ខេត្តបន្ទាយមានជ័យ ៖ យុវជនស្រវឹងជោកម្នាក់ជិះម៉ូតូទៅបុកអ្នកថ្មើរជើងចំពីក្រោយពេញទំហឹង បណ្តាលឱ្យដួលបាក់.កស្លាប់ខ្លួនឯងនៅនឹងកន្លែង ចំណែកអ្នកដើររបួសបាក់ជើងម្ខាងត្រូវបានដឹកទៅព្យាបាលនៅមន្ទីរពេទ្យខេត្តបាត់ដំបង កាលពីវេលាម៉ោង៨និង៣០នាទីយប់ថ្ងៃទី៤ សីហា ២០១២ លើកំណាត់ផ្លូវជាតិលេខ៥៩ ស្ថិតក្នុងភូមិក្បាលទំនប់ ឃុំអូរសំព័រ ស្រុកម៉ាឡៃ។
លោកវរសេនីយ៍ត្រី សៅ ប៊ុន អធិការនគរបាលស្រុកម៉ាឡៃ បានឱ្យដឹងថា អ្នកបើកម៉ូតូឈ្មោះថិត រដ្ឋា ភេទប្រុស អាយុ២០ឆ្នាំ មានទីលំនៅភូមិកោះស្នួល ឃុំទួលពង្រ ស្រុកម៉ាឡៃ បានបាក់.កស្លាប់ភ្លាមៗនៅនឹងកន្លែង ។ ចំណែកអ្នកដើរឈ្មោះសួង ធល់ ភេទស្រី អាយុ៤៩ឆ្នាំ មានទីលំនៅភូមិកើតហេតុខាងលើរងរបួសបាក់ជើងស្តាំត្រូវបានបញ្ជូនទៅព្យាបាលនៅមន្ទីរពេទ្យខេត្តបាត់ដំបង ។
តាមសម្តីសាក្សីដែលឃើញហេតុការណ៍ប្រាប់សមត្ថកិច្ចថា មុនពេលកើតហេតុគេឃើញម៉ូតូ១គ្រឿងបើកដោយយុវជនម្នាក់ពីកើតទៅលិចក្នុងល្បឿនលឿនទំនងជាស្រវឹងផង ក៏ជិះទៅកៀកនឹងចិញ្ចើមថ្នល់បុកអ្នកដើរចំពីក្រោយពេញទំហឹងតែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ