ខេត្តកំពង់ចាម ៖ ការចុះបង្ក្រាបគ្រឿងញៀន២ករណីត្រូវបានធ្វើឡើងក្រោមបញ្ជារបស់លោកឧត្តមសេនីយ៍ត្រី ឆាយ គឹមសុន ស្នងការនគរបាលខេត្ត គឺតាមប្រមាញ់ជនសង្ស័យចែកចាយគ្រឿងញៀននៅត្រើយខាងកើតទន្លេមេគង្គ និងចាប់ខ្លួនជនសង្ស័យបាន២នាក់ជាបន្តបន្ទាប់កាលពីវេលាម៉ោង៤ និង៤០នាទីរសៀលថ្ងៃទី២ សីហា ឆ្នាំ២០១២ ដោយរឹបអូសបានថ្នាំញៀនក្រាមម៉ាទឹកកកជាច្រើនកញ្ចប់មានទម្ងន់៤,៤ក្រាម ។
លោកវរសេនីយ៍ទោ សោម រស់ ប្រធានការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្ត បានឱ្យដឹងថា ជនទាំង២នាក់ដែលត្រូវបានចាប់ខ្លួនម្នាក់ឈ្មោះធឿន ឆៃហ៊ត់ ភេទប្រុស អាយុ៣៤ឆ្នាំ ត្រូវបានចាប់តាមដីការបស់សាលាដំបូងខេត្ត និងម្នាក់ទៀតឈ្មោះស្រី ល័ក្ខ ភេទស្រី អាយុ៣៤ឆ្នាំ អតីតទណ្ឌិតចេញពីពន្ធនាគារខេត្ត «ជាប់ចោទពីបទចែកចាយថ្នាំញៀន» ។ លោកវរសេនីយ៍ទោ បានរំឭកថា ផ្តើមចេញពីការបង្ក្រាបជនសង្ស័យពីរនាក់ប្តីប្រពន្ធ ដែលស្ត្រីជាប្រពន្ធឈ្មោះញ៉ែម សារ៉ន អាយុ៣១ឆ្នាំ និងបុរសជាប្តីឈ្មោះរិន ធុន អាយុ២៩ឆ្នាំ រស់នៅភូមិជីមាន់ជើង ឃុំក្រែក ស្រុកពញាក្រែក កាលពីថ្ងៃទី២៩ កក្កដា កន្លងទៅ ដោយរឹបអូសបានថ្នាំញៀនក្រាមម៉ាទឹកកកចំនួន០,៣ក្រាម ។ ក្រោយពីទទួលបានការសារភាពថា ថ្នាំញៀនដែលពួកគេយកមកលក់នេះ គឺបានទិញពីឈ្មោះឆៃហ៊ត់ និងឈ្មោះស្រីល័ក្ខ រស់នៅភូមិឃុំជាមួយគ្នា លោកក៏សុំដីកាចាប់ខ្លួនឈ្មោះឆៃហ៊ត់ ជាបន្ទាន់ផងដែរ ។
ក្រោមកិច្ចសហការជាមួយនឹងលោកវរសេនីយ៍ត្រី ប្រាក់ ប៊ុនណុន អធិការនគរបាលស្រុកពញាក្រែក ក៏បានប្រើកម្លាំងក្រោមឱវាទចុះចាប់ឈ្មោះឆៃ ហ៊ត់ នៅកន្លែងលេងបាល់ទះស្ថិតក្នុងភូមិឡ ឃុំកោងកាង ស្រុកពញាក្រែក កាលពីវេលាម៉ោង៤ និង៤០នាទីរសៀលថ្ងៃទី២ សីហា ។
លោកវរសេនីយ៍ឯក ជឹម សេងហុង ស្នងការរងនគរបាលខេត្ត ទទួលផែនកណ្តាលយុត្តិធម៌មានប្រសាសន៍ថា ក្នុងប្រតិបត្តិការនេះរូបលោកបានបញ្ជាឱ្យតាមប្រមាញ់ឈ្មោះស្រី ល័ក្ខ បន្តទៀតដោយបានប្រើកម្លាំងធ្វើជារកទិញថ្នាំញៀននិងឱ្យយកមកប្រគល់ឱ្យនៅចំណុចវាលស្រែមួយនៅក្នុងភូមិជីមាន់ជើង ក្នុងតម្លៃ៥ម៉ឺនរៀល ។ ពេលឈ្មោះនេះមកដល់ ក៏ឃាត់ខ្លួន និងដកហូតបានថ្នាំញៀន១កញ្ចប់តូច លុះពេលទៅឆែកឆេរលំនៅឋានបន្តទៀតក៏បានរកឃើញថ្នាំញៀន២កញ្ចប់ធំនិង៤កញ្ចប់តូច ព្រមទាំងថ្នាំរាយៗមួយចំនួនទៀតសរុបទម្ងន់៤,៤ក្រាម ។
សូមបញ្ជាក់ថា ឈ្មោះស្រី ល័ក្ខ នេះធ្លាប់ត្រូវបានចាប់ខ្លួនកាលពីថ្ងៃទី១ កញ្ញា ឆ្នាំ២០១០ ជាប់ចោទពីបទចែកចាយគ្រឿងញៀន និងត្រូវបានដោះលែងចេញពីពន្ធនាគារកាលពីថ្ងៃទី១ មីនា ឆ្នាំ២០១១ ប៉ុន្តែអតីតទណ្ឌិតរូបនេះមិនរាងចាលនៅតែប្រកបរបរខុសច្បាប់បែបនេះទៀត៕
ចែករំលែកព័តមាននេះ