រាជធានីភ្នំពេញ ៖ បុរស២នាក់បានត្រូវកម្លាំងកងរាជអាវុធហត្ថខណ្ឌចំការមនឃាត់ខ្លួនភ្លាមៗ បន្ទាប់ពីបាញ់ទម្លុះជញ្ជាំងបន្ទប់ខារ៉ាអូខេ«បុប្ផាជាយដែន»មួយគ្រាប់ នៅចំពោះមុខក្រុមស្រីស្អាត កាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី៣ សីហា ស្ថិតក្នុងសង្កាត់បឹងត្របែក ខណ្ឌចំការមន ។ បុរសជាអ្នកបាញ់នេះឈ្មោះសុខ ទិត្យ អាយុ៣២ឆ្នាំ ជាមន្ត្រីប៉ូលិស មានតួនាទីជាអនុប្រធានការិយាល័យពន្ធនាគារប៉េហ្ស៊ី ស្នាក់នៅផ្ទះលេខ៨៦៣ មហាវិថីព្រះមុនីវង្ស សង្កាត់ផ្សារដើមថ្កូវ ខណ្ឌចំការមន ។ ចំណែកបុរសម្នាក់ទៀតដែលទៅជាមួយឈ្មោះប្រាក់ នាង អាយុ៣២ឆ្នាំ ជាមន្ត្រីនគរបាលដែរនិងមានទីលំនៅភូមិក្របៅ ឃុំក្របៅ ស្រុកកំចាយមារ ខេត្តព្រៃវែង ។
ប្រភពព័ត៌មានបានឱ្យដឹងថា បុរសទាំង២នាក់ខាងលើចូលភោជនីយដ្ឋាននេះតាំងពីវេលាម៉ោង១០និង៥០នាទីយប់រហូតដល់ម៉ោងជាង១រំលងអធ្រាត្រ ក៏បាញ់១គ្រាប់ទម្លុះជញ្ជាំងបន្ទប់ខារ៉ាអូខេ ដោយកាំភ្លើងCZ75ធ្វើឱ្យផ្អើលឆោឡោឡើង ។ នៅចំពោះមុខកងរាជអាវុធហត្ថខណ្ឌ ជននេះសារភាពថា រូបគេខឹងក្រុមនាងៗនៅក្នុងបន្ទប់ ទើបបាញ់បែបនេះ ។ ចំពោះការបាញ់បោះធ្វើឱ្យផ្អើលក្នុងភោជនីយដ្ឋាន«បុប្ផាជាយដែន»នេះដែរ ម្ចាស់ភោជនីយដ្ឋានបានដាក់ពាក្យបណ្តឹងទាមទារសំណងចំនួន១ម៉ឺនដុល្លារ ។
បន្ទាប់ពីកើតហេតុភ្លាមៗ ជនបង្កត្រូវបានកងរាជអាវុធហត្ថឃាត់ខ្លួននាំយកទៅសាកសួរនៅបញ្ជាការដ្ឋានកងរាជអាវុធហត្ថខណ្ឌចំការមន ដើម្បីកសាងសំណុំរឿងបញ្ជូនបន្តទៅបញ្ជាការដ្ឋានកងរាជអាវុធហត្ថរាជធានីភ្នំពេញទៀត ។
លោកវរសេនីយ៍ឯក ពូ ដាវី មេបញ្ជាការរង និងជាប្រធានមន្ទីរសន្តិសុខព័ត៌មាននៃបញ្ជាការដ្ឋានកងរាជអាវុធហត្ថរាជធានីភ្នំពេញ នាព្រឹកថ្ងៃទី៣ សីហា បានប្រគល់មន្ត្រីនគរបាលទាំង២នាក់ឱ្យទៅសាមីអង្គភាពវិញ ដើម្បីចាត់ការតាមនីតិវិធីកងកម្លាំង ។ លោកវរសេនីយ៍ឯក បញ្ជាក់ថា ពួកគេជាមន្ត្រីនគរបាល ឯកងរាជអាវុធហត្ថមានភារកិច្ចឃាត់ខ្លួនជនប្រព្រឹត្តបទល្មើស ហើយបើជននេះជាទាហាន ឬជនប្រដាប់អាវុធគ្មានក្របខណ្ឌ ទើបអង្គភាពកងរាជអាវុធហត្ថចាត់ការតាមផ្លូវច្បាប់ តែនេះពួកគេជាមន្ត្រីនគរបាល ដូច្នេះត្រូវប្រគល់ឱ្យទៅអង្គភាពគេវិញ ។
ទាក់ទិននឹងការផ្ទុះអាវុធនេះ តាមចម្លើយមន្ត្រីនគរបាលទាំង២នាក់និយាយថា លោកប្រាក់ នាង ដែលជាប្រធានផ្នែកកាន់សោពន្ធនាគារ អត់បានដឹងអីទេ ព្រោះពេលនោះគាត់កំពុងដេកលក់លើសាឡុង ដោយសារស្រវឹងជោកជាំទៅហើយ ។ រីឯចម្លើយលោកសុខ ទិត្យ វិញបានឱ្យដឹងថា មុនពេលចូលច្រៀងខារ៉ាអូខេនៅហាង«បុប្ផាជាយដែន»នោះ ពួកគេទាំង២នាក់បានទៅហូបចុកនៅផ្ទះលោកឧកញ៉ាម្នាក់ ស្រវឹងខ្លះទៅហើយ ។ លុះពេលចូលច្រៀងនៅក្នុងបន្ទប់មាននារីរត់តុម្នាក់ និងអ្នកចាក់ឌីសម្នាក់ ឯលោកប្រាក់ នាង បានច្រៀងបានតែ១បទក៏ដេកលក់លើសាឡុងទៅ ចំណែកខ្លួននៅច្រៀងលេងបន្ត ។ ពេលអង្គុយច្រៀងនោះ ខ្លួនសៀតកាំភ្លើងខ្លីនៅចង្កេះ ប៉ុន្តែពេលអង្គុយយូរពេកទៅតឹងពោះក៏ដកកាំភ្លើងចេញក្នុងបំណងដាក់លើសាឡុង ហើយពេលដកចេញនោះក៏អាម៉េយកគ្រាប់ចេញ ស្រាប់តែផ្ទុះគ្រាប់តែម្តង ។ លោកគ្មានចេតនាទៅបាញ់សម្លុតគំរាមអ្នកណាម្នាក់ឡើយ ព្រោះសូម្បីថៅកែហាងក៏ជាមនុស្សរាប់អានគ្នាដែរ ។
យោងតាមរបាយការណ៍របស់សមត្ថកិច្ចបានឱ្យដឹងថា រាល់ការផ្ទុះអាវុធកន្លងមក ទោះនៅក្នុងហាងផឹកស៊ី ឬផ្ទះសំណាក់ សណ្ឋាគារក៏ដោយ គណៈបញ្ជាការឯកភាពរាជធានីភ្នំពេញតែងតែតម្រូវឱ្យបិទឈប់ធ្វើអាជីវកម្ម១រយៈ ។ ដូចជាករណីផ្ទុះអាវុធនៅហាងខារ៉ាអូខេ«បុប្ផាជាយដែន»កាលពីវេលាម៉ោង១និង៣៥នាទីរំលងអធ្រាត្រឈានចូលថ្ងៃទី៣ សីហា នោះ ហាងនេះក៏ត្រូវប្រឈមនឹងការបិទទ្វារ ផ្អាកធ្វើអាជីវកម្មមួយរយៈដែរ ។ ការអះអាងបែបនេះ ព្រោះដោយសារតែម្ចាស់អាជីវកម្មបណ្តែតបណ្តោយឱ្យអ្នកប្រើប្រាស់អាវុធយកអាវុធចូលកន្លែងផឹកស៊ី ដែលច្បាប់ហាមឃាត់ ៕
ចែករំលែកព័តមាននេះ