ខេត្តប៉ៃលិន ៖ យុវជន២នាក់ទៅមើលគេរាំលេងកម្សាន្តសប្បាយក្នុងពិធីបុណ្យព្រះសង្ឃចូលព្រះវស្សានៅក្នុងវត្តសាមគ្គីសេរីសំរិទ្ធិ ហៅវត្តសាលាក្រៅ លុះចប់កម្មវិធីត្រឡប់មកកន្លែងវិញ ត្រូវក្រុមក្មេងទំនើងដេញវាយ បណ្តាលឱ្យរងរបួសស្រាលម្នាក់ និងធ្ងន់ម្នាក់ ត្រូវបានអ្នកជិតខាងឃើញនាំគ្នារត់ទៅជួយ ហើយដឹកយកទៅព្យាបាលនៅមន្ទីរពេទ្យឯកជនមួយនៅក្បែរកន្លែងកើតហេតុ តែដោយម្នាក់ទៀតរបួសធ្ងន់ត្រូវបានគេបញ្ជូនបន្តទៅកាន់មន្ទីរពេទ្យបង្អែកខេត្ត។
ហេតុការណ៍នេះកើតឡើងកាលពីវេលាម៉ោង១១និង៣០នាទីយប់ថ្ងៃទី២ សីហា ២០១២ ត្រង់ចំណុចបរិវេណសាលាបឋមសិក្សាសាលាក្រៅ ស្ថិតក្នុងភូមិអូរអណ្តូង ឃុំសាលាក្រៅ ស្រុកសាលាក្រៅ។ ប្រភពព័ត៌មានបានឱ្យដឹងថា នៅមុនពេលកើតហេតុមានយុវជន២នាក់ ជាកម្មករស៊ីឈ្នួលដើរជីកអណ្តូង ស្នប់តាមភូមិឱ្យថៅកែម្នាក់ បានមកជីកអណ្តូងនៅស្រុកសាលាក្រៅជាយូរថ្ងៃមកហើយ។ យុវជនរងគ្រោះទី១-ឈ្មោះទឹម សំណាង ហៅចំរើន អាយុ២០ឆ្នាំ ត្រូវក្មេងទំនើងវាយចំក្បាលផ្នែកខាងមុខបែកដេរនៅមន្ទីរពេទ្យឯកជនអស់៤ថ្នេរ ចំណែកជនរងគ្រោះ ទី២-ឈ្មោះប្រុស ឈឿន អាយុ១៨ឆ្នាំ រងរបួសធ្ងន់ត្រូវគុម្ពត្រចៀកខាងឆ្វេង និងបែកក្បាលត្រូវបានគេបញ្ជូនទៅ កាន់មន្ទីរពេទ្យបង្អែកខេត្តដេរអស់១៤ថ្នេរ ទាំង២នាក់ជាកម្មករស៊ីឈ្នួលជីកអណ្តូងស្នប់ឱ្យគេមានស្រុកកំណើតរស់នៅជាមួយគ្នា ស្ថិតក្នុងភូមិភ្នំរន្ទះ ឃុំអង្គប្រាសាទ ស្រុកគិរីវង់ ខេត្តតាកែវ។
ប្រភពបន្តទៀតថា នៅថ្ងៃកើតហេតុក្នុងវត្តសាមគ្គីសេរីសំរិទ្ធិ ហៅវត្តសាលាក្រៅមានពិធីព្រះសង្ឃចូល ព្រះវស្សា និងមានការរាំកម្សាន្តសប្បាយទាំងយុវជន នារី និងចាស់ៗជាច្រើននាក់។ ពេលនោះគេឃើញយុវជនជាកម្មករស៊ីឈ្នួលជីកអណ្តូងក៏ទៅចូលរួមមើលការលេងរាំកម្សន្តនេះដែរ រហូតដល់ យប់ថ្ងៃ ខាងលើ កម្មវិធីក៏បានចប់សព្វគ្រប់ រួចយុវជនរងគ្រោះទាំង២នាក់នេះបានដើរត្រឡប់ទៅកន្លែងធ្វើការវិញ លុះដើរបានមួយសន្ទុះ ស្រាប់តែមានក្រុមក្មេងទំនើងជាង១០នាក់បានដើរតាមពីក្រោយ ដោយអ្នកខ្លះកាន់ដំបង អ្នកខ្លះទៀតកាន់ដុំថ្មនៅ នឹងដៃដេញគប់និងវាយយុវជនទាំង២នាក់នេះតែម្តង។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ