ខេត្តរតនគិរី ៖ ផ្លូវជនបទគម្រោងត្រីកោណមរកតចម្ងាយ១៩គីឡូម៉ែត្រ ចាប់ពីសង្កាត់យក្សឡោម ក្រុងបានលុង ទៅឃុំស្រយ៉ោះ(ឃុំទើបបង្កើតថ្មី) ស្រុកលំផាត់ កំពុងរងនូវការខូចខាតយ៉ាងខ្លាំង បណ្តាលមកពីរថយន្តធុនធំផ្ទុកគ្រឿងចក្រដូចជាប៊ុលដូហ៊ែ្សរ អេស្កាវ៉ាទ័រ គោយន្តកែច្នៃ រថយន្តក្រុមហ៊ុនដឹកជញ្ជូនឈើអារ ជាដើម ។
លោកលេញ ថឺន ប្រធានមន្ទីរអភិវឌ្ឍន៍ជនបទខេត្ត បានឱ្យដឹងថា ផ្លូវប្រវែង១៩គីឡូម៉ែត្រនេះ កសាងឡើងដោយក្រុមហ៊ុនដែលដេញថ្លៃបានពីក្រសួងអភិវឌ្ឍន៍ជនបទ ហើយជាផ្លូវកសាងថ្មីមានទីតាំងភូមិសាស្ត្រស្មុគស្មាញ ដោយឆ្លងកាត់ព្រៃស្រោងក្រាស់ៗ មានស្មៅដុះស៊ុបទ្រុប ធ្វើឱ្យមន្ត្រីសិក្សាគម្រោងជួបឧបសគ្គក្នុងការកំណត់ទីកន្លែងធ្វើស្ពាន និងដាក់លូសម្រាប់បង្ហូរទឹកកុំឱ្យដក់ទឹកនៅលើដងផ្លូវ ដែលរដូវនេះជារដូវវស្សា មានភ្លៀងធ្លាក់ជោកជាំ ។ ទន្ទឹមនោះ មានរថយន្តធំផ្ទុកទៅដោយគ្រឿងចក្រផ្សេងៗ គោយន្តកៃច្នៃដឹកកសិផល លើសទម្ងន់ ពីព្រោះថាតំបន់ខាងលើនេះជាកន្លែងដាំដុះកសិ-ឧស្សាហកម្ម និងដំណាំចម្ការផ្សេងៗទៀត ហើយក៏ជាកន្លែងភ្ញៀវមកកម្សាន្តផងដែរ ។
លោកលេញ ថឺន បន្តទៀតថា បើទោះបីផ្លូវជនបទនេះមានការលំបាកក្នុងការធ្វើដំណើរបន្តិចបន្តួចក៏ពិតមែន ប៉ុន្តែនៅតែអាចធ្វើចរាចរណ៍ទៅមកបាន ព្រោះការខូចខាតខ្លាំងមានប្រវែងតែ១៥ម៉ែត្រតែប៉ុណ្ណោះ ។ នាពេលខាងមុខនេះ ខណៈភ្លៀងធ្លាក់ថយចុះ លោកនឹងបញ្ជូនគ្រឿងចក្រធ្វើការជួសជុលនៅកន្លែងខាងលើ ហើយនៅរដូវប្រាំង លោកនឹងបន្តការដាក់លូរំដោះទឹកចេញកុំឱ្យដក់លើដងផ្លូវ បណ្តាលឱ្យរថយន្តធំៗផ្ទុកគ្រឿងចក្រ ផ្ទុកកសិផលបើកបរឆ្លងកាត់ជាប់ផុងទៀត ព្រោះផ្លូវនេះទើបតែអនុវត្តការស្ថាបនាជំហានទី១ប៉ុណ្ណោះ ពុំទាន់បានដាក់លូគ្រប់កន្លែងនៅឡើយទេ ។
នាពេលដ៏ខ្លីខាងមុខ រូបលោកនឹងស្នើទៅក្រសួងអភិវឌ្ឍន៍ជនបទ ដើម្បីចាក់កៅស៊ូម្តង ពីព្រោះថាទីតាំងខាងលើនេះជាតំបន់កសិ-ឧស្សាហកម្ម ហើយក៏ជាតំបន់ទេសចរណ៍ធម្មជាតិ ដែលមានទឹកជ្រោះអូរសិនលែ សម្រាប់ឱ្យភ្ញៀ់វទេសចរមកកម្សាន្ត ហើយការធ្វើដំណើរនិងការដឹកជញ្ជូនដោយរថយន្តគ្រប់ប្រភេទមានការកើនឡើង ៕
ចែករំលែកព័តមាននេះ