ខេត្តកំពង់ឆ្នាំង ៖ រថយន្តម៉ាកនីសាន់ពណ៌ស ចំណុះ៣តោនកន្លះមួយគ្រឿងបានរអិលធ្លាក់ពីលើចំណោត ហើយក្រឡាប់ធ្លាក់ប្រឡាយខូចខាតទំនិញមួយចំនួន ខណៈម្ចាស់ចតចោលមិនបានដាក់ហ្វ្រាំងដៃ និងមិនបានយកកំណល់កល់កង់រថយន្ត កាលពីវេលាម៉ោង១និង៣០នាទីរំលងអធ្រាត្រ ឈានចូលថ្ងៃទី៣ សីហា នៅចំណុចទួលមួយក្នុងភូមិអណ្តូងជ្រៃ ឃុំអណ្តូងស្នាយ ស្រុករលាប្អៀរ ។ ទោះយ៉ាងណាពុំមាននណាររងរបួសក្នុងហេតុការណ៍នោះទេ ប៉ុន្តែរថយន្ត និងទំនិញខូចខាតយ៉ាងដំណំ ។
មន្ត្រីប៉ូលិសចរាចរស្រុករលាប្អៀរឱ្យដឹងថា នៅមុនពេលកើតហេតុអ្នកបើកបររថយន្តឈ្មោះ ហុន ទីលំនៅខេត្តបាត់ដំបងបានបើករថយន្តម៉ាកនីសាន់ ពណ៌ស ដឹកទំនិញពេញបើកក្នុងទិសដៅពីភ្នំពេញទៅខេត្តបាត់ដំបង ។ លុះមកដល់ចំណុចកើតហេតុរថយន្តខូចផ្លិតទឹកម៉ាស៊ីន ពេលនោះម្ចាស់រថយន្ត និងព្រូបានឈប់ដើម្បីជួសជុលដោយចតរថយន្តទុកលើដីទួលមួយកន្លែងរួចដើរទៅរកទិញផ្លិតទឹកយកមកប្តូរដែលមានចម្ងាយប្រមាណ២០០ម៉ែត្រ ។ ពេលឈប់រថយន្តអ្នកបើកបរមិនមានដាក់ហ្វ្រាំងដៃទេ ក៏បណ្តាលឱ្យរថយន្តវិលកង់ម្តងបន្តិចៗរហូតធ្លាក់ពីចំណោតមកក្រោមចម្ងាយជិត១០០ម៉ែត្រ ក៏រេចង្កូតធ្លាក់ចូលលូទឹកក្រឡាប់បះជើងតែម្តង ។ ប្រភពដដែលបន្តថា នៅយប់នោះគេមិនអាចធើ្វអ្វីបានទេបានត្រឹមតែហៅប៉ូលិសឱ្យមកជួយការពាររហូតភ្លឺឡើង ទើបហៅរថយន្តស្ទូចឱ្យស្ទូចដាក់លើថ្នល់វិញ ។
ចំណែកទំនិញជាច្រើនបានខូចខាតពិសេសម៉ាស៊ីនបោកខោអាវជាង២០គ្រឿងត្រូវក្រពឹតខ្ទេច ហើយក៏បានសាងដាក់រថយន្តផ្សេងមួយគ្រឿងទៀត ។ដោយពុំមានខូចខាតសម្បត្តិសាធារណៈឬប៉ះពាល់ដល់ជីវិតមនុស្ស ប៉ូលិសបានអនុញ្ញាត្តឱ្យយករថយន្តនោះទៅជួសជុលដោយមិនមានការផាកពិន័យអ្វីឡើយ ៕
ចែករំលែកព័តមាននេះ