រាជធានីភ្នំពេញ ៖ បុរស២នាក់ត្រូវកម្លាំងកងរាជអាវុធហត្ថខណ្ឌចំការមនឃាត់ខ្លួន បន្ទាប់ពីជននេះដកកាំភ្លើងម៉ាក CZ75 បាញ់បោះទម្លុះជញ្ជាំងបន្ទប់ខារ៉ាអូខេបុប្ជាជាយដែនមួយគ្រាប់នៅចំពោះមុខស្រីស្អាតបង្កឱ្យមានការភ្ញាក់ផ្អើលឆោឡោ កាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី៣ សីហា ក្នុងសង្កាត់បឹងត្របែក ខណ្ឌចំការមន ។
បុរសជាអ្នកបាញ់បោះឈ្មោះសុខ អាទិត្យ អាយុ៣២ឆ្នាំ ជាមន្រ្តីប៉ូលិសតួនាទីអនុប្រធានការិយាល័យពន្ធនាគាររាជធានីភ្នំពេញ PJ ស្នាក់នៅផ្ទះលេខ៨៦៣ មហាវិថីព្រះមុនីវង្ស សង្កាត់ផ្សារដើមថ្កូវ ខណ្ឌចំការមន។ ចំណែកម្នាក់ទៀតដែលទៅជាមួយឈ្មោះប្រាក់ នាង អាយុ៣២ឆ្នាំ មានទីលំនៅភូមិក្របៅ ឃុំក្របៅ ស្រុកកំចាយមារ ខេត្តព្រៃវែង។ បន្ទាប់ពីកើតហេតុជនបង្កទាំងពីរនាក់ត្រូវបានកម្លាំងកងរាជអាវុធហត្ថឃាត់ខ្លួនភ្លាមៗ ។ នៅចំពោះមុខ កងរាជអាវុធហត្ថជនបង្កបានសារភាពថា រូបគេខឹងនឹងស្រីនៅក្នុងបន្ទប់ទើបបាញ់បែបនេះ ។
ចំពោះការបាញ់បោះធ្វើឲ្យផ្អើលក្នុងភោជនីយដ្ឋានបុប្ជាជាយដែននេះម្ចាស់ភោជនីយដ្ឋានបានដាក់ពាក្យបណ្តឹងទាមទារសំណងចំនួន១ម៉ឺនដុល្លារ ។ ជនបង្កត្រូវកម្លាំងកងរាជអាវុធហត្ថឃាត់ខ្លួនយកទៅសាកសួរនៅទីបញ្ជាការកងរាជអាវុធហត្ថខណ្ឌចំការមន ដើម្បីកសាងសំណុំរឿងបញ្ជូនទៅទីបញ្ជាការកងរាជអាវុធហត្ថរាជធានីភ្នំពេញ ចាត់ការតាមនីតិវិធី ៕
ចែករំលែកព័តមាននេះ