រាជធានីភ្នំពេញ ៖ បើទោះបីជាស្ថានភាពនៃជំងឺគ្រុនឈាមមានការថយចុះ ប៉ុន្តែមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ នៃក្រសួងសុខាភិបាល នៅតែអំពាវនាវដល់មាតាបិតា អាណាព្យាបាលទាំងអស់ ឱ្យមានការប្រុងប្រយ័ត្ន ព្រោះតាមការសង្កេតបទពិសោធន៍កន្លងមក លុះត្រាតែដល់សប្តាហ៍ទី៣០-៣១ នៃឆ្នាំនីមួយៗទើបករណីជំងឺគ្រុនឈាមចាប់ផ្តើមថយចុះមែនទែន ។ មូលហេតុនាំឱ្យមានការអំពាវនាវដូច្នេះដោយសារតែមូសនៅតែមានចំនួនច្រើនជាងឆ្នាំ ២០០៧ ដែលជាឆ្នាំផ្ទុះជំងឺគ្រុនឈាមមានអត្រាខ្ពស់ ។
លោក ច ម៉េងចួរ នាយកមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ បានបញ្ជាក់ឡើងវិញថា ក្នុងសប្តាហ៍ទី២៩ ឆ្នាំ២០១២នេះ ករណីគ្រុនឈាមចូលសម្រាកព្យាបាលនៅសេវាសាធារណៈមានចំនួន១៩.៨៨៦នាក់ ក្នុងនោះស្លាប់៧១នាក់ ប្រៀបធៀបរយៈពេលដូចគ្នាក្នុងឆ្នាំ២០១១ កើន២១៩ភាគរយ ។ ប៉ុន្តែកំណើននេះមិនខ្លាំងដូចសប្តាហ៍ទី១៩ នៃឆ្នាំ២០១១-២០១២ទេ ហើយកាន់តែទាបថែមទៀតបើប្រៀបធៀបនឹងឆ្នាំ២០០៧ ។ លោកបន្តថា ខេត្តដែលមានអត្រាជំងឺខ្ពស់ជាងគេគឺ ឧត្តរមានជ័យ បន្ទាយមានជ័យ សៀមរាប កំពង់ស្ពឺ កណ្តាល កំពង់ធំ ព្រៃវែង ។ ដោយឡែក ខេត្តក្រចេះ ពោធិ៍សាត់ មណ្ឌលគិរី ស្ទឹងត្រែង រតនគិរី កែប ពុំមានករណីជំងឺគ្រុនឈាមទេ ។
យ៉ាងណាក៏ដោយ លោក ច ម៉េងចួរ បានអំពាវនាវជាថ្មីម្តងទៀត ដល់មាតាបិតា អាណាព្យាបាលទាំងអស់ បន្តការប្រុងប្រយ័ត្នព្រោះរយៈពេលនៃការចម្លងជំងឺគ្រុនឈាមមិនទាន់បញ្ចប់នៅឡើយទេ ។ លោកថ្លែងថា បច្ចុប្បន្ននេះចំនួនដង្កូវទឹកជិតដុះស្លាបហើយមាន៣ក្បាលសម្រាប់ប្រជាជនម្នាក់ ខណៈដែលសន្ទស្សន៍សុវត្ថិភាពកំណត់ដោយអង្គការសុខភាពពិភពលោកមិនឱ្យលើសពីមួយក្បាលសម្រាប់មនុស្សម្នាក់ ។ ទន្ទឹមនោះ លោកនាយកមជ្ឈមណ្ឌលបានផ្ញើសារជាគន្លឹះសម្រាប់មាតាបិតា និងអាណាព្យាបាលទាំងអស់ថា ការកម្ចាត់ដង្កូវទឹកជាកាតព្វកិច្ចរបស់គ្រួសារ និងសហគមន៍ហើយពុំមានប្រទេសណាមួយចំណាយបុគ្គលិកចុះសម្អាតតាមផ្ទះប្រជាជននោះទេ ប៉ុន្តែបើមានចុះតាមផ្ទះនោះគឺគេផាកពិន័យប្រសិនបើមានដង្កូវទឹក ។ ចំណែករដ្ឋមានកាតព្វកិច្ចផ្តល់ព័ត៌មានត្រឹមត្រូវជូនប្រជាជន ។ គ្រុនឈាមមិនអាចព្យាបាលតាមផ្ទះឬតាមភូមិដូចជំងឺគ្រុនចាញ់ទេ ហេតុនេះមាតាបិតា និងអាណាព្យាបាលមានកាតព្វកិច្ចបញ្ជូនកុមារសង្ស័យទៅមន្ទីរពេទ្យ ទោះជាគ្រូពេទ្យឯកទេសចូលក្នុងផ្ទះប្រជាជនក៏គង់តែបញ្ជូនកុមារគ្រុនឈាមមកមន្ទីរពេទ្យដែរ។
ការចូលរួមដាក់ថ្នាំអាបែត ជាផ្នែកមួយការពារមិនឱ្យមានដង្កូវទឹកក្នុងពាង ប៉ុន្តែមិនការពារដង្កូវទឹកដែលដក់ក្រៅពាងដូចជាសំបកកំប៉ុង សំបកដូង កង់រថយន្ត ទឹកថ្លុក ភក់ជ្រាំនោះទេ ។ មាតាបិតា និងអាណាព្យាបាលត្រូវស្លៀកពាក់ខោអាវដៃវែងដល់កុមារពេលវារត់លេង ។ ចំពោះការគេងយប់ឬថ្ងៃគឺត្រូវឱ្យគេងក្នុងមុងជាចាំបាច់ ៕
ចែករំលែកព័តមាននេះ