆន្ទៈបម្រើការងារមោះមុត មានសីលធម៌វិជ្ជាជីវៈនិងយកចិត្តទុកដាក់ខ្ពស់លើការផ្តល់សេវា ។
លោកសង្ឃឹមថា ក្នុងរយៈពេលសិក្សា៤សប្តាហ៍នេះ សិក្ខាកាមទាំងអស់នឹងធ្វើការចែករំលែកបទពិសោធន៍ និងចំណេះដឹងតាមរយៈការពិភាក្សាគ្នា ការអនុវត្តផ្ទាល់ និងការផ្លាស់ប្តូរព័ត៌មានឱ្យគ្នាទៅវិញទៅមក ៕
ចែករំលែកព័តមាននេះ