មហាសន្និបាត អ.ស.ប ត្រូវអនុម័តនាថ្ងៃទី៣សីហានូវដំណោះស្រាយមួយដាក់ដោយបណ្តាប្រទេសអារ៉ាប់ដែលបរិហារចំពោះការវាយប្រហារទីក្រុងទាំងឡាយដែលពួកឧទ្ទាមចូលកាន់កាប់ដោយកងទ័ពស៊ីរីហើយទាមទារឱ្យមានការឆ្លងកាត់នយោបាយមួួយនៅស៊ីរី ។
ការផ្តួចផ្តើមគំនិតនោះពិសេសគ្រាន់តែជានិមិត្តរូបពីព្រោះមហាសន្និបាតពុំអាចចេញអនុសាសន៍នានាឡើយផ្ទុយពីក្រុមប្រឹក្សាសន្តិសុខ។ ក៏ប៉ុន្តែដំណោះស្រាយនេះអាចរួមចំណែកបង្កើនការគាបសង្កត់លើក្រុងដាម៉ាស់ប្រសិនប្រទេសទាំង១៩៣ជាសមាជិកបោះឆ្នោតគាំទ្រភាគច្រើនហើយពុំមានសិទ្ធិវេតូ ។ ការបោះឆ្នោតអនុម័តគម្រោងដំណោះស្រាយនោះធ្វើឡើងបន្ទាប់ពីការលាលែងរបស់លោកកូហ្វីអាណាន់ពីបេសកជនពិសេសរួមរបស់អ.ស.ប និងរបស់សម្ព័ន្ធអារ៉ាប់សម្រាប់ស៊ីរី ។ ផ្ទុយពីគម្រោងដំណោះស្រាយមុនៗ គម្រោងដំណោះស្រាយចុងក្រោយនេះពុំទាមទារឱ្យលោកអាសាដចាកចេញពីអំណាចឬឱ្យអនុវត្តការដាក់ទណ្ឌកម្មដូចដំណោះស្រាយទាំងឡាយអនុម័ត ដោយសម្ព័ន្ធអារ៉ាប់កាលពីខែវិច្ឆិកាឆ្នាំ២០១១ឡើយ ។ គម្រោងដំណោះស្រាយលើកនេះគូសបញ្ជាក់ពីការព្រួយបារម្ភចំពោះអាវុធគីមីស៊ីរីដោយស្នើដល់ក្រុងដាម៉ាស់កុំប្រើប្រាស់វា ហើយស្តុកវាទុកដោយមានសន្តិសុខគ្រប់គ្រាន់។ ដំណោះស្រាយក៏ទាមទារផងដែរឱ្យរដ្ឋាភិបាលបើកច្រកចេញចូលដោយសេរីសម្រាប់បណ្តាអង្គការមនុស្សធម៌ ។
អង្គការសិទ្ធិមនុស្សស៊ីរី OSDH រាយការណ៍កាលពីថ្ងៃទី៣សីហាថា ជនស៊ីវិលយ៉ាងតិច១៥នាក់ ក្នុងនោះមានកុមារ២នាក់ ស្លាប់កាលពីថ្ងៃទី២សីហា ដោយសារការបាញ់គ្រាប់កាំភ្លើងត្បាល់លើជំរំជនភៀសខ្លួនប៉ាឡេស្ទីន នៅយ៉ាមុខក្រុងដាម៉ាស់ ។ OSDH បន្តថា ម្យ៉ាងទៀតមានការវាយប្រហារយ៉ាងខ្លាំងនាពេលយប់ក្នុងតំបន់ហ៊ូឡា ភាគកណ្តាលប្រទេសដែលនៅទីនោះមនុស្សជិត១០០នាក់ត្រូវសម្លាប់កាលពីខែឧសភា កន្លងមកនេះ ។
ក្នុងការប្រយុទ្ធគ្នាយ៉ាងស្វិតស្វាញទីក្រុងអាឡែបក្លាយជាទីក្រុងខ្មោចគ្របដណ្តប់ដោយផេះហើយហាងទំនិញទាំងឡាយក្នុងទីក្រុងសេដ្ឋកិច្ចធំនោះត្រូវបិទរួចប្រជាជននាំគ្នារត់ភៀសខ្លួនចេញ ៕
ចែករំលែកព័តមាននេះ