សារព័ត៌មានបរទេស កាលពីថ្ងៃទី៣ សីហា ផ្សាយឱ្យដឹងថា លោកនុបប៉ាឌុល ប៉ាតតាម៉ា ទីប្រឹក្សាផ្នែកច្បាប់របស់លោកថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃបង្ហើបឱ្យដឹងថា បច្ចុប្បន្នលោកថាក់ស៊ីន ស្ថិតនៅក្រុងមូស្គូ ប្រទេសរុស្ស៊ី និងបានធ្វើដំណើរទៅប្រទេសអង់គ្លេសនៅថ្ងៃទី៣និងទី៤សីហា នៅមុនពេលចាកចេញទៅសហរដ្ឋអាមេរិក ដោយចំណាយពេលស្នាក់នៅប្រហែល២សប្តាហ៍ ទើបធ្វើដំណើរបន្តទៅទ្វីបអាស៊ី អាចឆ្ពោះទៅប្រទេសចិន ។
សម្រាប់ការធ្វើដំណើរទៅសហរដ្ឋអាមេរិករបស់លោកថាក់ស៊ីន ជាការធ្វើដំណើរលក្ខណៈផ្ទាល់ខ្លួនដើម្បីបានជួបនឹងជនជាតិថៃ រួមទាំងអ្នកនយោបាយរបស់មេរិកដែលមានភាពជិតស្និទ្ធ ។ នៅក្នុងអំឡុងពេលនោះ លោកថាក់ស៊ីនអាចជួបពិភាក្សាជាមួយក្រុមពាណិជ្ជករ ដែលមានចំណាប់អារម្មណ៍នឹងចូលវិនិយោគទុនក្នុងប្រទេសថៃ ។ លោកថាក់ស៊ីន នឹងប្រើឱកាសនេះសម្រាប់ផ្តល់ទិន្នន័យគួបផ្សំនឹងការសម្រេចចិត្តក្នុងការវិនិយោគ ដោយបញ្ជាក់ថា ប្រទេសថៃកំពុងក្លាយជាមជ្ឈមណ្ឌលសមាគមអាស៊ាន និងជាមជ្ឈមណ្ឌលទូរគមនាគមន៍ ។
ស្របពេលជាមួយគ្នានេះដែរ នៅក្នុងប្រព័ន្ធគេហទំព័រថៃអីុញូវ (Thaienews) ផ្សាយឱ្យដឹងថា ជនជាតិថៃនៅសហរដ្ឋអាមេរិកកំពុងត្រៀមស្វាគមន៍លោកថាក់ស៊ីន ដែលនឹងធ្វើដំណើរទៅសហរដ្ឋអាមេរិកក្នុងអំឡុងពេលពីថ្ងៃទី១១ដល់១៣ សីហា ដោយក្រុមអាវក្រហមនៅអាមេរិកនឹងរៀបចំផ្តល់ម្ហូបអាហារ និងភេសជ្ជៈដោយគិតថ្លៃចំពោះអ្នកចូលរួមចំនួន៥កន្លែង ។ ក្រៅពីនេះក៏មានការត្រៀមទីតាំងនៅបរិវេណវត្តថៃ North Hollywood ដើម្បីទទួលស្វាគមន៍ផងដែរ ៕
ចែករំលែកព័តមាននេះ