ខេត្តកំពង់ស្ពឺ ៖ យ៉ាងហោចណាស់ឆ្នួនផ្ទុះ(គីប)សម្រាប់បំផ្ទុះថ្មភ្នំចំនួនជាង៩០គីប បានបាត់ពីឃ្លាំងរបស់ក្រុមហ៊ុនថ្មអោ ធី ដែលមានទីតាំងក្នុងភូមិត្រពាំងអត់ទឹក ឃុំគិរីវ័ន្ត ស្រុកភ្នំស្រួច កាលពីយប់ថ្ងៃទី១ សីហា ។ ឃ្លាំងដែលបាត់ឆ្នួនផ្ទុះនេះ ត្រូវបានរកឃើញថា ត្រូវគេកាត់ផ្តាច់សោទ្វារឃ្លាំងចំនួនពីរជាន់ និងគាស់បំបាក់យកឆ្នួនផ្ទុះអស់ពីឃ្លាំង ។
តាមប្រភពព័ត៌មានពីកម្មកររោងចក្រកិនថ្ម អោ ធី នេះបានឱ្យដឹងថា នៅវេលាម៉ោង៤និង៣០នាទីទៀបភ្លឺថ្ងៃទី ២ សីហា ពេលកម្មករចូលទៅបើកទ្វារយកគីប(ឆ្នួនផ្ទុះ) ដើម្បីរៀបចំដាក់បំផ្ទុះថ្មភ្នំដូចធម្មតា ក៏ឃើញទ្វារឃ្លាំងទាំងពីរជាន់របើកបាក់ ទើបផ្អើលឆោឡោដល់មេការ និងអ្នកបកប្រែភាសាចិនទៅពិនិត្យ និងដឹងថា កិបឆ្នួនផ្ទុះបានបាត់អស់ពីឃ្លាំង ។
ដោយមានសេចក្តីរាយការណ៍ពីលោក ហេង ស៊ីថា ដែលជាអ្នកបកប្រែភាសាចិន ទើបមានកិច្ចប្រតិបត្តិការត្រួតពិនិត្យឃ្លាំងសម្ភារផ្ទុកកិបបំផ្ទុះនេះជាបន្ទាន់ដែរ ដោយមានកម្លាំងយោធា ប៉េអឹម ប៉ូលិសបច្ចេកទេស និងតុលាការចូលរួមផង និងពិនិត្យឃើញថា បាត់អស់ពីឃ្លាំងប្រាកដមែន ដោយជនល្មើសលួចគាស់ទ្វារឃ្លាំង ។ បន្ទាប់មកក៏បន្តស្រាវជ្រាវ និងឃាត់ខ្លួនជនសង្ស័យពីរនាក់ភ្លាមៗនាំយកមកឃុំុនៅការិយាល័យកណ្តាលនគរបាលព្រហ្មទណ្ឌខេត្ត រង់ចាំចាប់មុខសញ្ញាបន្តទៀត ៕
ចែករំលែកព័តមាននេះ