រាជធានីភ្នំពេញ ៖ លោក ហ៊ុយ ហាំងសុង រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានសូមឱ្យមន្ត្រីក្រសួងរបស់លោកត្រូវចេះស្រឡាញ់វិជ្ជាជីវៈរបស់ខ្លួន វានឹងនាំមកនូវការរីកចម្រើនការងារផង ប្រទេសជាតិផង និងធនធានមនុស្សផងដែរ ។
លោក ហ៊ុយ ហាំងសុង បានថ្លែងបែបនេះនៅនាយកដ្ឋានពេទ្យការងារ កាលពីថ្ងៃទី២ សីហា ខណៈពេលដែលលោកចូលរួមជាអធិបតីក្នុងពិធីបិទវគ្គបណ្តុះបណ្តាលមន្ត្រីសុខភាព និងសុវត្ថិភាពសម្រាប់នាយកដ្ឋានពេទ្យការងារ ។ ការបណ្តុះបណ្តាលនោះធ្វើឡើងក្រោមកិច្ចសហការគ្នារវាងនាយកដ្ឋានពេទ្យការងារនៃក្រសួងការងារ និងបណ្តុះបណ្តាលវិជ្ជាជីវៈ និងវិទ្យាស្ថានជាតិសុខភាព និងសុវត្ថិភាពការងារម៉ាឡេស៊ី នៅនាយកដ្ឋានពេទ្យការងាររយៈពេលពីរសប្តាហ៍ គឺចាប់ពីថ្ងៃទី២៣ កក្កដា ដល់ថ្ងៃទី៣ សីហា ដោយមានសិក្ខាកាមចូលរួមចំនួន៥២នាក់ ជាមន្ត្រីមកពីនាយកដ្ឋានពេទ្យការងារ និងមន្ទីរការងារ និងបណ្តុះបណ្តាលវិជ្ជាជីវៈរាជធានី-ខេត្តទាំងអស់ ។
លោក ឡេង តុង ប្រធាននាយកដ្ឋានពេទ្យការងារបានមានប្រសាសន៍ថា កម្មវិធីបណ្តុះបណ្តាលនេះមាន៤១ មេរៀនដែលត្រូវបណ្តុះបណ្តាលដើម្បីផ្តល់ចំណេះដឹងថ្មីៗដល់មន្ត្រីអំពី
សុខភាព សុវត្ថិភាពការងារនៅគ្រប់ទីកន្លែងធ្វើការទាំងអស់ ដើម្បីរួមចំណែកក្នុងការអនុវត្តច្បាប់ស្តីពីការងារនៅកម្ពុជាឱ្យកាន់តែមានលក្ខណៈល្អប្រសើរឡើង ហើយការបណ្តុះបណ្តាលនេះក៏មានការចុះអនុវត្តផ្ទាល់នៅតាមរោងចក្រកាត់ដេរផងដែរ ។ ដើម្បីឱ្យសិក្ខាកាមបានយល់ដឹងកាន់តែច្បាស់ថែមទៀត ហើយពេលចប់ការសិក្សា សិក្ខាកាមទាំងអស់ទទួលបានលិខិតបញ្ជាក់ការសិក្សាពីវិទ្យាស្ថានជាតិសុខភាព សុវត្ថិភាពម៉ាឡេស៊ី ។
លោក ឡេង តុង បញ្ជាក់ថា មេរៀនក្នុងការបណ្តុះបណ្តាលនេះពិតជាមានសារសំខាន់ខ្លាំងណាស់សម្រាប់មន្ត្រីអធិការកិច្ចយកទៅអនុវត្តនៅតាមរោងចក្រ សហគ្រាស គ្រឹះស្ថានទាំងអស់នៅក្នុងប្រទេសកម្ពុជា ដើម្បីលើកកម្ពស់លក្ខខណ្ឌការងារ សំដៅកាត់បន្ថយគ្រោះថ្នាក់ការងារ ជាពិសេសការដួលសន្លប់របស់កម្មករនិយោជិត ដែលតែងកើតមានជាញឹកញាប់ដោយសារតែបរិយាកាសការងារមិនល្អ ឥរិយាបថបំពេញការងារមិនត្រឹមត្រូវ ជាពិសេសគឺការធុញថប់នឹងការងារ ។ នៅប្រទេសកម្ពុជា គ្រោះថ្នាក់នៅកន្លែងធ្វើការមានការកើនឡើងជាលំដាប់ ដែលតម្រូវឱ្យមានការរៀបចំវិធានការបង្ការគ្រោះថ្នាក់ឱ្យបានច្បាស់លាស់ ។ ជាក់ស្តែងតាមរបាយការណ៍របស់បេឡាជាតិរបបសន្តិសុខសង្គមបានបង្ហាញថា ក្នុងឆ្នាំ២០១១ កន្លងទៅនេះមានគ្រោះថ្នាក់ការងារចំនួន៤៦១ករណី បណ្តាលឱ្យកម្មកររងគ្រោះចំនួន១៥.៥៧១នាក់ របួសធ្ងន់ ៤៤០នាក់ និងស្លាប់៤៧នាក់ គឺមានការកើនឡើង៦៥% បើធៀបទៅនឹងឆ្នាំ២០១០ ៕
ចែករំលែកព័តមាននេះ