រាជធានីភ្នំពេញ ៖ ការផ្តល់សក្ខីកម្មនៅសវនាការក្នុងសាលាក្តីខ្មែរក្រហមនាប៉ុន្មានថ្ងៃកន្លងមកនេះ ឈ្មោះរបស់លោកហោ ណាំហុង លោកគាត ឈន់ រហូតដល់សម្តេចឪ សម្តេចម៉ែ ត្រូវបានលើកយកមកនិយាយដោយមានការចោទថា លោកឧបនាយករដ្ឋមន្ត្រីហោ ណាំហុង ជាអ្នកទទួលខុសត្រូវនៅជំរំឃុំខ្លួនបឹងត្របែក ។ ការចោទនេះមិនមានអ្វីថ្មីនោះទេ ហើយអ្វីដែលត្រូវបានកត់សម្គាល់នាពេលកន្លងមកនោះ គឺលោកឧបនាយករដ្ឋមន្ត្រីហោ ណាំហុង តែងតែបានឈ្នះក្តីលើការចោទប្រកាន់នេះ តាមផ្លូវតុលាការក្នុងស្រុក និងនៅតុលាការប្រទេសបារាំង។
ដោយសារតែមានការទូងស្គរសាជាថ្មីតាមប្រព័ន្ធផ្សព្វផ្សាយក្រៅស្រុកមួយចំនួនជុំវិញការផ្តល់សក្ខីភាពនោះ នៅថ្ងៃទី២ សីហា លោកឧបនាយករដ្ឋមន្ត្រីហោ ណាំហុង បានចេញផ្សាយមតិខ្លីមួយរបស់លោកឆ្លើយតបទៅនឹងអ្វីដែលបានចោទប្រកាន់មកលើរូបលោកសាជាថ្មីនេះ ដែលលោកបានចាត់ទុកថា គឺជាការប៉ុនប៉ងធ្វើនយោបាយភាវូបនីយកម្មតុលាការ ឬបង្កឱ្យមានការខ្វែងគំនិតគ្នាដែលជាទង្វើមិនសមស្របទេ ។ លោកបានបញ្ចប់ដោយសង្ឃឹមថា នៅថ្ងៃណាមួយនឹងរកឃើញយុត្តិធម៌ និងកេរដំណែលខ្មែរក្រហមដែលនឹងត្រូវបោះចោលទៅក្នុងធុងសំរាមប្រវត្តិសាស្ត្រដោយលែងមានអ្នកការពារ ឬការខ្វែងគំនិតគ្នាទៀត ។
ក្រុមអ្នកវិភាគបានមើលឃើញថា ការផ្តល់សក្ខីកម្មដែលមានការសួរដេញដោលដោយមេធាវីការពារក្តី នួន ជា គឺជាការគាស់កកាយឱ្យមានរឿងចម្រូងចម្រាសទាក់ទងនឹងមន្ត្រីជាន់ខ្ពស់ ដែលចេតនានេះត្រូវបានលោកឧបនាយករដ្ឋមន្ត្រីហោ ណាំហុង ចាត់ទុកថាវាជារឿងអកុសលណាស់ ដែលអ្នកបន្តការពារកេរដំណែលខ្មែរក្រហមខិតខំបង្វែរការយកចិត្តទុកដាក់ចេញពីកេរមរតករបស់ខ្មែរក្រហម ។ កោះសន្តិភាពសូមថតចម្លងផ្សព្វផ្សាយនូវលិខិតឆ្លើយតបជា សាធារណៈរបស់លោកឧបនាយករដ្ឋមន្ត្រី ហោ ណាំហុង ទៅលើការចោទប្រកាន់ថា លោកជាអ្នកទទួលខុសត្រូវជំរំបឹងត្របែក ។
ចែករំលែកព័តមាននេះ