រាជធានីភ្នំពេញ ៖ ស្ត្រីវ័យប្រមាណ២៥ឆ្នាំម្នាក់បានជិះម៉ូតូគុបជ្រុងតាមបណ្តោយវិថីព្រះមុនីរ៉េត ហើយទំនងជាស្រវឹងផងនោះជិះវ៉ារថយន្ត២គ្រឿង ក៏ជ្រុលទៅបុកគូទរថយន្តស៊ីអវី ដែលចតស្ងៀមលើចិញ្ចើមផ្លូវ បណ្តាលឱ្យក្រពឹតគូទខាងឆ្វេង កាលពីវេលាម៉ោង១១យប់ថ្ងៃទី៣ សីហា ២០១២ ស្ថិតក្នុងសង្កាត់ទួលស្វាយព្រៃ២ ខណ្ឌចំការមន ។
ប្រភពព័ត៌មានឱ្យដឹងថា មុនពេលកើតហេតុស្ត្រីម្នាក់បានជិះម៉ូតូម៉ាកគុបជ្រុង ទំនងជាស្រវឹងផងបើកតាមបណ្តោយមហាវិថីព្រះមុនីរ៉េត ពីលិចទៅកើត ហើយវ៉ារថយន្ត២គ្រឿងក្នុងទិសដៅស្របគ្នា ដោយមិនបានមើលមុខ ក៏ជ្រុលទៅបុករថយន្តស៊ីអវីដែលចតលើចិញ្ចើមផ្លូវ បណ្តាលឱ្យក្រពឹតគូទរថយន្តខាងឆ្វេង ។ ភ្លាមៗម្ចាស់រថយន្តដែលជាស្ត្រីផងនោះបានចេញមកស្តីឱ្យស្ត្រីអ្នកបើកម៉ូតូ ហើយស្ត្រីអ្នកបើកបរម៉ូតូបានទះស្ត្រី ជាម្ចាស់រថយន្តចំនួន១ដៃ ហើយស្ត្រីម្ចាស់រថយន្តបានវាយទៅវិញចំនួន២ដៃ ។ ប្រភពបន្តថា ខណៈពេលដែលភាគីទាំងសងខាងកំពុងប្រវាយប្រតប់គ្នា ប៉ូលិសចរាចរណ៍ចុះទៅដល់ ហើយបានធ្វើការឃាត់ស្ត្រីទាំង២នាក់ បែរជាស្ត្រីអ្នកបើកម៉ូតូច្រានប៉ូលិសអុកគូទតែម្តង ។ ដោយមានការជជែកគ្នាយូរពេក និងស្តាប់គ្នាមិនបានប៉ូលិសចរាចរខណ្ឌចំការមន សហការជាមួយប៉ូលិសចរាចររាជធានីយករថយន្ត និងម៉ូតូទៅរក្សាទុករង់ចាំដោះស្រាយជាក្រោយ ៕
ចែករំលែកព័តមាននេះ