រាជធានីភ្នំពេញ ៖ បុរសស្រវឹងម្នាក់បានបើករថយន្តម៉ាក MITSUBISHI ពណ៌ប្រផេះ មួយគ្រឿងយ៉ាងលឿនហើយរេចង្កូតពេញផ្លូវទៅបុករបងការដ្ឋានសំណង់មួយកន្លែងពេញទំហឹង បណ្តាលឱ្យបាក់អស់មួយផ្ទាំងរាបដល់ដី ឯរថយន្តបង្កហេតុបែកកង់ឆ្វេងខាងក្រោយ និងខ្ទេចមួយកំណាត់មុខកៀបជាប់ជាមួយរបងកាលពីវេលាម៉ោង៤និង៣៥នាទីទៀបភ្លឺថ្ងៃទី៣ សីហា តាមបណ្តោយផ្លូវណតប្រ៊ីតស្ថិតក្នុងភូមិស្លែងរលើង សង្កាត់ទឹកថ្លា ខណ្ឌសែនសុខ ក្បែរស្ថានីយទូរទស្សន៍អាស៊ីអាគ្នេយ៍ ។
យោងតាមសម្តីរបស់លោកហឿង រឿន នាយរងផ្នែកសណ្តាប់ធ្នាប់ចរាចរណ៍ជើងគោក ខណ្ឌសែនសុខ បានឱ្យដឹងថា មុនពេលកើតហេតុគេឃើញរថយន្ត MITSUBISHI ពណ៌ប្រផេះមួយគ្រឿងបើកបរដោយបុរសជនបរទេសម្នាក់ស្រវឹងស្រាក្នុងល្បឿនលឿនតាមផ្លូវណតប្រ៊ីត ក្នុងទិសដៅពីត្បូងទៅជើងស្រាប់មកដល់ចំណុចកើតហេតុក៏រេចង្កូតទៅបុករបងថ្មបាំងស័ង្កសីបណ្តាលឱ្យបាក់ខ្ទេចខ្ទី ឯរថយន្តបង្កខ្ទេចមួយកំណាត់ខាងមុខកៀបជាប់ជាមួយរបងទៅមុខលែងរួច។
លោកហឿង រឿន បន្តថា ក្នុងហេតុការណ៍គ្រោះថ្នាក់នេះមិនបណ្តាលឱ្យនរណាម្នាក់រងរបួសទេ ។ ក្រោយពេលកើតហេតុរថយន្តបង្កបានសុំចេញថ្លៃខូចខាតរបងចំនួន២០០ដុល្លារទៅម្ចាស់ការដ្ឋានសំណង់ ៕
ចែករំលែកព័តមាននេះ