ខេត្តកំពង់ស្ពឺ ៖ ជំទប់ទី២ ឃុំត្រពាំងជោរ ស្រុកឱរ៉ាល់ ដែលមានការប្រទូស្តរ៉ាយគ្នាជាមួយជំនួយការឃុំរហូតបណ្តាលឱ្យជំនួយការឃុំស្លាប់ពេលសម្រាកពីការប្រជុំរៀនសូត្រអំពីគម្រោងផែនការអភិវឌ្ឍន៍ដែលត្រូវចុះប្រតិបត្តិការក្រោយចប់រៀនសូត្ររយៈពេល៣ថ្ងៃនោះ ត្រូវបានចាប់ខ្លួនហើយ ។
លោកអនុសេនីយ៍ឯក សម សាក់ អនុប្រធានការិយាល័យកណ្តាលនគរបាលព្រហ្មទណ្ឌខេត្ត បានបញ្ជាក់ពីហេតុការណ៍នេះថា ជំទប់ទី២ ឃុំរូបនេះឈ្មោះសូត្រ ចន្ថា មកពីគណបក្សសិទ្ធិមនុស្សបានទាស់គ្នាជាមួយលោកលី ម៉ៅ ជាមន្ត្រីជំនួយការឃុំ ពីរឿងធ្វើអត្រានុកូលដ្ឋានផ្តល់ជូនប្រជាពលរដ្ឋដែលបានចោទលោកសូត្រ ចន្ថា ថា ធ្វើខុសផែនការ ។
នៅក្នុងទំនាស់នោះ លោកសូត្រ ចន្ថា តបថាបើអញធ្វើខុសគេមិនឱ្យអញធ្វើជំទប់ទេ ។ ក្រោយពីប្រើពាក្យសំដីដៀមដាមគ្នាធ្វើឱ្យជំទប់ទី២រូបនេះខឹងសម្បាយ៉ាងខ្លាំងរហូតវាយគ្នាក្នុងកណ្តាលចំណោមមេឃុំ និងស្មៀននានាមកពីគ្រប់ឃុំបណ្តាលឱ្យមានការឆោឡោឡើង ហើយភ្លាមៗនោះជំទប់ទី២រូនេះត្រូវឃាត់ខ្លួន ឯលោកលី ម៉ៅ ដោយពុំអាចសង្គ្រោះបានក៏ស្លាប់ ។
លោកសម សាក់ បន្តថា ជំទប់ទី២ ឈ្មោះសូត្រ ចន្ថា នេះ មានអាយុ៤៣ឆ្នាំ ធ្លាប់មានរឿងអាស្រូវកន្លងមក ដែលមានដីកាចាប់ខ្លួនរបស់តុលាការជាប់ចោទពីបទសម្លាប់ប្រពន្ធខ្លួនពេលកំពុងលាងចាននៅផ្ទះបាយដោយកាប់នឹងពូថៅ ធ្លាប់ជាប់ពន្ធនាគារចំនួន១៤ឆ្នាំ ទើបចេញនៅឆ្នាំ២០០១ មកផ្តើមជ្រៀតចូលតំណែងក្នុងបក្សសិទ្ធិមនុស្ស ហើយក៏មានរឿងអាស្រូវនេះទៀត ។ ជំទប់ឃុំរូបនេះត្រូវបានឃាត់ខ្លួន និងកសាងសំណុំរឿងបញ្ជូនទៅតុលាការ ៕
ចែករំលែកព័តមាននេះ