ខេត្តពោធិ៍សាត់ ៖ បុរសជនជាតិអាល់ហ្សេរីម្នាក់បានស្លាប់ភ្លាមៗនៅនឹងកន្លែងកើតហេតុដោយសាររថយន្តមិនស្គាល់ម៉ាកបុក ខណៈពេលចុះពីលើរថយន្តក្រុង ហើយឈររេរាលើថ្នល់ កាលពីវេលាម៉ោង១២និង៥០នាទីរំលងអធ្រាត្រឈានចូលថ្ងៃទី២ សីហា លើកំណាត់ផ្លូវជាតិលេខ៥ ត្រង់ចំណុចហាងបាយរថយន្តក្រុងស្ថិតក្នុងភូមិមាន់ចែ សង្កាត់ព្រៃញី ក្រុងពោធិ៍សាត់ ។
លោកវរសេនីយ៍ត្រី រស់ ចំរើន នាយការិយាល័យនគរបាលចរាចរផ្លូវគោកនៃស្នងការដ្ឋាននគរបាលខេត្តពោធិ៍សាត់ឱ្យដឹងថា ជនរងគ្រោះដែលត្រូវរថយន្តបុកស្លាប់នេះឈ្មោះ ABDEL KANDER BECHAM ភេទប្រុស អាយុ៤០ឆ្នាំ សញ្ជាតិអាល់ហ្សេរី មានលិខិតបញ្ជាក់វិញ្ញាបនបត្របណ្តោះអាសន្នសម្រាប់ជនភៀសខ្លួនរបស់អង្គការUNHCRចុះថ្ងៃទី៣ មេសា ឆ្នាំ២០១២ ស្នាក់នៅបណ្តោះអាសន្នភូមិពោងពាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
តាមសាក្សីនិយាយថា នៅយប់នោះជនរងគ្រោះជិះរថយន្តក្រុងដឹកអ្នកដំណើររបស់ក្រុមហ៊ុនមួយក្នុងទិសដៅពីលិចទៅកើត ពេលមកដល់ចំណុចកើតហេតុរថយន្តក្រុងនោះ បានឈប់ដើម្បីដាក់អ្នកដំណើរចុះបត់ដៃបត់ជើង ។ ចំណែកជនរងគ្រោះសញ្ជាតិអាល់ហ្សេរីនោះមិនទៅចូលបន្ទប់ទឹកឬរកទិញអីហូបនឹងគេទេ បែរជាឈររេរាលើថ្នល់ ស្របពេលនោះក៏មានរថយន្តមិនស្គាល់ម៉ាកបោះពួយយ៉ាងលឿនពីកើតទៅលិចបុកអូសចម្ងាយ៣០ម៉ែត្រ ស្លាប់ភ្លាមៗមួយរំពេច ឯរថយន្តបង្កគ្រោះថ្នាក់នោះបើកទៅមុខបាត់ស្រមោល ។
សពជនរងគ្រោះត្រូវប៉ូលិសចរាចរផ្លូវគោកខេត្តយកទៅរក្សាទុកនៅមន្ទីរពេទ្យខេត្ត និងជូនដំណឹងទៅស្ថានទូតប្រទេសអាល់ហ្សេរី ដើម្បីស្រាវជ្រាវរកសាច់ញាតិឱ្យមកទទួលយកសព ។ ចំណែករថយន្តបង្កសមត្ថកិច្ចក៏កំពុងស្រាវជ្រាវដើម្បីយកមកដោះស្រាយតាមផ្លូវច្បាប់ ៕
ចែករំលែកព័តមាននេះ