រាជធានីភ្នំពេញ ៖មានករណីគ្រោះថ្នាក់ចរាចរណ៍រវាងរថយន្តប៉ាហ្សេរ៉ូបើកបរដោយជនជាតិឥណ្ឌា ស្រវឹងជោកទៅបុកជាមួយរថយន្តដឹកទឹកកកបណ្តាលឱ្យធ្លាក់ទឹកកករាយពេញផ្លូវ ចំណែកបុរសជនជាតិឥណ្ឌារបួសបែកមាត់ កាលពីវេលាម៉ោង៣និង៤០នាទីទៀបភ្លឺថ្ងៃទី៣ សីហា តាមផ្លូវលេខ១៨២ កែងផ្លូវលេខ២៦១ ចំណុចស្តុបម្តុំភោជនីយដ្ឋានទីក្រុងបៃតង ស្ថិតក្នុងសង្កាត់ទឹកល្អក់ទី២ ខណ្ឌទួលគោក ។
សាក្សីឃើញហេតុការណ៍បានឱ្យដឹងថា រថយន្តប៉ាហ្សេរ៉ូ ពណ៌ទឹកប្រាក់បើកបរដោយបុរសជនជាតិឥណ្ឌា តាមផ្លូវលេខ១៨២ពីកើតទៅលិច បើកលឿនក្នុងស្ថានភាពស្រវឹង ចំណែករថយន្តកូរ៉េចំណុះ២តោនកន្លះ ពណ៌ខៀវ ដឹកទឹកកកដើមធំចំនួន៧០ដើមបើកតាមផ្លូវលេខ២៦១ ពីជើងទៅត្បូង ខណៈមកដល់ផ្លូវជាប់ភោជនីយដ្ឋានទីក្រុងបៃតង រថយន្តកូរ៉េឆ្លងស្តុបជិតផុតហើយ ស្រាប់តែរថយន្តប៉ាហ្សេរ៉ូបុកចំជញ្ជាំងចំហៀងខាងឆ្វេងរបើកជញ្ជាំងធ្លាក់ទឹកកករាយពេញផ្លូវ ។ ចំណែករថយន្តប៉ាហ្សេរ៉ូស្រុញផ្នែកខាងមុខ បែកកញ្ចក់មុខឯម្ចាស់របួសបែកមាត់ ។
អ្នកបើករថយន្តដឹកទឹកកកឈ្មោះឆៃយ៉ា ភេទប្រុស អាយុ២៣ឆ្នាំ ស្នាក់នៅសង្កាត់គីឡូម៉ែត្រលេខ៦ ខណ្ឌឫស្សីកែវ បើករថយន្តដឹកទឹកកកពីសិប្បកម្មគីឡូម៉ែត្រលេខ៦ យកទៅដាក់ឱ្យម៉ូយនៅខណ្ឌទួលគោក ។ ទឹកកកក្នុងរថយន្តទាំងអស់មាន៧០ដើម ។ ចំណែកបុរសជនជាតិឥណ្ឌាមិនស្គាល់អត្តសញ្ញាណបានប្រកែកថារូបគាត់មិនមែនជាអ្នកបុកទេ ដោយសាររថយន្តរបស់គាត់បើកលើផ្លូវអាទិភាព ហើយរថយន្តដឹកទឹកកកបើកឆ្លងផ្លូវ ។
ទោះបីជាផ្លូវអាទិភាព ឫផ្លូវមិនអាទិភាពក៏ដោយ អ្នកបើកបរទាំងអស់គួរតែមានការយោគយល់គ្នាទើបចៀសផុតពីគ្រោះថ្នាក់ចរាចរណ៍ ។ ក្រោយពេលកើតហេតុរថយន្តទាំងពីរគ្រឿងត្រូវប៉ូលិសយកទៅរក្សាទុកនៅខណ្ឌទួលគោករង់ចាំដោះស្រាយ ៕
ចែករំលែកព័តមាននេះ