រាជធានីភ្នំពេញ ៖ យុវជនម្នាក់ឈ្មោះ យុ រដ្ឋា អាយុ២០ឆ្នាំ មានទីលំនៅក្នុងសង្កាត់ជ្រោយចង្វា ខណ្ឌឫស្សីកែវ ហើយត្រូវបានក្រុមគ្រួសារអះអាងថា មានជំងឺសរសៃប្រសាទផងនោះ បានលួចរត់គេចពីផ្ទះមកលោតទឹកនៅស្ពានព្រះមុនីវង្សចាស់ ស្ថិតក្នុងសង្កាត់ច្បារអំពៅទី២ ខណ្ឌមានជ័យ កាលពីវេលាម៉ោង១០និង១៥នាទីយប់ថ្ងៃទី២ សីហា បណ្តាលឱ្យលង់លិចចូលក្នុងទឹកទន្លេបាសាក់បាត់ស្រមោល រហូតដល់រសៀលថ្ងៃទី៣ សីហា ហើយនៅពុំទាន់ឃើញសពអណ្តែតឡើងទៀត ។
តាមប្រភពព័ត៌មានពីមន្ត្រីនគរបាលដែលឈរជើងការពារស្ពានព្រះមុនីវង្សបានឱ្យដឹងថា នៅវេលាម៉ោងខាងលើ ពិតជាមានមនុស្សលោតទឹកសម្លាប់ខ្លួនប្រាកដមែន ។ ចំពោះសកម្មភាពលោតទឹក គឺពុំមាននរណាឃើញទាន់ឡើយ ហេតុដូច្នេះ ទើបពុំអាចជួយចាប់ឃាត់ទាន់ ។ សមត្ថកិច្ចបាននិយាយថា ឈ្មោះ យុ រដ្ឋា បានដើរលើស្ពានព្រះមុនីវង្សចាស់ឆ្លងពីលិចទៅកើតដល់ចុងស្ពានខាងកើតក៏លោតទឹកធ្វើអត្តឃាតតែម្តង ។
តាមក្រុមគ្រួសារបាននិយាយប្រាប់សមត្ថកិច្ចថា ឈ្មោះ យុ រដ្ឋា កន្លងមកធ្លាប់ប៉ុនប៉ងលោតទឹកសម្លាប់ខ្លួនពីលើស្ពានជ្រោយចង្វាម្តងពីរដងហើយ តែក្រុុមគ្រួសារតាមចាប់ទាន់ ។ ដោយឡែកនៅយប់កើតហេតុខាងលើក្រុមគ្រួសារក៏បានដឹងថា រូបគេរត់គេចពីផ្ទះក្នុងបំណងមកលោតទឹកសម្លាប់ខ្លួនទៀតដែរ តែក្រុមគ្រួសារតាមមិនទាន់ទើបរូបគេមកលោតទឹកទាល់តែបាន ។ ក្រុមគ្រួសារបានបញ្ជាក់ថា ការមកលោតទឹកសម្លាប់ខ្លួននេះ គឺបណ្តាលមកពីយុវជនរូបនេះមានជំងឺសរសៃប្រសាទ ។ រហូតដល់រសៀលថ្ងៃទី៣ សីហា នៅពុំទាន់ឮដំណឹងថា សពយុវជនខាងលើអណ្តែតទឹកឡើងនៅឡើយទេ ៕
ចែករំលែកព័តមាននេះ